Read Konyak Naga 2 PUTAHPANGAO 33 Bible Online

2 PUTAHPANGAO 33 - Konyak Naga bible

2 PUTAHPANGAO 33

¹Manasseh ahngne mengwante I nyupuh wangpeng pen me ni me ngoh yangki; hüyange Iye Jerusalem me wangpeng denga phei me nga wanglam lam.

²Israel jatlan sheshao mepu Youngwanpawe jange teipu nunushepu jatlan toishao kih-e hanghe Youngwanpa sheshao me yemei hatüo Iye ling.

³Iye Ipa Hezekiawe menge winyangpu ülao kahwanglan ni she linge ye; hüyange Baal jingne Iye wümjonglan ling; hüyange Asherah kahyaklan ling, hüyange wangdang shanhalan te yoppe khüm, hüyange iman shaoshan.

⁴Jerusalem me ü-min jintepu jingne ngohlak she, Youngwanpawe iye angpu Youngwanpa khümjing me Iye ülao kahwanglan wümjong ling.

⁵Hüyange Youngwanpa nok longkon mong moini me Iye wangdang shanhalan te khümlak jingne wümjong ling.

⁶Iye Hinnom kahjee me yoi hayimlan jakke dopu pha. Iye phongyeng phonglai hitte tokke lei, hüyange hipalan yam-e itte shempalan te üpong yam. Iye Youngwanpa phei tüi-e yeonge yonge ünu om hüyange I mongshih loonge ngaine tam.

⁷Khümjing me Iye lingpu kahyak ang, hanghepa nyoi jingne Kahwange David hüyange I ha Solomon te hüke i: “Hatüo Jerusalem me, tüopa khümjing me, Israel nokphong pen me ni wankam mepu üte yoppe khümlak nyoi jingne Taowe leyangki.

⁸Hüyange Israel kahtalan-e ü-ngaokhümlan khongkümpu jaiye jonma-a, hüyange ü-shaoshanpa Mosa-e phapu ngaokhümlan angma-a, Taowe iman pajeiyonglan te phayangpu kahmük mepu iman jange teine yetamlak.”

⁹Hüpoi I kahtalan shaoyete kemwante ünu ompu nanjingne Youngwanpawe iman kahtok mepu jange teiyangpu kahtalan phei shemeng she Manasseh-e Judah hüyange Jerusalem kahtalan te ünu omne tam.

¹⁰Youngwanpawe Manasseh hüyange I kahtalante deingao phayapoi, iman-e yejai.

¹¹Tüokhei Youngwanpawe Assyria nyahpong woipalante Judah chinghah ne tam. Iman-e Manasseh pho, yankeih Ite kinne tam, yankeilei phei Ite sha, hüyange Babilon te yahtei.

¹²Hüke aope I shanghah shaoshipu me ngoh, Iye Youngwanpa I Kahwang yam-e monglüp hüyange Ipa Kahwang sheshao me yeonge innenyaiye ye.

¹³Iye Kahwangte yop, hüyange Kahwange Iye yoppe tongpu yah hüyange Iye yoppu jai; hüyange nishe I ahngching Jerusalem te woi yenetam. Hüwante nakshih Manasseh-e Youngwanpa Kahwang she shing.

¹⁴Tüophei me Manassehwe Gihon yengjee me ükong wange apyekao me nyah Taten hüyange Ophel she nyikpu chingnyu mepu nyoijinglan ngoiye hüyange David chingnyu heong yekao ü-atye jantpe daowe ling. Iye üne-o chingtuk pepeyangpu Judah chingnyulan me woipa japong phangme nyahponglan angne tam.

¹⁵Hüyange Youngwanpa khümjing mepu Iye lingpu ülao jat kahwanglan hüyange kahyaklan-a yahtei, hüyange Jerusalem hüyange Youngwanpa nok kahtanglan me Iye lingpu wümjonglan khongkümpu, Iye chingnyu ünahye me tüolan-a win.

¹⁶Iye üne-o Youngwanpa wümjong linge ye hüyange tüopa tangme chingmei dopu hüyange minyong phapu toido, hüyange Iye Judah te Youngwanpa Israel Kahwang shaoshanlak jingne ngao pha.

¹⁷Tüoyangpoi kahtalan-e üne-o kahtanglan me dopu pha, hüpoi tüowa Youngwanpa iman Kahwangte phayangki.

¹⁸Sha-a towe ngohpu Manasseh toishaolan, hüyange Kahwangte Iye yoppu, hüyange Youngwanpa Israel Kahwang min me I phei hipalan-e ngaopu ngaolan, leihuyah, tüolan-a Israel ahngpalan putahpangao me nyanyange ngoh nang.

¹⁹Hüyange Iye yoppu hüyange hangke Kahwange iye yoppe tongpu yah, hüyange Iye lingpu ünu toi hüyange I monghümpu; hüyange I nying nyingke inne nyaiye manpei wante Iye ülao kahwanglan wümjong lingpu; Asherah hüyange kahyaklan angpu; leihuyah, tüolan khongküm hipalan pungao me nyanyange ngohnang.

²⁰Manasseh li hüyange iman-e ahngnok me I mu, hüyange I ha Amon-e I nanleiye ahngne meng.

²¹Judah tangme Amon ahngne mengwante I nyupuh wangpeng da me ni ngoh yangki, hüyange Iye Jerusalem me wangpeng ni wanglam lam.

²²Ipa Manasseh kih-e Youngwanpa sheshao me hanghe yeshu hatüo Iye ling. Ipa Manasseh-e lingpu kahyaklan khongkümpute dopu pha, hüyange iman shaoshan.

²³Hüpoi Ipa Manasseh yoi nying nyingke innenyaipu kih-e Iye Youngwanpa sheshao me I nying nyingke innenyaiye üye, hüleima Amon-e ünyei ünyei ünu paowe om.

²⁴Amon shaoshanpalan-e I phei tüi-e kon meng kon, hüyange ahngnok me I toi.

²⁵Hüpoi Judah kahtalan-e aoyinne Amon ahngpa toilak jingne kon meng kon, tüolan khongkümpu toi. Hüyange ükhonge Iha Josiah I nanleiye ahngne menge tam.