Read Konyak Naga 2 PUTAHPANGAO 5 Bible Online

2 PUTAHPANGAO 5 - Konyak Naga bible

2 PUTAHPANGAO 5

¹Hüke Youngwanpa nok jingne toishao khongküm Solomon-e lingpu sho; hüyange Solomon-e Ipa David-e jaowe shayange angpu toinanlan shaijem, hüyange khüm, hon hüyange Kahwang nok tepu tük-hei-sheng khongküm shaijem-e khümjing toinan angjing me ang.

²Tüophei me Ahngpa Solomon-e David chingnyu; hanghepa Zion ngohnang, tüopa mepu Youngwanpa jiengjeppu ghonu yah-e inlak jingne Israel woipalan hüyange nokphong tepu üshanglan, khongküm jemne tam.

³Hüyange Israellan khongküm lekeng nyit shepupa me ngohpu mo hipak me ahngpa sheshao me jem.

⁴Aope woipalan khongkümpu jem, hüwante Levilan-e jiengjeppu ghonu nowe yah

⁵hüyange khümjing te yah pei. Ngengpalan hüyange Levilan-e üne-o Youngwanpa nyenok hüyange tüopatepu toinan khongkümpu khümjingte pei.

⁶Hüyange Solomon ahngpa hüyange Israel woipalan khongkümpu jiengjeppu ghonu sheshao me jem hüyange nyee hei mahu toidopu ipu ye-okpe pha.

⁷Tüophei me ngengpalan-e Youngwanpa jiengjeppu ghonuwa tüopa ngohpu nyoi, nok ümong shejaopupa nyoi, cherubim yangteng phangte yah pei.

⁸Hangjingne cherubim-e iman yangtenga ghonu ütangye me saayange, tüokaiye ghonu hei sheam ni tang me cherubim-e yüoh yange ling.

⁹Hüyange sheamlan-a yeonge laopu jingne sheam üjenga khümjing ümongpa mepu shejaopupa nyoi me ngeye ngoh yangki, hüpoi tüolan-a ülao nyoi yin me ngene ye-ok; tenyih ngoiye tüolan-a tüome ngohnang.

¹⁰Ghonu me longsheng ni hanghepa Mosawe Sinai kahtang me hin, tüo tokte kaiye hango yenangpe ngoh; tüome Youngwanpawe Israellan phei Egypt mepu ngaiwante jiengjeppu ja ling.

¹¹Sha-a aope ngengpalan üjaopa nyoi mepu ngai, hangjingne omme ngohpu ngengpa khongküm iman nying nyingke jaowe shawe ngoh, hüyange iman teitampu yenangpe ngoh yangki;

¹²üne-o Levilan aoyin hem lokpalan ne ngoh, iman khongkümpu, hüke Asaph, Heman, hüyange Jeduthun, hüyange iman hayim, hüyange iman jeiheinaolan pengkhai inkhek inyange yankok hüyange kongki ümtük, kongki lahha jonyange wümjong heongye üshuk me yong, hüyange iman phei ngengpalan ghoja phei me da nyawong wünge ngoh;

¹³hüyange nyawong wüngpalan hüyange hem lokpalan, Youngwanpa minyongpu hüyange mongmei hüopu me ngaowüng ja ne menge hüowe ngoh yangki; hüyange aope iman-e nyawong hüyange yankook hüyange ülao kongtoilan phei iman-e ngao ngaine tam, hüyange Youngwanpa min yonge i, “Youngwanpa min yongtüoh, hangjingne I-a meinang, hüyange Iye kenpuwa jinte üküm yenangpe ngoh nang.” Hüwante nok-a, hüke Youngwanpa nok-a mokhshe wangphom me nyeih maa;

¹⁴tüokhei wangphom ngohpu jingne ngengpalan-e khümme wümne yongne ye-ok; hangjingne Youngwanpa müktishiwapuwe Kahwang nok-a maa.