Read Konyak Naga 2 PUTAHPANGAO 36 Bible Online

2 PUTAHPANGAO 36 - Konyak Naga bible

2 PUTAHPANGAO 36

¹Judah kahtalan-e Josiah üha Joahaz le hüyange Jerusalem ahngpa ne Ite minnga phowe tam.

²Joahaz Judah tangme ahngne mengwante I nyupuh wangpeng da me lüm ngoh yangki, hüyange Iye Jerusalem me lekeng lüm ahngne meng.

³Egypt ahngpa Necowe I phowe tei hüyange Judah te khüm kilogram haja lüm gho peli hüyange hon kilogram delüm phei me peli poonne yu.

⁴Necowe Joahaz ünao Eliakim Judah ahngne menge tam hüyange I min Jehoiakim she jeileiye tam. Joahaz-a Necowe Egypt te yah tei.

⁵Jehoiakim ahngne menge wangwante I nyupuh wangpeng da me nga ngoh; hüyange Iye Jerusalem me wangpeng pen me ja wanglam lam. Hüyange Iye Youngwanpa I Kahwang sheshao me ünu ling.

⁶Babilon ahngpa Nebuchadnezzarwe Judah chinghah, Jehoiakim pho, hüyange yanne shayange Babilon te yah tei.

⁷Nebuchadnezzarwe Youngwanpa nok mepu wan hei shenglan Babilonte yah tei, hüyange tüolan-a I yoi ahngnok me ang.

⁸Sha-a Jehoiakim toishaolan towe ngohpulan-a, hüyange Iye lingpu nunushepulan-a, hüyange hangheyin-e Ite tahtüo, leihyah, tüolan-a Israel hüyange Judah ahngpalan laitep me nyanyange ngoh nang. Hüyange Iha Jehoiachin-e I nanlei ahngne meng.

⁹Jehoiachin I ahngne menge wangwante nyupuh wangpeng pen me tet ngoh yangki; hüyange Iye Jerusalem me lekeng lüm nyih pen wanglam lam, hüyange Youngwanpa sheshao me hanghe yemei hatüo Iye ling.

¹⁰Aope lümlei ngoiyapeih, Ahngpa Nebuchadnezzar peiye Jehoiachin pho hüyange Babilonte yahtei, hüyange khümjing toinyunanha yahtai. Tüophei me Nebuchadnezzarwe Jehoiachin Ipajoi Zedekiah Judah hei Jerusalem tangme ahngne menge tam.

¹¹Zedekiah ahngne menge wangwante I nyupuh wangpeng da me ja ngoh yangki; hüyange Iye Jerusalem me wangpeng pen me ja ahngne meng.

¹²Iye Youngwanpa phei tüi-e ünu om hüyange hipa Jeremia, aowe Youngwanpa ngao ngaowe tam tüopate mong phawe yejai.

¹³Zedekiahwe, Nebuchadnezzar aowe Ite Kahwang min me jiengjep ne tam, I phei tüi-e yong. Hüyange üne-o Youngwanpa Israel Kahwang phei tüi-e I ngeingat hüyange I mongjang wanne mah.

¹⁴Tüotokte üne-o Judah woipalan, ngengpalan, hüyange kahta liliye hüke jamloi mong yephape, neikon-e ngohpu jatlan nunushepu toishao pheite woiye ngohyangki; hüyange Youngwanpa nok hanghepa Youngwanpa Iye Jerusalem me jaowe ang hatüo iman-e nune tam.

¹⁵Youngwanpa, iman pajeiyonglan Kahwange kahtalante yelakpe deingao phalak jingne hipalan shon, hangjingne ima-a Iye iman hüyange khümjing yinhuwe teih.

¹⁶Hüpoi Youngwanpa mongshih ngaipu iman tangme manngai manngai, meilakne üjepe manngai manngai she iman-e Kahwang ngaolan kipalan yaowele tam, hüyange I ngaolante phoiwüm, hüyange I hipalante wümnao.

¹⁷Tüokhei Youngwanpawe iman tangme Babilon ahngpa woipei, Iye iman naoshelan iman üjao nyoi nok me yanglow-e toi, hüyange naoshe jeyah naoyha jeyah, sheko jeyah netan jeyah, dakpa ne jeyah yejema-a bumeipane jeyah ao te-o shüpshe yenangpe, Kahwange iman khongkümpu I yak me pha.

¹⁸Hüyange Babilon ahngpawe Kahwang nok mepu wanhei sheng khongküm, üjoi hei üyong, hüyange Youngwanpa nok mepu toinyu nanha, hüyange ahngnok toinyunanha, hüyange I shaoshanpalan jing toinyu nanha, tüolan khongküm pomme yah hüyange Iye Babilon te yah ye.

¹⁹Iye khümjing hüyange chingnyu, hüyange tüome ngohpu ahngnok hüyange toinyu nanha khongküm jakke win, hüyange chingnyu jantpe menge win.

²⁰Hüyange aoyin yanglow mepu yinne okyangki Iye Babilon te yahtei; hüyange Persia ahngching wanglam lampu manngoi manngoi iman I hüyange I hayim rha ne menge ngoh yangki.

²¹Hüyange tüokhei hipa Jeremia kaiye Youngwanpawe hanghe ngaoyangki hatüo ütahte ngai. “Sabbath toloimeipu yeyahpe peiyangpu nan shümlak jingne wangpeng denyit jingne kahmük-a wüngmakke tüohlak.”

²²Sha-a Persia Ahngpa Cyrus üwangpa wangpeng me, Jeremia ju kaiye Youngwanpa ngao ütahte ngailak jingne, Youngwanpawe Persia ahngpa Cyrus yahate hengetam, tüokhei I ahngching üshei me hüyange üshei yete Iye ngaoyan hüyange nyan-e tam

²³“Hatüowa Persia ahngpa Cyrus ngaolan, Youngwanpa, wangdang Kahwange üte kahtoknyu nopute wanglam lampa ne menge tam; hüyange Judah mepu Jerusalem me I jingne khümjing ja welak üte wong phayangki. Sha-a, numan khongküm aoyin Kahwang kahtalan ne ngoh nang, tüoyete yetüoh, hüyange numan Kahwang phei ngoh shih.”