Read Konyak Naga 2 PUTAHPANGAO 34 Bible Online

2 PUTAHPANGAO 34 - Konyak Naga bible

2 PUTAHPANGAO 34

¹Josiah ahngne menge ükong wangwante I nyupuh wangpeng tet ngoh yangki; hüyange Iye Jerusalem me wangpeng delüm phei me ja wanglam lam.

²Youngwanpa sheshao me hanghe ütingpa ne ngoh Iye ling; hüyange Kahwang ngaokhüm khakshuwe jon-e I yoi pajeiyong David ahngpa lamnyu me tingkhakke kem.

³Josiah I ahngne meng phei me wangpeng tet shepupa me, I üne-o naha ne muh ngohwante, Iye I pajeiyong David Kahwang yamne wang; hüyange wangpeng pen me ni shepupa me Judah hüyange Jerusalem mepu ülao kahwanglan Asherah hüyange kahyaklan menge khoi-e jakke winlak jingne Iye wang.

⁴Iye hüowe tampuke I kahtalan-e Baal wümjonglan meng, hüyange tüopa tangme yonge ngohpu sünyet jakke dopu nyoi lange win; hüyange iman-e Asherah hüyange howe shokke lingpu kahyaklan-a Iye khoihnyaiye paiye tam; hüyange tüolan-a kahmak ne menge tam hüyange aoyinne tüolan te dopu pha iman mangjong tangme hatüo phuwe tam.

⁵Iye ülao kahwang ngengpalan waan iman-e khümpu wümjong tangme jakke tam. Hüke lingpu kaiye Iye üne-o Judah hüyange Jerusalem jaowe tam yangki.

⁶Hüyange Manasseh, Ephraim, hüyange Simeon, chingnyulan me, Naphtali ngoiye taiye, hüke muh menge tam.

⁷Apyekao ahngching kahmük me Iye wümjonglan hüyange Asherah peshaolan menge win, kahyaklan-a nihphung ne khoihtam, hüyange sünyet jakpu wümjonglan üsho-üno ne linge tam. Tüophei me I Jerusalem te leih ye.

⁸Sha-a I ahngne menge wanglam lampu wangpeng pen me tet shepupa me Iye kahmük hüyange khümjing jaowe shayang phei me, Azaliah üha Shaphan, Jerusalem governor Maaseiah, pungao nyanpa Joahaz üha Joah, Youngwanpa I Kahwang khümjing linge yelak jingne Josiah ahngpawe shon.

⁹Khümjing yompa Levilan-e shaipu ngin-a ütahpa ngengpa Hilkiah te iman-e phünne pha. Hatüo ngin-a Ephraim hei Manasseh kahtalan mepu hüyange apyekao ahngching ülaolan mepu, hüyange Judah, Benjamin, hüyange Jerusalem kahtalan mepu shaiyangki.

¹⁰Tüopa ngin-a üne-o khümjing linge yelakte nokpu ne mengpu kahta lüm yakte pha, hüyange iman-e tüolan-a,

¹¹pewetpalante, long shaklak jingne wepalante, hüyange Judah ahngpawe heam ne tampu nok linge yelak pe-khüwlan shaklak jingne pha.

¹²Toi lingpu kahtalan-e yeonge ngaoting iye mongpha toiling. Iman-e toi lingpu te Levilan naoshe peliye leiyangki: Merari puhu mepu Jahath hüyange Obadia, hüyange Kohath puhu mepu Zekharia hüyange Meshullam. (Levilan iman khongküm wong nange hem lokke okpalan ne ngohyangki.)

¹³Ülao Levilan-a toinan sheihpute hüyange ülam maapu toilingpalan te yak jongpa ne ngoh, hüyange ülaolan-e yak nyanpu toishao yejema-a yompalan-ne shaoshan yangki.

¹⁴Aope Youngwanpa khümjing ngin angpu nyoi mepu ngin okke ngaiyapeih, Mosate Kahwange phapu, Youngwanpa Ngaokhüm Laitep Hilkiah ngengpawe tüo.

¹⁵Hüwante Hilkiahwe yaknyanpa Shaphante i, “Youngwanpa nok me taowe Ngaokhüm Laitep tüoteki.” Hüyange Hilkiahwe Laitep-a Shaphante pha.

¹⁶Shaphan-e laitep-a ahngpa tangte yah pei, hüyange üne-o ahngpate hüke ngaolan phawe i, “Nang shaoshanpalante nying tampu khongkümpu iman-e lingnang.

¹⁷Youngwanpa khümjing me tüopu ngin khongküm iman-e yah ngaiteki hüyange hatüo yak jongpalan hüyange toilingpalante phateki.”

¹⁸Tüophei me Iye püowe i, “Hatüo me ngengpa Hilkiahwe phapu laitep ja ü-yak me ngoh nang.” Hüyange Shaphan-e hatüo ahngpa sheshao me wünne Iye hüo.

¹⁹Aope ahngpawe laitep mepu ipu jai, Iye yoi inkhek hit,

²⁰hüyange Hilkiahte, Shaphan üha Ahikam te, Micaiah üha Abdon te, yaknyanpa Shaphan te, hüyange ahng gho yompa Asaiah te tüolan ngao phawe i:

²¹“Taitüoh hüyange Youngwanpate üjingne hüyange Israel hei Judah me towe ngohpulan jingne, tüopa laitep me nyüowe tampu yamtüoh. Hangjingne temante Youngwanpa mongshih ngaipu shokke tampu üyong ngoh nang; hangjingne tüopa laitep me nyan-e ngohpuke linglak jingne teman pajeiyonglan-e Youngwanpa ngao yejon.”

²²Ahngpawe phapu ngao me, Hilkiah hüyange ülaolan Jerusalem üla ne ngaipu nyoi me nyoipu Huldah she minpu hinyu tangte tonglak jingne tai. (Yha netanpa Shallum-a, Harhas ühu, Tikvah üha khümjing ngeng-ahng nyemo tepu yak jongpa ne ngoh yangki.) Iman-e yhate hanghe ngai tüopa jeng ngaolan pha;

²³hüyange yhawe imante ahngpa tangte leih yelak jingne, hüyange

²⁴Ite tüolan ngaolan Youngwanpa mepu phalak jingne i, Ahngpa sheshao me iye hüopu laitep me nyan-e ngohpu phoiwümpulan-e Jerusalem hüyange tüome ngohpu kahta lili te Taowe shaoshi tamlak.

²⁵Hangjingne iman-e Tao winne tüoh hüyange iman yakke lingpu khongkümpuwe Tao mongshih ngai tamlak jingne, iman-e ülao kahwanglan te sünyet jakke doyangki; tüokhei ü-mongshih ngaipu Jerusalem tangme küppe tamlak hüyange hatüowa mei yemahlak.

²⁶Hüpoi Judah ahngpa aowe Youngwanpate tonglak jingne numan shon, hüke numan-e Ite itüoh; hüke Israel Kahwang Youngwanpawe inang: “Nange jaipu ngaolan jeng-a,

²⁷nang mongjang lüpyange ngohtepuwe hüyange tüopa kahmük hüyange tüolan kahta jeng yemeipe jaiwante nange Kahwang sheshao me inne nyaipu jingne, hüyange nange ü-sheshao me innenyaiye pei, hüyange nang inkhek hit hüyange ü-sheshao me shappu jingne, Taowe-o nangte jaiteki she, Youngwanpa inang:

²⁸Leihuyah, Taowe nang yoi payimlan tangte chingmei me peine tamlak, hüyange ümengpa, hanghe Taowe tüopa kahmük hüyange tüome ngohpu kahtalan tangte yahpeilak ne ngoh hatüo nang mük-e ye-ngelak.” Hüyange kahtalan-e Ahngpa Josiah tangte ngaolan yah ye.

²⁹Ahngpa Josiahwe Judah hüyange Jerusalem woipalan khongkümpu te nyik;

³⁰hüyange ahngpawe Judah kahtalan hüyange Jerusalem me ngohpu khongküm ngengpalan hüyange Levilan, kahtalan üjoi üyong khongküm woiyange Youngwanpa nokte ong; hüyange kahta liliye jaiye jiengjeppu laitep ngaolan hanghepa Youngwanpa nok me tüo hatüo Iye i.

³¹Hüyange ahngpawe yoi ahngnyoi me yong hüyange Youngwanpa pheite kemlak hüyange I nyanpu ngaokhümlan jonlak hüyange I sakilan hüyange I linglak ngaokhümlan I mongjang hüyange I yaha üsheiye, tüopa laitep me nyan-e ngohpu jiengjeppu linglak Youngwanpa sheshao me jiengjeppu yah.

³²Hüwante Iye Benjamin kahtalante hüyange Jerusalem me omme ngohpu kahta lilite tüopa me janpu yah ne tam. Tüokhei Jerusalem me ngohpalan-e Youngwanpa iman pajeiyonglan Kahwang jiengjeppu kih-e ling.

³³Ahngpa Josiahwe Israel kahtalan jing kahmük üshei yemepu nunushepu khongküm yah teitam, hüyange Israel me ngohpu khongkümpute Youngwanpa iman Kahwang shaoshan ne tam. I nyih hipak üshei me iman-e Youngwanpa iman pajeiyonglan Kahwang mepu leih üyepe woi.