Read Konyak Naga 2 PUTAHPANGAO 25 Bible Online

2 PUTAHPANGAO 25 - Konyak Naga bible

2 PUTAHPANGAO 25

¹Amaziah ahngne menge wangwante I nyupuh wangpeng da me nga ngoh yangki. Hüyange Iye Jerusalem me wangpeng da me tu ahngne meng. Hüyange Inyu min Jehoaddin Jerusalem mepu ngoh yangki.

²Iye Youngwanpa sheshao me ütingpa hanghe ngoh hatüo ling, tüoyangpoi jaoshe pu mongjang phei yeje.

³Hüyange ahngchinga I yak me wongnange peiwante, Ipa toipu shaoshanpalan Iye toi.

⁴Hüpoi iman hayimlan pa-a Iye yetoi, hüpoi Youngwanpawe ngaowe tampu Mosa ngaokhüm laitep me, “Hayimlan jingne nyupalan yelilak, yejema-a nyupalan jingne hayimlan yelilak, hüpoi kahta lili yoi ümeng jingne lilak,” she ngohpu kih-e Iye ling.

⁵Ahngpa Amaziahwe Judah hüyange Benjamin jatlan mepu kahta lili nyik-e jemyange nyahpong ne menge tam, hüyange haja ükhong, gho ükhong she yoi yoi puhu hangke ngoh hüke tamyange woipa japong phang me ang. Hatüo me wangpeng da hüyange tüo tok tepu netanlan lakh lüm ngoh. Iman khongkümpu ngoulow hüyange ree jonpu me wongnangpalan, shapju jingne tümyang phei ükhong ne ngohyangki.

⁶Tüotokte paowe Iye Israel mepu wetaipalan lakh ja, khüm ükhüw kilogram haja lüm gho peli ümee phayange nanpheng.

⁷Hüpoi hipa ja ahngpa tangte pei hüyange Ite i, “Nang phei jamme tüolan Israel wetaipalan tah tei. Tüolan apyekao ahngching kahtalan phei Youngwanpa omme yenang.

⁸Iman-e shapju me wongnange tamphalak she nange teihne ok, hüpoi Kahwange hei nangte naowe hüyange okke tamlak wong yahphalak, hüyange Iye nang wepalan naowe tamyang phalak.”

⁹Amaziahwe hipate tong, “Hüpoi taowe iman jingne pha yangpu khüm khongkümpuwa hangke ilak?” Hipawe jan, “Youngwanpawe tüophei shenyei she nangte leih phapu oklak!”

¹⁰Tüokhei Amaziahwe Iye nanpheng peipu wetaipalan-a shonne yetamlakne ngai, hüyange iman nokte leih jayetüoh she imante ngaowe tam. Hüwante iman yeonge mongmenge Judah kahtalante yemeipe mongshih ngaiye leihye mah.

¹¹Amaziah I nying nyingke wongnange yong, hüyange yoi kahtalan wetaipalan yahyange yayong, hüyange Hüm kahjee ngoiyange tüoken me Edomlan kahta haja pen toi.

¹²Hüyange üne-o haja pen-a üyin me pho. Iman khongkümpu phowe yahyange longwak ütangte woi in, hüyange longwak te toiloi yeitai, iman khongkümpu longwak phang me li.

¹³Tüopa hipak ja me muh Amaziahwe leih ye ne tampu wetaipalan ükhong aoyin I phei shapju te taine yetam, iman-e Judah chingnyulan chinghah, Samaria hei Beth Horan nipa mepu, hüyange haja lüm toi, hüyange toinyu nanha üngang nyieye yah.

¹⁴Aope Edomlan naoyange Amaziah leih ye, Iye iman kahyaklan I phei yahyange ye, tüolante khümlak jingne linge ang, tüolan te khüm, hüyange tüolante sünyet jakke khüm.

¹⁵Tüokhei Youngwanpawe Amaziahte mongshih ngai hüyange I tangte hipa ja shonne Ite i, “Hangne nange ülao jat kahwanglan aowe iman kahta numan yak mepu yintampu ye-ok iman yamme khümpu?”

¹⁶Hüpoi i ngaowe ngohwante ahngpawe Ite i, “Toman-e nanga ahngpate konnyüowe tampa ja ne menge tampu a?” Ngao ipu laktüoh! “Hangne nang li ne tamhupu?” Tüokhei hipa ngaopu lak, hüpoi Iye i, “Kahwange nang mah tamlak mongteki she taowe shingnang, hangjingne nange hatüo ling hüyange taowe nyüopu yeyah.”

¹⁷Judah ahngpa Amaziah hüyange I pheipu lan-e Israel lante lowe lampu ja ling. Tüophei me Iye Jehoahaz üha hüyange Jehu ühu Israel ahngpa Jehoash te lamponglak jingne nyik-e ngaolan shon.

¹⁸Amaziah tangte Jehoashwe tüopa ngaolan shonne ye: “Hipak ja me Lebanon kahtang me ngohpu huhpee jawe, Lebanon me ngohpu cedar te ngaolan shon: ‘Nenok naoyha tenok naoshe me shekonyu ne yahkei.’ Phao yinmok ja tüo kaiye linne tai, hüyange huh pee-a yawe lokke tüoh.

¹⁹Sha-a Amaziah, nange Edomlan naoyangki she nang yongelüo nang, hüpoi taowe nangte nok me jünge ngohlak jingne hengnang. Hangne nang hüyange nang phei Judah toiye talak ne shaoshi ngaine tamke?”

²⁰Hüpoi Amaziahwe hatüo ngao yeyah. Hatüowa Amaziah mahtamlak jingne Kahwange mongpu ja ne ngoh yangki, hangjingne ima-a Iye Edomlan kahwanglan te khüm.

²¹Tüokhei Judah ahngpa Amaziah phei hoklak jingne Israel ahngpa Jehoash shapjute tai. Iman Judah kahtok mepu Beth Shemesh me hüo.

²²Judah nyahponglan ne ye ok, tüokhei wetaipalan-a yoi yoi nokte phette yeküm.

²³Jehoash-e Amaziah pho hüyange I-a Jerusalem te yah ye. Tüome Iye chingnyu jantpe Ephraim peten mepu üshukye peten ngoiye yakkong gho peli ngoiye khüw mengetam.

²⁴Hüyange Iye hon hei khüm khongküm nyieyah, khümjing me ngohpu wan hei sheng khongküm hüyange tüolan phei Obed Edom omme; hüyange ahngnok toinyu nanha, tüophei jamme phowe angpu kahtalan yahyange Samaria te leih ye.

²⁵Judah ahngpa Joash üha Amaziah, Israel ahngpa Jehoahaz üha Joash li phei me wangpeng pen me nga üyin me ngoh. (Ülao ja me hüke ngohnang: Judah ahngpa Amaziah Israel ahngpa Jehoash phei wangpeng pen me nga nyeiye üyin ngoh.)

²⁶Amaziah-e lingpu ülaolan toishao khongküm, üwang mepu üküm ngoiye, Judah hei Israel ahngpalan laitep me nyanyange ngoh nang.

²⁷Iye Youngwanpa sheshao mepu lüppe taipu hipak mepu iman-e I phei tüi-e Jerusalem me konkon, üküm ne I Lachish chingnyu te phette tai, hüpoi I wepalan tüo ngoiye I pheite woi, hüyange I toi.

²⁸Hüyange iman-e I mang koipong me yah ye; hüyange I David chingnyu me Ipayimlan phei mu.