Read Konyak Naga 2 PUTAHPANGAO 30 Bible Online

2 PUTAHPANGAO 30 - Konyak Naga bible

2 PUTAHPANGAO 30

¹Hüyange Hezekiawe Israel hüyange Judah khongkümpute nyiklak jingne shon, hüyange Ephraim hüyange Manasseh tangte nyanpu lai shonne, Youngwanpa Israel Kahwang jingne linne taipu mo molak, Jerusalem me Youngwanpa tangte jemkei she nyan.

²Hangjingne ima-a ahngpa hüyange ahnghalan-e, hüyange Jerusalem me jempu khongkümpuwe, lekeng ni shepupa me linne taipu mo ngohlak jingne ngaowe tüm.

³(Hangjingne ngengpalan iman nying nyingke kahta wange jaowe shayange yenangpu jingne, hüyange kahtalan-o iman nying nyingke Jerusalem me jem-e yenangpu nanjingne tüopa hipak me hatüo ngoh ne ye-okpe ngohyangki.)

⁴Hüyange hanghe taisho tümyangki, ahngpa hei jem-e ngohpu ükhonglan khongkümpute moiman-e ngoh yangki.

⁵Tüokhei Beersheba mepu Dan ngoiye, hüke iman Jerusalem me Youngwanpa Kahwang jingne ngaokhüm me ngohpuke linne taipu mo molak jingne Israellan khongküm aope-o jeman jempu ükhong üyong jemtüoh she ngaolan yan.

⁶Ahngpa hüyange ahnghalan ne phapu ngaolan phei Judah hüyange Israel üshei yete ngaolan kipalan tüolan ngao phei yan: “Israel kahtalan, Assyrialan-e chinghahpu mepu numan yinyangki. Sha-a Abraham, Isaac, hüyange Jacob Kahwang Youngwanpa tangte numan leih yetüoh, hüyange I numan tangte leih yekülak.

⁷Numan payimlan hüyange numan jeiheinao Israellan kih-e tah ngoh, aoyinne iman Youngwanpa Kahwangte mong yehümpe ngoh, tüojingne numan-e ngepuke, Iye iman wüngmakke linge tam.

⁸Numan payimlan kih-e üngei ne tah ngoh, hüpoi numan nying nyingke Youngwanpate phünne phatüoh, hüyange I khümjing te peikei, hanghepa Iye jintepu jingne jaowe shayange ngohnang, hüyange numan mepu I nyamlakpa ne mongshih ngaipu mepu lüppe yetamlak jingne, Youngwanpa numan Kahwang shaoshantüoh.

⁹Hangjingne numan-e Youngwanpa tangte leih yema-a, numan jeiheinaolan hüyange numan hayim phowe teipalan-e imante shüpsheye jonlak, hüyange tüopa kahtokte leih yene tamlak. Hangjingne Youngwanpa numan Kahwang shüpshe hüyange yayeng shüpshe ngoh nang, hüyange numan-e I tangte lüppe yema-a, I sheta numan mepu yelüplak.”

¹⁰Ngaolan pongpalan chingnyu lilite Ephraim hei Manasseh jatlan yikeng pong, hüyange Zebulun jat apyekao ngoiye tai, hüpoi kahtalan-e imante nyitam hüyange yaoleye ngaowe tam.

¹¹Asher, Manasseh, hüyange Zebulun jatlan mepu kahtalan üjingha hei iman nying nyingke innenyaiye Jerusalem te pei.

¹²Ahngpa hüyange ahnghalan-e Youngwanpa ngaowe nyinge tampu kih-e linglak jingne mongjang ja ne menglak imante phalak jingne Kahwang yaklow Judah tang me ngoh yangki.

¹³Kahtalan üngang do yenyütpu an mo molak jingne lekeng ni shepupa me Jerusalem me jem.

¹⁴Hüyange iman-e Jerusalem me toidolak jingne hüyange sünyet jakke dolak jingne jonne ngohpu wümjonglan khongkümpu yahphong hüyange tüolan-a yah teiye Kidron kahjee me win.

¹⁵Hüyange lekeng ni shepupa nyih pen me peli shepupa me iman-e linne taipu mo nyeeha-a toi. Hüyange ngengpalan hüyange Levilan aoyin yejao yeshape ngoh iman yeonge wüotüoh, tüokhei iman nying nyingke jaowesha, hüyange Youngwanpa khümjing te jakke dopu yahpei.

¹⁶Kahwang kahta Mosa ngaokhüm kih-e iman-e yoi yoi toisho me yong: Levilan mepu yahpu iy-a ngengpalan-e wümjongte shaitam.

¹⁷Hangjingne jempulan yo me maapu yo me maapu yoi nying nyingke yejaoyeshape ngoh yangki; tüokhei Levilan-e, yejao yeshape ngohpu kahta lili jingne, hatüo Youngwanpa sheshao me üjaopa ne menge tamlak jingne linne taipu mo nyeeha-a toi.

¹⁸Tüo shaha ne yeje, iman maapu aoyin Ephraim, Manasseh, Issakhar, hüyange Zebulun jatlan mepu pei, iman yejao yeshapu sheyong she ngoh, tüokhei iman-e linne taipu mo hahwante manjao shope hah. Tüokhei Ahngpa Hezekiawe iman jingne hüke yoppu pha:

¹⁹“O Youngwanpa, toman pajeiyonglan Kahwang, iman ngaokhüm me ngohpuke jaowe shayange yengoh yapoi, aoyin mongjang üsheiye nangte yoppe khümnang, tüolan te nang meipu kaiye ümeng winshih.”

²⁰Hezekiawe yoppu te Youngwanpawe jan; Iye kahtalante ümeng win hüyange imante mayah ne yetam.

²¹Hüyange Jerusalem me omme ngohpulan mongmei üyong pu phei do yenyütpu an mo-a nyih nyit nyoi; hüyange Levi hei ngengpalan-e nyih jeih she, iman wong üsheiye Youngwanpa minyong:

²²Hezekiawe Levilan-e Youngwanpa te yoppe khümpu me iman wong üsheiye mongphawe woipu jingne minyong pha. Nyih nyit mongme iman pajeiyonglan Kahwang Youngwanpa te toidopu phayang phei me,

²³iman khongküm puwe üne-o nyih nyit püowe mo molak jingne monge tüm-e sho. Tüokhei hoongli mongong puphei iman mo üne-o nyih nyit nyoi.

²⁴Judah ahngpa Hezekiawe jampune mahu üpong hajaja hüyange nyee haja nyit kahtalan-e toiyange hahlak jingne ngai hüyange ahnghalan-e (üyonglan) üne-o mahu üpong haja ja hüyange nyee haja pen ngai. Hüyange ngengpalan üngang yoi nying nyingke jaowe sha.

²⁵Hüyange Judah mepu jempu khongküm, hüyange Levilan hüyange ngengpalan, Israel mepu jempu khongküm, hüyange Israel kahtok mepu peiye ngohpu yinpalan khongküm mongmei.

²⁶Jerusalem chingnyu me mongmei üyong ngoh yangki, hangjingne Israel ahngpa David üha Solomon hipak mepu hatüo kih-e Jerusalem me jeman nyoi.

²⁷Ngengpalan hüyange Levilan-e kahtalan jingne Youngwanpa mepu moiman yu. Wangdang Inok me Kahwange iman-e yoppu jai hüyange iman-e tongpu yah.