Read Konyak Naga 2 PUTAHPANGAO 26 Bible Online

2 PUTAHPANGAO 26 - Konyak Naga bible

2 PUTAHPANGAO 26

¹Tüophei me Judah kahtalan khongkümpuwe nyupuh wangpeng pen me wok ngoipu Amaziah üha Uzziah Ipa nanleiye ahngne menglak jingne le.

²Ipa Amaziah liphei me Uzziahwe nishe Elath omme ye hüyange Judah jingne linge ye.

³Uzziah ahngne mengwante I nyupuh wangpeng pen me wok ngohyangki, hüyange Jerusalem me Iye wangpeng denga me ni ahngne meng. Inyu min-a Jerusalem mepu Jecoliah ngoh yangki.

⁴Ipa Amaziahwe lingpuke Iye Youngwanpa sheshao me ütingpa hanghe hatüo Iye ling.

⁵Mengpu wanglam yekao me Ite juteih phapa Zekharia üyin me ngohpute ngoi she, Iye ütinglakpu phei Youngwanpa shaoshan, hüyange Kahwange Ite moimantam.

⁶Philistialan phei hoklak jingne Uzziah tai; hüyange Iye Gath, Jabneh, hüyange Ashdod chingnyulan jantpenyu menge win hüyange Ashdod phei owe hüyange towe ngohpu Philistia chingnyulan chingtuk pepe.

⁷Kahwange Philistialan phei tüi-e hüyange Gurbaal me ngohpu Arab lan, hüyange Meunitlan phei tüi-e Ite jam.

⁸Ammonlan-e Uzziah te poon pha, hüyange I okkeshangpu Egypt yikengpong ngoiye ponge tai, hangjingne I yeonge wongnange yong.

⁹Üne-o Uzziahwe Jerusalem nok üshukye peten, kahjee peten hüyange jantpenyu koom-e yepu nyoijing üshei me chingtuk pepe yange wongnange linge ye.

¹⁰Hüyange phao ko me Iye daonok yomteplan we, hüyange yengnung üngang shaowe ling, hangjingne Iye tampu yinmok üngang henyip yekao kah yashong me hüyange kahjee me ngoh yangki, hüyange kahtang me hüyange kahtok ümei nyoi khongküm pume kahhampalan hüyange wuwünglick kah hampalan ngoh yangki, hangjingne Iye kah hamlak te ken.

¹¹Üne-o Uzziahwe wehoklak jingne wetaipalan üngang tümyang phei ngoh, hüyange hatüowa yaknyanpa Jeiel hüyange yakjongpa Maaseiah, Hananiah ahng gho mepu woipa jawe hüowe tampuke iman-e shangtoi itte shemme lingpuke ükhong ükhong ngoh yangki.

¹²Nyahponglan-a woipalan iman haja ni gho wokke woipu phang me ngoh yangki.

¹³Iman phangme wetaipalan ükhong lakh lüm haja nyit phei me gho nga ngoiye, iman-e wepa phei hokke ahngpate jampu oklak wong üyong phei ngohyangki.

¹⁴Hüyange Uzziahwe iman jingne, iman khongkümpu jingne ree ngoulow, yan shaoshaoh, yan phakshaoh, wenglah hüyange lahhan, hüyange shüplak jingne long tüm-e tam.

¹⁵Jerusalem me I phang me ngohpu manyangpu kahta lan-e daonok yomtep me hüyange chingnyu jantpe ünuk pong me yongyange lahhan hüyange long üyong keplak ne kon ling. Hüyange Iye okkeshangpu üken phe me ponge tai, hüyange Kahwang mepu jam-e pongpu Iye tüopu kaiye I yeonge wongnange ngai.

¹⁶Hüpoi I wongnange ngaiwante I yoi mahlakpa jingne otawe ngai, hüyange Iye yoi Kahwang Youngwanpa phei tüi-e ngaokhüm meng; hangjingne Iye wümjong me sünyet jaklak jingne Youngwanpa khümjing te ong.

¹⁷Hüpoi Azariah ngengpawe I phei jamme wongnangpu hüyange hoonglipu ngengpalan detet yahyange ahngpa pheite I yahyüolak jingne woi ong.

¹⁸Hüyange iman-e Uzziah ahngpa phei tüi-e yong, hüyange Ite i, “Uzziah! Youngwanpa te sünyet jaklak-a nang toishao ne yeje; hüpoi sünyet jaklak jingne-a jaowe tamyangpu Aaron hayim ngengpalan jing ngoh nang: Üjao nyoi mepu yutüoh; hangjingne nange ngaokhüm mengteki, hüyange Kahwang Youngwanpa mepu minyong ngampai nangte yah yepeilak.”

¹⁹Uzziah-a khümjing ümong me sünyet tük jonyange sünyet jaklak wümjong shong me yongyange ngoh yangki. Ngengpalante I yeonge mongshih ngai, hüyange hüwante mokhshe I shekeng me ngonma ngai.

²⁰Hüyange Azariah ngengpa ütah, hüyange ülao ngengpalan khongküm puwe Ite lei, hüyange leihuyah, I shekeng me ngonma ngai teiye-ngoh! Hüyange iman-e I mamshe shunge yüo, hüyange I yoi nying nyingke yulak jingne mam. Hangjingne Youngwanpawe Ite shütte tam.

²¹Hüyange Uzziah ahngpa I lipu nyihte ngoi she ngon pahyange ngoh, hüyange ngon pahyange ngohpu nanjingne toishao üshei tüoh yange nok ülao ja me ngoh, hangjingne Youngwanpa nok mepu I yanne tamyange ngoh yangki. Hüyange Iha Jotham-e ahngnok tangme hüyange kahtalan tang me wanglam lam.

²²Ahngpa Uzziahwe I wanglam lampu hipak me lingyangpu ülao toishaolan khongküm Amoz üha Isaia hipawe nyanyange ngohnang.

²³Uzziah li hüyange iman-e ngeng-ahng mangjong me I mu, hüpoi dak ümeng pahyangpu jingne I-a ngeng-ahng mangkoksa me ye mu. I ha Jotham I nanleiye ahngne meng.