Read Konyak Naga 2 PUTAHPANGAO 4 Bible Online

2 PUTAHPANGAO 4 - Konyak Naga bible

2 PUTAHPANGAO 4

¹Iye shakphan yan phei wümjong ja ling, üjükte yakkong da, hüyange üpeam te yakkong da, hüyange daowe ongpute yakkong pen.

²Üne-o Iye neikonne shakphan yan yengkook linge ngai hüyange hatüowa tüngkü-nyeiye ngoh yangki, jaye üju mepu jaye üju ngoipute yakkong pen, hüyange daowe ongpute yakkong nga, neikonpu longte yakkong delüm.

³Yengkook neikonpu üjeng ünahpong neikonne ja tangme ja yongyange üleng ni shinne o lingyange ngoh. Tüolan o ne tümpu-a mahu üpong lepu me lingyange, hüyange hatüowa yengkook phei jam-e khongkümpu üjep ja ne howe lingyange ngoh yangki.

⁴Hatüowa mahu üpong pen me ni tang me yong, lüm-a apyekaote meyange, lüm-a henyip yekaote meyange, lüm-a heyekaote meyange, hüyange lüm-a heonge yekaote meyange, hüyange yengkook-a iman tang me lingyange ütang yeme, hüyange iman koongtoi ye-a ümong ye me she ngoh yangki.

⁵Hüyange yengkook üjuwa ya-oong shinne jeiye ngoh; hüyange tüopa üjuwa wan üju kih-e lingyange, shengshap jupeng leye lingyange ngoh. Tüopa yengkook me taksheng haja dewok nanjing nyippe ngoh yangki.

⁶Iman-e üne-o yankhong pen ling, hüyange nga-a khümjing heyekao me, hüyange nga-a apyekao me she tüopa me tuh pholak jingne ling; jakke dopu tepu toinan iman tüopa me poiye tam; hüpoi yengkook-a ngengpalan-e tuhpholak jingne ngoh yangki.

⁷Iye hon phei vüntük yongjing pen üshongpu kih-e ling, hüyange tüolan-a khümjing me ang, nga-a heyekao me hüyange nga-a apyekao me.

⁸Iye üne-o khao pen ling, hüyange tüolan-a khümjing me ang; nga-a heyekao me, hüyange nga-a apyekao me, hüyange iman-e hon yankhong gho ja ling.

⁹Üne-o Iye ngengpalan jingne ümongpa gho nyoi, hüyange üne-o nokshao ye ghonyoi ling. Hüyange tüolan gho nyoi taten taküp-a shakphan yan shaha phei ling.

¹⁰Iye tüopa yengkook-a khümjing heongye ünuk pong me angyangki.

¹¹Hüyange Huram-e tüklan, kahhoklak lan, hüyange yankhonglan ling. Iye ahngpa Solomon te Kahwang khümjing jingne lingpha ning she janpu toinan khongkümpu Iye linge sho:

¹²Shongnyu ni Shongju tangme yankhong kihpu jongwang ni, jongwang moini me hawpu kih-e lingyang phei, yankeilei,

¹³Shakphan yan phei lingpu chamuk gho peli, jongwang tangme üleng nipong ne lingyange,

¹⁴Tongtoi hüyange Yankhong pen

¹⁵Yengkook Mahu üpong pen me ni yengkookte shienge yongyange;

¹⁶Tüklan, kahhoklaklan, hüyange tüpshanlan. Huram-Abi manneyangpa hüyange aijonpawe ahngpa Solomon-e Youngwanpa khümjing me jonlak jingne ngaowe tampuke tüolan toinan khongkümpu phihlangpu shakphan yan phei ling.

¹⁷Ahngpawe tüolan khongkümpu linge yahpuwa Jordan kahjee mepu Succoth hei Zeredah nipa me kümp kahtok me sheamme ling.

¹⁸Solomon-e teshinpu toinan üngang linge ngai, tüokhei aowe-o shakphan yan tokke heipu yeyam ok.

¹⁹Tüokhei Ahngpa Solomon-e Youngwanpa nok me ngohpu toinan khongkümpu ling; honne lingpu wümjong, khümjing me angpu an jingne khaolan,

²⁰vüntük yongjing hüyange wanglam me ngohpuke Shejaopupa nyoi me jaklak hon shaha phei lingpu vüntüklan,

²¹jupenglan, vüntüklan, hüyange jeplaklan, shejaopupa hon shaha phei lingpu;

²²vüntük jeplak, yankhong, muktük, hüyange vünhan hoklaklan. Tüolan toinan khongkümpu jaoshepu honne ling. Khümjing tepu nokshao ye taküplan hüyange Shejaopupa ümongpa nyoi tepu taküplan-a hon shaha phei shokkeling.