Read Konyak Naga 2 PUTAHPANGAO 24 Bible Online

2 PUTAHPANGAO 24 - Konyak Naga bible

2 PUTAHPANGAO 24

¹Joash Judah me ahngne mengwante I nyu puh wangpeng nyit ngoh yangki; hüyange Iye Jerusalem me wangpeng deli wanglam lam. Inyuwa Beersheba chingnyu mepu Zibiah she minpu ngohyangki.

²Hüyange ngengpa Jehoiada üyin me ngohpu mongme Joashwe Youngwanpa sheshao me hanghe ütingpa hatüo ling.

³Ahngpa Joash jingne Jehoiadawe sheko ni yahtam, hüyange iman-e naoshe naoyhalan puh tam.

⁴I ahngne mengphei me ütenja ngohyange Joashwe khümjing linge yelak jingne tüm,

⁵Iye ngengpa hei Levilan jamshe jemne tamyange i, “Judah chingnyulan tangte taitüoh, hüyange Israel khongkümpu mepu wang ja mepu ja ngoiye numan Kahwang nok linge yelak jingne ngin shai jemtüoh, hüyange numan-e mam mamshe lingtüoh.” Hüpoi Levilan-e mam mamshe yeling;

⁶tüokhei Iye iman woipa Jehoiada te nyik, hüyange hüke kange i, “Hangne Judah hüyange Jerusalem mepu poon shailak jingne Youngwanpa shaoshanpa Mosawe Youngwanpa nyenok jingne shaipu Levilan yak mepu nange yeyupu?”

⁷Hangjingne sheko ümeng Athaliah hayimlan-e Kahwang nok menge ong; hüyange üne-o Youngwanpa nok me jaowe shayange angpu toinan khongküm Baal te khümlak jingne jonteki.

⁸Ahngpawe Levilante ngaokhüm pha, hüyange iman-e pakos ja ling, hüyange Youngwanpa nok tafün shong me ang.

⁹Kahwang shaoshanpa Mosawe üwangne wanwüng jeng me shaipu kih-e kahta liliye Youngwanpate kahngin yah peilak jingne iman-e Jerusalem hei Judah üshei yete ngaolan shon.

¹⁰Tüopa ngaolan-e kahtalan hüyange iman woipalan moiman, hüyange iman-e yoi yoi kahngin yah pei hüyange pakos maatam.

¹¹Hangkih tingme Levilan-e pakos-a ahngpa yakjongpalan tangte yah in, iman-e tüome ngin maayange ngewante, ahngpa yaknyanpa hüyange Ütahpa ngengpa, niye pakos-a ngaiye tamlak, hüyange hatüo yah ye-e angpu nyoi memuh ange tüoh. Hüke iman-e nyihjeih she ling, hüyange ngin üngang shaijem.

¹²Hüyange ahngpa hei Jehoiadawe Youngwanpa nok yakjongpalan te hatüo pha; hüyange iman-e Youngwanpa nok linge yelak jingne long khüwpalan, pee ai jonpalan hüyange üne-o Youngwanpa nok linge yepu me yahlak yan hei shakphan yan toilingpalan jingne nanmee ne pha.

¹³Hüke toilingpalan khongkümpuwe ngange ling, hüyange iman-e khümjinga ülang hangke ngoh hüke monge shemei shemong she linge ye.

¹⁴Aope iman-e toi linge sho, iman-e topu hon hei khüm-a ahngpa hüyange Jehoiada ni tangte yah pei; hüyange tüopawe üne-o Youngwanpa nok jingne khümwüm wante yahlak wan hei sheng, hüyange jakke dopu me jonlak jingne hüyange üpe meipu jonlak jingne sheng hüyange hon hei khüm tük-heilak ne ling. Jehoiada üyin me ngohpu nyih hei hipak mongme iman-e Youngwanpa nok me jakke dopu yelakpe ngoh.

¹⁵Sha-a Jehoiada yeonge wu-khang teiye I wangpeng gho ja phei me delüm ngoiwante I li.

¹⁶Iye Israel kahtalan jingne, Kahwang jingne, hüyange khümjing jingne toimei linge shaoshan yangpu jingne yihnoonne iman-e I mang David chingnyu ngeng-ahng mangjong me mu.

¹⁷Hüpoi Jehoiada li pheime Judah woipalan pei hüyange ahngpate yoppe khüm. Hüwante ahngpawe iman ngao yah.

¹⁸Tüokhei kahtalan-e iman pajeiyonglan Kahwang Youngwanpa te khümpu lak, hüyange Asherah kahwanglan moungte khümne ükong wang. Iman-e püohpu ünu jingne Youngwanpa mongshih ngaipu Judah hei Jerusalem tangme pei.

¹⁹Youngwanpawe iman I tangte lüppe yetamlak jingne deingao phawe hipalan shon, hüpoi kahtalan-e iman ngao yejai.

²⁰Tüophei me Kahwang yaha Jehoiada ngengpa üha Zekharia tang me pei, hüyange kahtalan sheshao me I yong, hüyange imante i, “Hüke Kahwange inang, ‘Numan moiman yenanglak üne hangne numan-e Youngwanpa ngaokhüm meng nangki? Numan-e I winne tüohpu khei Iye-o numan winteki.’ ”

²¹Hüpoi iman-e I phei tüi-e kon meng kon, hüyange Joash ahngpa-o iman phei om, hüyange ahngpawe ngaopha pu kaiye iman-e khümjing longkon mongme Ite longe shüp.

²²Hüke Joash ahngpawe Zekharia üpa Jehoiadawe Ite hüshin-e kenne shaoshan yangpu yeteih tüope pemah yange, I ha toi. Zekharia lüomah eipe Iye hüke i; “Nange hanghe ling Youngwanpawe nge yah hüyange nangte phuh hahtüoh!”

²³Aope tüopa wangpeng laojee ngoi yapeih, Aram nyahponglan peiye Judah hei Jerusalem chinghah yange woipalan khongküm toi, hüyange toinyu nanha üngang pomme yahyange Damascus te leih ye.

²⁴Aram nyahponglan-a üjingha hei ngoh, hüyangpoi Youngwanpawe imante Judah wetaipalan üngang ngohpu phünne pha, hangjingne ima-a iman-e iman pajeiyonglan Kahwang Youngwanpa winne tüoh. Hükih-e ahngpa Joash tangme shaoshi yatengpu pha.

²⁵Aope wepalan-e Joash yemeipe maapha yange yemah ne tam, I shaoshanpa lan-e I phei tüi-e ümeng ling; hangjingne ima-a Iye Jehoiada ngengpa üha iy shaitam, hüyange iman-e I yoi shinleng me toi. Hüyange iman-e I mang David chingnyu me mu, hüpoi iman-e I mang ngeng-ahng mangjong me yemu.

²⁶I phei tüi-e konmeng konpalan Ammonlan yha Shimeath üha Zabad, hüyange Moab yha Shimrith üha Jehozabad ngohyangki.

²⁷Joash hayimlan jeng, I phei tüi-e ümenglam me itte tampu jeng, hüyange khümjing linge yepu nyanpu jeng, khongküm ahngpalan laitep me khoihnyai-e nyanyange ngohnang. Hüyange I ha Amaziahwe I nanleiye ahngne meng.