Read Konyak Naga 2 PUTAHPANGAO 31 Bible Online

2 PUTAHPANGAO 31 - Konyak Naga bible

2 PUTAHPANGAO 31

¹Mo mopu khongküm shoyang phei me, omme ngohpu Israel kahtalan khongküm Judah chingnyulan yamme yan, hüyange long shongnyulan khoihnyai-e paiye win hüyange Asherah kahyaklan lange win hüyange ülao kahwanglan hüyange wümjong nyoilan Judah hei Benjamin, Ephraim hei Manasseh üshei yeme iman-e khongkümpu mah mantam mantam menge tam. Tüophei me Israel khongküm yoi chingnyulan, hüyange yoi yoi moth tangte leih ye.

²Hezekiawe ngengpalan hüyange Levilan yoi yoi meitam le, kahta lili yoi yoi toishao tampu, ngengpalan hüyange Levilan, jakke dopu jingne, Youngwanpa ngohjing tafün shong lili me shaoshanlak jingne hüyange mongmei hüyange minyong phalak jingne tam.

³Ahngpawe Iye tam angpu nyee hei mahu ükhong mepu napjeih yah peiye jakke dolak jingne hüyange Sabbath nyih dopu phapalan jingne, lela mo jingne, hüyange Youngwanpa ngaokhüm me ngohpuke ülao motappu wongponglan jingne yinmoklan pha.

⁴Tüotokte, hüke iman-e Youngwanpa ngaokhüm jingne hipak üshei phünne phawe oklak jingne, Jerusalem kahtalante ngengpa hüyange Levilan meitam dopu yah peilak jingne ahngpawe ngao pha.

⁵Ngaophawe yanpu phei jam she Israel kahtalan-e üwangpane lickpu shemeipupa tah, wuwüngti, olive minnga, zahtai jelo, hüyange kah me ngaipu ülao lila khongküm yah pei; hüyange shemin lamphe tepu penphong üngang yahpei.

⁶Hüyange kahta lili aoyin Judah chingnyu me ngoh tüolan-e mahu hei nyee penphong dopu hüyange Youngwanpa iman Kahwangte phünne phawe ngohpu toinan yah pei, hüyange tüolan-a phonge tüoh.

⁷Lekeng lüm shepupa me hünghaolan-a peiye wang hüyange ünepu lekeng peli mongme tüm-e mansho mansho yelakpe pei.

⁸Aope Hezekia hüyange I phang mepulan-e phongyange ngohpuwa nge, iman-e Youngwanpa minyong hüyange iman kahta Israellan min yong.

⁹Hüyange Ahngpawe ngengpalan hüyange Levilan phei shaijem-e ngohpu hünghao lan jingne teingao.

¹⁰Ngengpa ütah Azariah, ao Zadok huhayim mepu ne ngoh, Iye Ite jan-e i, “Iman-e Youngwanpa khümjing te hünghao peiye wangpu mepu toman-e hahyangki, hüyange wangyangki, hüyange üngang towe ngohnang; hangjingne Youngwanpawe yoi kahtalan moiman yangki; tüokhei teman me üngang towe ngohnang.”

¹¹Hüwante ahngpawe imante Youngwanpa khümjing nyoi mongme bung tümlak jingne ngaowe tam, hüyange iman-e linge sho.

¹²Hüyange peipu hünghao hei penphong khongküm yemah yeshulak jingne iman-e tüome ang. Iman-e tüopa tangme yakjongpa ne Konaniah she minpu Levilan hüyange Ite jampa ne Inao Shimei ang.

¹³Imni phang me toi linglak jingne Levilan iman naoshe pen le: Jehiel, Azaziah, Nahath, Asahel, Jerimoth, Jozabad, Eliel, Ismachiah, Mahath, hüyange Benaiah. Tüolan khongkümpuwa Ahngpa Hezekia hei Ngengpa ütah Azariah niye phapu ngaokeng me lingyangki.

¹⁴Hüyange Levilan Imnah üha Kore khümjing heongye peten yompa ütahpa-a Kahwangte peipu hünghao tangme, Youngwanpa jingne yowe angpu dopulan hüyange jaowetam yangpu toinanlan tam-e phalak yakjongpa ne ngoh.

¹⁵Ülao chingnyulan ümeken me ngengpalan ngoh, tüolan nyoi me ülao Levilan-e Ite mongphawe jampulan: Eden, Miniamin, Jeshua, Shemaiah, Amariah, hüyange Sheaniah. Iman-e iman pheipu Levilante hangkihpu; iman toishao ngoh tüophei shuwe hahying ja kih-e tam,

¹⁶hüyange puhu meitam me yeje; iman-e wangpeng delüm ngoipu yejema-a tüo tok tepu iman yafün phei shuwe aoyinne nyih jeih she khümjing me shaoshan iman meitam pha.

¹⁷Ngengpalan min nyan-e toitampuwa iman puhulan yekao me; hüyange Levilan-a wangpeng da hüyange tüotok tepu yoi yoi toishao kih-e ükhong ükhong tampu ngohyangki.

¹⁸Ngengpalan-a iman shekonyulan, hayimlan, hüyange noksa kahtalan khongkümpu jam-e min nyan; hangjingne ima-a iman-e üjao toishao linglak jingne aope sholakei tümyange ngohlak ne ngaipu jingne.

¹⁹Ngengpalan yo me aoyin chingnyulan me nyoi tüolan-a Aaron huhayimlante tam, tüolan chingnyulan jing hahnyoi kahtok me yakjong pu kahtalan aoyinne ngengpa noksalan mepu netanlan khongküm pute hahying tam-e pha, hüyange aoyin Levi puhulan min nyanpu me ngoh tüolan lilite tam-e phapu ngoh yangki.

²⁰Judah kahtok khongkümpu me, ahngpa Hezekiawe Youngwanpa I Kahwang sheshao me hanghe shemeipupa hüyange ütingpa hüyange mong hümpu ngoh tüopa lingyangki.

²¹Hüyange Kahwang nok toishao me I woipu toishao lili, ngaokhüm hüyange lingne tampu kih-e, hüyange I Kahwang yampu me, Iye jonpu toishao lili mongjang khongküm puwe toiling hüyange moimantam.