Read Konyak Naga 2 PUTAHPANGAO 28 Bible Online

2 PUTAHPANGAO 28 - Konyak Naga bible

2 PUTAHPANGAO 28

¹Ahaz nyupuh wangpeng da me ngohwante ahngne meng, hüyange Iye Jerusalem me wangpeng pen me wok wanglam lam. Iye iman pajeiyong David ahngpawe lingpu toi mei phei te yewoi, tüo nanleiye Youngwanpa mükshao me hanghe yemei hatüo Iye ling,

²hüyange Israel ahnglan kon yah yange yan phei Baal moung ling;

³üne-o Iye Hinnom hayim kahjee me sünyet jak, hüyange Youngwanpawe Israel hayim sheshaomepu jange teipu yemengpu jatlan nunushepu toishaolan kih-e yoi hayimlan toiyange vün me jakke do.

⁴Hüyange Iye jakke dopu pha, hüyange ülao kahwanglante, kahtang me, hüyange peshüm phang phe me Iye sünyet jakke do.

⁵Tüokhei Youngwanpawe I Aramlan yak me phünne pha; hüyange iman-e I nao, hüyange ükhong üngang phowe tei, hüyange iman Damascus te yah ye. Hüyange Israel ahngpa, aowe I tangme üngang toiyange okpu nge, I yak me phünne pha.

⁶Hangjingne ima-a Remaliah üha Pekah-e Judah me nyih ja me lakh ja haja da toi, iman khongkümpuwa wongnangpu kahtalan, hangne ima-a, iman-e Youngwanpa iman pajeiyonglan Kahwang winne tüoh.

⁷Hüyange Ephraimlan wongnangpu kahta ja Zichriwe ahngpa üha Maaseiah, ahngnok woipa Azrikam, hüyange ahngpa maimepu Elkanah toi.

⁸Hüyange Israel hayimlan-e iman pheipu lan-e jeyapoi shekonyulan, netan hei sheko hei nahalan lakh ni ngoiye phowe yah tai, hüyange iman mepu nyie yahpu toinyunanha üngang yahyange tai, hüyange tüolan khongkümpuwa Samaria te yah ye.

⁹Hüyangpoi Samaria chingnyu me Youngwanpa hipa ja, Oded she minpu ngoh yangki: Israel wetaipalan leih yepulan phei I hüo hüyange imante i, “Leihuyah, Youngwanpa, numan pajeiyonglan Kahwang, Judah phei mongshih ngaiye ngohpu nanjingne, Iye numan yak me iman pha, hüyange numan-e mongshih ümeng ngaiye iman toipu wangdang ngoiye ongteki.

¹⁰Hüyange sha-a numan-e Judah hüyange Jerusalem hayimlan rhanyu rhapa ne menge tamlak jingne mongnang. Numane-o numan Kahwang Youngwanpa phei tüi-e ünu omnang she yeshingpu a?

¹¹Tüokhei sha-a numan-e ü-ngao jaiyah, hüyange numan jeiheinaolan numan-e phowe yepalan-a leih yene tamtüoh. Hangjingne Youngwanpa nyamlakpa ne mongshih ngaipu numan tang me ngohkülak.”

¹²Apyekao ahngching mepu woipalan peli, Jehohanan üha Azariah, Meshillemoth üha Berachiah, Shallum üha Jehizkiah, hüyange Hadlai üha Amasa imane-o wetaipalan-e lingpu toite yeshu she laa yong.

¹³Hüyange imante i, “Numan-e tüome phowe yahpalan yah tahpei: hangjingne sha-a ngohpu toman ünu hüyange ümeng tokte ünyei paowe tamlak ne numan-e Youngwanpa phei tüi-e tomante ümeng ki peine konnang; hangjingne toman ünu loiteiye ngohnang, hüyange Israel phei tüi-e nyamlakpa ne mongshih ngaipu ngoh nang.”

¹⁴Tüokhei wetaipalan-e phowe yepalan-a hüyange iman-e nyieyahpu toinyu nanhalan-a woipalan hüyange ükhong sheshao me tüoh.

¹⁵Hüyange kahta peli lepulan yayong hüyange phowe angpalan woipeiye, hüyange nyieyahpu toinan mepu iman yome pümkeng me ngohpalan khongküm pute inne tam, imante yashom shom-e tam, hahying wangman-e pha, hüyange mayah yange ngohpalante minnga phowe tam, hüyange iman yo me mokh ye-okpulan khongküm gado me shot ne tam, iman-e yoi jeiheinaolan tangte, logpee chingnyu Jerikho te woiye yene tam. Tüophei me Israellan-a Samaria te leihye.

¹⁶Tüopa hipak me Ahaz ahngpawe Assyria ahngpa lante Ite jamlak jingne shon.

¹⁷Hangjingne ima-a Edomlan-e ni she peiye Judah chinghah hüyange kahtalan phowe tei.

¹⁸Tüopa hipak ja me muh Philistia lane-o henyipye kah yashong me nyoipu chingshaolan hüyange Judah heyekao chinghah. Hüyange iman-e Beth Shemesh, Aijalon, hüyange Gederoth chingnyulan om; hüyange Soco, Timnah, hüyange Gimzo chingnyulan iman chinghalan phei omme yah, hüyange tüoken me yetai ne nyoi.

¹⁹Hangjingne Israel ahngpa Ahaz jingne Youngwanpawe Judah yeine tam, hangjingne Iye Judahlante namnopu yenangpe ling hüyange Youngwanpa phei tüi-e yeonge yemeipu ünu om.

²⁰Tüokhei Assyria ahngpawe, Ahaz te jamhah shepu nanleiye I phei tüi-e yong hüyange shaoshi ngaiye tam.

²¹Tüokhei Ahazwe khümjing mepu, ahngnok mepu, hüyange kahtalan woipalan noksalan mepu hon shaiye yah, hüyange Ahngpate pha, hüpoi tüowe-o Ite yejam ok.

²²Aope I wengtuh te yemeipe tayapeih, hatüo kahta Ahazwe Youngwanpa sheshao me üshongpu phei shemeng she ünu om.

²³Hangjingne Damascus kahwanglan aowe Ite nao, imante toidopu pha; hüyange Iye i, “Aram ahngpalan kahwanglan-e imante jam, tüokhei üte-o jam-e tamlak jingne imante taowe toidopu phalak.” Hüpoi tüolan kaiye I hüyange I jatlan jingne mahlakpa yahpeipu ne ngoh yangki.

²⁴Tüo tokte paowe, Ahaz-e khümjing mepu wan hei sheng ja ne shaijem, hüyange wan hei sheng khongkümpu khoihnyai-e paiye win, hüyange Iye Youngwanpa khümjinga taküp latte tüoh; hüyange Iye Jerusalem üshuk üwong ken phe me wümjong ling.

²⁵Hüyange Youngwanpa iman pajeiyonglan Kahwang mongmeng ne tam-e Judah chingnyu lili me Iye ülao kahwanglan te sünyet jakke khüm lak jingne wümjonglan ling.

²⁶Sha-a towe ngohpu I toishaolan I juteih khongküm, üwang mepu üküm ngoiye leihuyah, tüolan-a Judah hüyange Israel ahngpalan laitep me nyanyange ngohnang.

²⁷Ahngpa Ahaz li hüyange Jerusalem me mu, hüpoi Ngeng-ahnglan mangkoksa me yeje. I ha Hezekia I nanleiye ahngne meng.