Read Konyak Naga 2 PUTAHPANGAO 3 Bible Online

2 PUTAHPANGAO 3 - Konyak Naga bible

2 PUTAHPANGAO 3

¹David Ahngpawe leye tüohjing, Jebuslan Araunah tahnoijing me Ipa David tangte Youngwanpa ngaipu nyoi, Moriah kahmuh Jerusalem me Solomon-e Youngwanpa nok welak jingne ükong wang.

²I ahngne mengpu wangpeng peli shepupa lekeng nishepupa nyih nishepupa me Iye ükong wang.

³Kahwang nok welak jingne tüolan-a Solomon-e itte shempu ngohnang: Üjük me yakkong dewok, hüyange üpeam me yakkong da.

⁴Hüyange nok shaoye nok tok-a lüopute nok üpeam phei teihüowe yakkong da; hüyange tüopa daopuwa yakkong ghoja phei me da. Ümong yema-a Iye hon shaha phei linge we.

⁵Hüyange nok üjengpa-a Iye cedar pee phei khüng lenge ling, hanghe me Iye hon shaha phei phowe ling; hüyange tüopa tangme log pee hüyange yankeilei ling.

⁶Ahngpawe khümjing toinyu long hüyange Parvaim kahtok mepu peipu hon phei shemei yaoma puphei o tüm.

⁷Iye üne-o nokte yahpu pekeng, püangpeam, tüopa mepu jant hüyange tüomepu taküplan te, hon shokke ling, hüyange jant tang me cherubim ling.

⁸Hüyange Iye shejaopupa ümongpa nok we; hüyange tüopa lüopuwa nok üpeam phei teihüppe, yakkong da, hüyange üpeam-a yakkong da ling; hüyange Iye hatüowa hon toklak tokpu delüm tokpu gho wok ngoiye lingyange ling.

⁹Hüyange yanlag ne linglak jingne hon gram tok gho nga denyit jon, hüyange ütangpa tüp tepu jant khongkümpu hon phei shokke ling.

¹⁰Shejaopupa nok me anglak jingne Iye cherubim ni ling; hüyange Iye tüolan-a hon shokke ling.

¹¹Hüyange cherubim yangtenglan-a yakkong da lüowe ngoh yangki: Cherub ja yangtenga yakkong nga, noktepu jant te yüowe ngohyangki; hüyange yangteng ja-a hüke muh yakkong nga, cherub ja yangteng yüowe ngohyangki.

¹²Hüyange cherub ja yangtenga yakkong nga, nok jan yüowe: hüyange üne-o ülao yangtengo yakkong nga ülao cherub yangteng phei tei lette ngoh yangki.

¹³Tüolan cherubim yangtenglan-a iman nying nyingke yakkong da saayange ngoh yangki: hüyange iman-e yoi ya phei yong, hüyange iman sheta nok yekaote meyange ngoh yangki.

¹⁴Hüyange Iye shongpu inkhek-a wanghüng, ümon, hüyange ütak, hüyange pengkhai inkhek phei ling, hüyange tüopa tangme cherubim ling.

¹⁵Üne-o Ahngpawe khümjing nokshao me shongnyu ni yakkong delüm phei me nga pong daowe ling, hüyange ütang ye me üjuwa ja ja me yakkong nga pong.

¹⁶Hüyange shongju me Iye yankeilei yük kih-e shinne tam; hüyange Iye chamuk gho ja ling, hüyange tüolan-a yankeilei me khüm-e tam.

¹⁷Hüyange Iye shongnyuwa khümjing nokshao me ang, ja yakjah yeme, hüyange ja-a yaknya ye me; hüyange yakjah ye me ngohpu pate min Jachin hüyange yaknya yeme ngohpupa minna Boaz she nyik.