Read Konyak Naga 2 PUTAHPANGAO 29 Bible Online

2 PUTAHPANGAO 29 - Konyak Naga bible

2 PUTAHPANGAO 29

¹Hezekia ahngne menge wangwante I nyupuh wangpeng da me nga ngoh yangki, hüyange Iye Jerusalem me wangpeng da me tu ahngne meng. Inyu min-a Zekharia yhala Abijah ngoh yangki.

²Iman pajeiyong David Ahngpawe hangke ling hüke, Youngwanpa sheshao me hanghe ütingpa hatüo Iye ling.

³I ahngne mengpu üwangpa wangpeng üwangpa leat me, Iye Youngwanpa khümjing tatenlan ep, hüyange tüolan-a linge ye.

⁴Iye ngengpalan hüyange Levilan woiye ong, hüyange heongye nyoi shenangpu kao me jemne tam;

⁵hüyange imante i, “Ü-ngao jaiyah, numan Levilan, sha-a numan nying nyingke jaowe shayah, hüyange Youngwanpa numan pajeiyonglan Kahwang nok jaowe tamtüoh, hüyange üjao nyoi mepu yejao yeshapu khongküm yah tei tüoh.

⁶Hangjingne teman payimlan-e ünu om, hüyange Youngwanpa teman Kahwang sheshao me hanghe yemei hatüo ling, hüyange I winne tüoh, hüyange iman sheta Youngwanpa ngohpu nyoi mepu leihye mah, hüyange iman tok phei yete lüp.

⁷Iman-e üne-o khümjing tatenlan küppe tüoh, hüyange vüntük meiye tüoh, hüyange sünyet yejak, yejema-a Israel Kahwangte üjao nyoi me jakke dopu yepha.

⁸Tüojingne Youngwanpa mongshih ngaipu Judah hüyange Jerusalem tang me ngoh yangki; hüyange Iye iman nyam nyamshepu, hüyange mokhlakpa ngohne hüyange wünge mahlak linge tampu numan-e yoi mükke ngeteki.

⁹Teman payimlan-a shapju me toi küm, hüyange teman shekonyulan hüyange hayimlan phowe küpnokte teiyangki.

¹⁰“Sha-a Youngwanpa, Israel Kahwang phei, hüke I nyamlakpa ne mongshih ngaipu teman mepu yanne tailak nanjingne jiengjeppu ja yahlak ü-mongjang me ngoh nang.

¹¹Ü-hayimlan, sha-a mong yephape tah ngoh: hangjingne Youngwanpawe numan I sheshao me yonglak, hüyange numan I shaoshanpalan ne menglak, hüyange sünyet jaklak jingne leteki.”

¹²Hüwante Levilan yayong hüyange iman hüke ngoh: Kohath puhu mepu, Amasai üha Mahath hüyange Azariah üha Joel; Merari puhu mepu, Abdi üha Kish hüyange Jehallelel üha Azariah Gershon puhu mepu, Zimnah üha Joah hüyange Joah üha Eden,

¹³Elizaphan puhu mepu, Shimri hüyange, Jeuel Asaph puhu mepu, Zekharia hüyange Mattaniah,

¹⁴Heman puhu mepu, Jehuel hüyange Shimei, Jeduthun puhu mepu, Shemaiah hüyange Uzziel.

¹⁵Tüolan kahtalan-e iman pheipu Levilan nyik-e jem, hüyange iman nying nyingke jaowe shatam, hüyange Youngwanpa ngao ahngpawe ngaowe tampuke, Youngwanpa nok jaolak jingne noksa te ong.

¹⁶Hüyange ngengpalan khümjing ümongpa te tüopa jaolak jingne ong, hüyange khümjing mongme iman-e yejao yeshape ngepu khongküm khümjing nokshao te yah yüo. Hüyange Levilan-e hatüo Kidron yengyin te moiye yahtei.

¹⁷Toishao-a üwangpa leat üwangpa nyih jaone ükong wang, hüyange tet shepu nyih me iman-e toi shoyange khümjing nok mongte ong; tüophei me ünepu nyih tet mongme iman-e toi ling, hüyange nyih pen me wok mongme yoppe khümpu oklak ne khümjing tümme sho.

¹⁸Tüophei me Levilan Ahngpa Hezekia tangte pei, hüyange hüke ngaolan pha: “Toman-e khümjing khongkümpu jakke dolak jingne wümjong, dopu an jingne khao, hüyange toinan khongkümpu omme jaowe poiye tümteki.

¹⁹Üne-o Ahaz ahngpawe I ahngne mengwante Iye ünu omme yah teipu wan hei sheng khongküm toman-e yah yeteki, hüyange toman-e nishe jaowesha tamteki. Tüolan khongkümpu Youngwanpa khümjing sheshao me ngoh nang.”

²⁰Hüwante Hezekia ahngpa shonne yengohpe yayong, hüyange chingnyu mepu woipalan jem ne tam; hüyange khümjing te ong.

²¹Hüyange mahu üpong nyit, nyee üpong nyit, nyee üha nyit, hüyange younpong nyit, ahngnok ünu, Judah kahtalan ünu yahteilak jingne do ne hüyange khümjing jaowe tamlak jingne yah pei. Hüyange Ahngpawe Aaron huhayim ngengpalan te Youngwanpa wümjong me tüolan-a dolak jingne ngao pha.

²²Ngengpalan-e mahu üponglan üwangne toi, tüophei me nyee üponglan, hüyange tüophei me nyeehalan, hüyange toidopu lep iye tüolan iy yahpuwe wümjong te shaitam.

²³Üküm ne ünu dopu jingne iman-e younponga ahngpa hüyange jem-e ngohpu ükhong sheshao me owe yah pei, hüyange iman-e tüolan tangme yakke shüng.

²⁴Hüyange ngengpalan-e younpong lan-a toi, hüyange iman-e wümjong tangme iy phowe tam-e Israel khongkümpu jingne ünu taantamlak jingne do: hangjingne ahngpawe Israel khongkümpu jingne jakke dopu hüyange ünu dopu phalak wongpong she ngaokhüm pha.

²⁵Ahngpawe, David ahngpate Youngwanpawe I hipa Gad, hüyange Nathan hipa kaiye phapu nyüoweleipu me woi; hüyange Levilan Iye kongki ümtük hei yankooklan phei khümjing me angne tam,

²⁶David ahngpawe jonpu kihpu kongtoilan phei ang. Ngengpalan-o tüoken me nyawong phei yong.

²⁷Hüyange Hezekia-e wümjong me jakke dopulan phalak jingne ngao pha. Hüyange jakke dopu phawe wangwante, Youngwanpate minyong phapu hem lok, nyawong hüyange Israel ahngpa David kongtoilan wüng.

²⁸Hüyange tüome ompu liliye yop, hem lokpalan-e hemlok, hüyange nyawong wüngpalan-e hüke wüng; tüolan khongküm jakke dopu tüm-e mansho mansho yelakpe ngoh yangki.

²⁹Aope dopuwa shoyapeih, ahngpa hüyange I phei omme ngohpu khongkümpuwe iman nying nyingke khuhta hüyange yop.

³⁰Üne-o Hezekia ahngpa hüyange jat woipalan-e Levilan te, David hem hüyange hipa Asaph lan-e nyanpu hem kaiye Youngwanpa te minyong phalak jingne ngao pha. Tüokhei kahta liliye yeonge hoongli mongongpu phei hem lok, hüyange iman-e yatuh shünge Kahwangte khüm.

³¹Hezekiawe kahtalante i, “Sha-a numan yoi nying nyingke phünne phawe jaoteki, Youngwanpate minyong phawe jakke dolak jingne yah peitüoh.” Iman-e ngaowa jaiyah, hüyange iman yo me ütame-a jakke dopu phalak jingne yinmoklan jajang jawe yah pei.

³²Hüyange jempu ükhonge yah peipu jakke dopulan-a mahu üpong denyit, nyeepong gho ja, hüyange nyee üha gho ni: tüolan khongküm Youngwanpate jakke dolak jingne pei.

³³Üne-o iman-e kahtalan-e hahlak jingne dopu phapu peipuwa, mahu üpong gho wok, hüyange nyee haja lüm.

³⁴Hüpoi ngengpalan jamloi ükhong shoi, tüokhei jakke dopu khongküm puwa iman-e tüm-e yesho ok; tüokhei toishao mantüm mantüm, hüyange ngengpalan iman nying nyingke jaowe mansho mansho iman jeiheinaolan Levilan-e imante jam: hangjingne ngengpalan phei Levilan mong jang jaowetampu toishao linglak jingne sheting she ngoh yangki.

³⁵Jakke dopu üngang ngohpu tokte kaiye, chingmei dopu üyao hüyange jakke dopu jingne yinglak dopu ngoh yangki. Hüke khümjing me yoppe khümpuwa ükong wange linge ye.

³⁶Hüke Kahwange tüolan khongkümpu mamme linge sholak ne imante jampu jingne Ahngpa Hezekia hüyange kahtalan mongmei.