Read Konyak Naga 2 PUTAHPANGAO 32 Bible Online

2 PUTAHPANGAO 32 - Konyak Naga bible

2 PUTAHPANGAO 32

¹Tüolan toishao hüyange ütinglakpu phei Hezekia ahngpawe Youngwanpa shaoshan yang phei me Assyria ahngpa Sennacherib peiye Judah chinghah. Hüyange Iye yoi jingne om yahlak she teihyange chingtuk pepeyangpu chingnyulan phei tüi-e nyoijing linge tan.

²Aope Hezekiawe Sennacherib peiye Jerusalem phei tüi-e hoklak jingne ngohnang she nge ok,

³Iye chingnyu ütokye me yengnung ngohpu yeng-a lakne tamlak jingne iman woipalan hüyange naomeilan phei teingao; hüyange iman-e Ite jam.

⁴Hüyange kahta üngang jem, hüyange iman-e yengnung lili hüyange kahmük kaiye yünpu yengyinlan lak ne tamyange i, “Hangne Assyria ahngpalan peiye yeng wangman-e tüolak shi?”

⁵Ahngpawe chingnyuwa shemongshe linge wongnange tamlak jingne menge ngohpu jantpe khongküm linge ye, hüyange tüopa tang me daonok paowe we, hüyange tüopa ütang ye me jan ülao linge pao; hüyange David chingnyu me Iye Millo wongnang ne tam. Iye üne-o ngoulow hei yanglow hüyange ree wangman-e ling.

⁶Iye chingnyu mepu kahtalan khongküm nyahpong naomei ütahlan phang me peine tam hüyange chingnyu peten üko me I tangte khongküm jem ne tam. Hüyange imante hengetam-e hüke ngao;

⁷“Wong nangyah hüyange monghümyah, hüyange Assyria ahngpate tahnyam yejema-a Iye woipu nyahponglante tahnyam. I yekao me Iphei ngohpu phei-a teman phei teman yekao me wong sheyong she ngohnang.

⁸Ime iy hei mei yonglah hei ngohnang, hüpoi teman phei teman Kahwang Youngwanpa temante jamlak jingne hüyange teman shapju hoklak jingne ngohnang.” Hezekia ahngpa ngaowe kahtalan iman monghüm ne tam.

⁹Hipak ütenja ngohyang phei me, aope Sennacherib hüyange I nyahponglan-e Lachish omyange ngoh, Iye tüolan ngaolan phei ahngpa Hezekia hüyange Judah kahtalan aoyin I phei Jerusalem me ngohyapeih tüolan tangte shon.

¹⁰“Tao, Assyria ahngpa Sennacherib-e tongnang, ‘Jerusalem chinghahpu nün okke tan-e ngohlak üne numan-e hanghe me monghümpu shi?

¹¹Assyria ahngpa yak mepu “Teman Youngwanpa Kahwange teman yintam phalak” she ngaowe, seanyao yengleye li tamlak ne Hezekiawe numan lowelamnang!

¹²Hatüo Hezekiawe muh, “Numan-e wümjong ja me khümlak, hüyange tüopa tangme numan-e, sünyet jaklak” she Judah hei Jerusalem te ngao phawe ülao kahwanglan hüyange I jing wümjonglan yah teipu yeje a?

¹³Ülao jat hei li kahtalan khongkümpute tao hüyange ü-pajeiyonglan-e hanghe ling numan-e yeshingpu a? Kahmük me jatlan kahwanglan-e ü-yak mepu iman kahtok yinne okke ngohyangpu a?

¹⁴Aope, tüolan jat hei li kahwanglan mepu aohipawe toman yak mepu iman kahtok yin ei? Hüma-a numante hangheye numan Kahwange numan yin ei ja she linge tampu?

¹⁵Sha-a tüokhei Hezekiawe numan lowelamne tahtam, yejema-a hükih-e numan tahyoh tam, yejema-a numan-e Ite üting tahlak; hangjingne ao jat Kahwange-o yejema-a ahngchinge-o ü-yak mepu, hüyange ü-pajeiyonglan yak mepu yoi kahtalan yinlak jingne ye-okpe ngohyangki; numan Kahwang jang jang hanghe! Ü-yak mepu numan yintampu ye-oklak!’ ”

¹⁶Assyria üyonglan-e tüophei shemeng she Youngwanpa Kahwang hüyange Hezekia, Youngwanpa shaoshanpa phei tüi-e ngao yangki.

¹⁷Üne-o Iye Israel Kahwang Youngwanpa phoiwüm-e tamlak jingne nyanpu lai ja nyan-e i, “Jatlan kahwanglan-e iman yoi kahtalan ü-yak mepu yeyintam okpu kih-e, hüke muh Hezekia Kahwange yoi kahtalan ü-yak mepu yeyin oklak.”

¹⁸Hüyange iman-e yeonge shihkhah-e, hüyange iman shaoshi tamlak jingne iman-e ngao üyong ngaiye Hebrew ngao me jantpe tangme ngohpu Jerusalemlante Assyria woipalan-e chingnyu-a yahlak jingne üngwün.

¹⁹Hüyange iman-e Jerusalem Kahwang jeng, kahtoknyu Kahwanglan kih-e, kahtawe yakke lingpu toishaoja ne menge ngao.

²⁰Hüwante Hezekia ahngpa, hüyange Amos üha Isaia-e tüopa jingne yop hüyange Kahwangte jampha she üngwün.

²¹Hüyange Youngwanpawe wangdang shongmokpa ja shon, Iye Assyria naomeilan hüyange nyahpong woipalan khongkümpu toi. Tüokhei ahngpa-a yoi kahtokte wüokhüw yange ye mah. Hüyange aope I yoi kahwang nokte ong, yoi halan ütam-e tüome yanglow-e I-o toi.

²²Tüo kih-e Assyria ahngpa Sennacherib yak mepu hüyange ülao wepalan yak üshei mepu, Youngwanpawe Hezekia hüyange Jerusalem kahtalan yintam: hüyange yupi chingshüm jat hei lilan üshei phei chingmei me ngoh.

²³Kahtalan maawe Youngwanpa te dopu yah-e hüyange Hezekia ahngpate hünghao yahyange Jerusalemte pei; tüohipak me peiye jatlan üshei ye me Hezekia minyong ngampai pu ngai.

²⁴Tüolan nyih hipak me Hezekia lilak ne dak ngai: hüyange Iye Youngwanpate yop, hüyange Iye I phei ngao, hüyange Ite füo ja pha.

²⁵Hüpoi Hezekiawe Ite küw phapu kih-e tüote shüm-e yepu yeling; hangjingne I mongjang me otapu ngoh. Tüokhei I tangme hüyange Judah hei Jerusalem tangme mongshih pu pei.

²⁶Hüpoi üküm ne Hezekia hüyange Jerusalem me ngohpulan iman otapu mongjang innenyaiye pei. Tüokhei Hezekia nyih hipak mongma-a Kahwang mongshih ngaipu iman tangte yepei.

²⁷Hezekia me toinyunanha üngang hüyange minyong ngampai üyongpu ngoh. Hüyange Iye tüolan anglak khüm jingne, hon jingne, toinyu long jingne, hüyange üpe meipu jingne, ree jingne, hüyange tük-heilak toinyulan anglak jingne bung we.

²⁸Tüophei paowe Iye tah, wuwüngti, hüyange olive minnga jingne bung we; hüyange tampu yinmok ülam lili hüyange nyee ükhong jingne ükhok wetam.

²⁹Hüke yoi jingne chingnyulan hüyange nyee ükhong hüyange mahu ükhong jingne üngang weye ling; hangjingne Kahwange Ite moth üngang pha.

³⁰Ahngpa Hezekia Iye muh Gihon yeng ütokye tientam, hüyange yeng-a David chingnyu henyip yekao me tingkhakke yenglam shaowe taiye pei. Hezekia Iye lingpu üshei me okpu nge.

³¹Tüoyangpoi Babilon ahngpa lampulan aoyin I tangte kahmük me kahnyingwüngha lingpu jeng teitonglak jingne shon, Kahwange I mongjang me hanghe ngoh khongkümpu shinglak hüyange toklak jingne hüke tüoh.

³²Sha-a Hezekia toishaolan, hüyange Iye lingpu toimeilan, leihuyah, tüolan-a Judah hüyange Israel ahngpalan laitep me, Amoz üha Isaia hipa Himang me nyanyange ngohnang.

³³Hezekia li hüyange ngeng-ahnglan mangkoksa ütokpa leng me muwe tam. I liwante Judah hüyange Jerusalem kahtalan khongkümpuwe yeonge yihnoonne langhoon. Iha Manasseh I nanleiye ahngne meng.