Read Konyak Naga 2 PUTAHPANGAO 23 Bible Online

2 PUTAHPANGAO 23 - Konyak Naga bible

2 PUTAHPANGAO 23

¹Hüpoi wangpeng nyit shepupa me ngengpa Jehoiada-e toi linglak hipak sha-a ngoi nang she tüm. Iye haja woipalan iman naoshe nga phei jiengjeppu yah: Iman-a Jeroham üha Azariah, Jehohanan üha Ishmael, Obed üha Azariah, Adaiah üha Maaseiah, hüyange Zichri üha Elishaphat ngoh yangki.

²Iman Judah chingnyulan üshei yete yinkem hüyange iman phei jam-e Levilan hüyange puhu tepu üshanglan khongküm woiyange Jerusalem te leih ye.

³Iman khongkümpu khümjingte jem hüyange tüome iman-e ahngpa üha Joash phei jiengjeppu yah. Jehoiadawe imante i, “Hatüo me litepu ahngpa üha ngohnang! Youngwanpawe Ahngpa David huhayimlan jingne janyangpuke, I shaaji ahngne menglak.

⁴Hatüo teman-e hüke linglak. Aope ngengpalan hüyange Levilan Sabbath nyih yoi toishao mepu yelakei, ükhong lüm ne tamyangpu mepu ükhong ja-a khümjing peten yomlak;

⁵ükhong lüm yomepu ükhong jawe ahngnok yomlak, hüyange ülaolan khongkümpuwe khümjing peten mongme ngohlak. Kahta lili khümjing longkon mong me jemlak.

⁶Yoi yoi toishao ngohpu ngengpalan hüyange Levilan tokte kaiye ao-o khümjing nokte ongne yetamlak. Iman ongpu oklak, I hangjingne iman-e tüopa jingne jaowe tamyangpulan, hüpoi ülao kahtalan-e Youngwanpa ngao jailak yang, hüyange nokshao me ngohlak yang.

⁷Levilan-a yoi yoi ngouyang jonyange ahngpa neikonne ngohlak, hüyange I ümeken yete kem-e yonge taikülakei Iphei jam jamshe kemme yomlak. Khümjing noksa te ongne ütamja ngangma-a toi winlak.”

⁸Levilan hüyange Judah kahtalan-e Jehoiadawe hangke nyüowe tam hüke ling. Sabbath nyih iman toishao shoyangpulan kahta yanne yetai, tüokhei woipalan-ne ngohpulan-e yampu kahtalan khongküm yeyanpe ngohpu hei ülalan peipu moilan tüopu ok.

⁹Hüyange ngengpa Jehoiadawe khümjing me angpu David ahngpa jing ngoulow hei ree haja woipalante ngaiye pha.

¹⁰Iye khümjing nokshao ye neikonne kahtalan ngouyang phei ahngpa yomlak jingne tüoh.

¹¹Tüophei me Jehoiadawe Joash woiye yüo, I shangme ahngpa shaoshaoh shaohtam, hüyange ahng wanglam lamlak ngaokhüm laitep ja pha. Hüke linge shaaji I-a ahngne menge tam. Ngengpa Jehoiada hüyange Ihalan-e Joashte minnga phowe tam, hüyange moilan-e “Ahngpa jinlaowe ngohtüoh!” she üngwün.

¹²Ahngpa jingne kahtalan-e hoongli mongongpu wüng aope Athaliahwe jai, tüokhei ümeken me ükhong üyong jemme ngoh tüoken khümjing ngoine yha mamme phet.

¹³Hüwante khümjing taten shong ahnglan jingne lingpu shongnyu shongme naomei ütahlan hüyange nyawong wüngpalan-e neikon yange ahngpa üla yongyange yhawe nge. Kahta lili hoongli mongongpu phei üngwün hüyange nyawong wüng, hüyange khümjing me hem lokpalan-e iman kongtoilan wünge mo-a woi. Hüke ngewante yhawe mongmeng wongkümpuwe yoi inkhek hit hüyange üngwünne i, “Khüwtam pu yang! Khüwtampu yang!”

¹⁴Hüwante ngengpa Jehoiadawe nyahpong woipalan yo me leyange angpu ghoja woipate ngao phawe i, “Khüng lenge yonge ngohpu pa me yha woi teitüoh, hüyange aohipawe yha yintamhuwe woilakei yanglow-e toitüoh.” Hangjingne ngengpawe inang, “Yha Youngwanpa nok me toine tahtam.”

¹⁵Tüokhei iman-e yhate yak yu; hüyange ahngnok te ongpu koilam peten pongme iman-e yha toi.

¹⁶Ngengpa Jehoiadawe I hei Joash ahngpa, hüyange kahta lili pa me, hüke iman Youngwanpa jing kahta ne menglak she jiengjeppu ja ling.

¹⁷Hüyange kahta khongküm Baal nokte ong, hüyange hatüo menge win, hüyange I wümjong hüyange I moung khoihnyai-e menge tam, hüyange Baal ngengpa Mattan wümjong tang me toi.

¹⁸Jehoiadawe khümjing toishao me yakjongpa ne ngengpalan hei Levilan ange tam. Ahngpa Davidte iman toishao hangke linglak nyinge tam hüke iman-e linglak hüyange Mosa ngaokhüm me ngohpuke jakke dopulan dolak jingne; hüyange üne-o iman-o hemloklak hei mo tümlak me yakjongpa ne menge tam.

¹⁹Üne-o Jehoiadawe Youngwanpa nok peten me ülam ja me yejao yeshape ngohma-a ao-o ye-onglak nanjingne peten yompalan Iye tüoh.

²⁰Hüyange Jehoiadawe nyahpong woipalan, jat hei li woipalan, Governorlan, hüyange kahmük me ngohpu kahtalan khongkümpu woiyange Youngwanpa nok mepu ahngpa-a shomme aiye ahngnokte yah pei. Peten üjengpa kaiye iman ong, hüyange ahngpawe yoi ahngpa shotjing me shot.

²¹Kahta lili mongmeiye maawe ngohyangki; hüyange iman-e Athaliah-a yanglow-e toiyang phei me chingnyuwa wüngmakke ngohyangki.