Read Konyak Naga 2 PUTAHPANGAO 6 Bible Online

2 PUTAHPANGAO 6 - Konyak Naga bible

2 PUTAHPANGAO 6

¹Tüophei me Ahngpa Solomon-e i, “Youngwanpa, nange wangphom hüyange ünyak me ngohne leyangki.

²“Sha-a taowe nang tüoken me jinte ngohlak jingne nang jingne kheyongpu khümjing ja weyangki.”

³Israel kahtalan khongkümpu tüoken me yong yange ngoh. Iman yekaote ahngpa lüppe ye, hüyange iman tangme Kahwang moiman yuwe tam.

⁴Hüyange Iye i, “Israel Kahwang Youngwanpa moiman tüoh, aowe yoi juwe üpa David phei ngao, hüyange yoi yakke ütah te ngaine tam-e i,

⁵‘Egypt kahtok mepu ü-kahta woi ngaipu nyih mepu nok ja welak jingne Israel nokphong khongkümpu me, hüke tüome ü-min ngohlak Taowe chingnyu hango yele; ü-kahta Israel tangme woipa ne menglak jingne kahta ao-o yele;

⁶hüpoi Taowe ü-min angtamlak jingne Jerusalem leteki; hüyange ü-kahta Israel tangme David leteki.’”

⁷Solomon-e yelakpe ngao: “Sha-a Israel Kahwang Youngwanpa min jingne nok ja wetamlak üpa David mongjang me ngoh.

⁸Hüpoi Youngwanpawe üpa David te i, ‘Ü-min jingne nok ja wetamlak jingne nang mongjang me ngohpu jingne-a, hüke nang mongjang me ngohyangki she ipuwa nange meiye teih yangki;

⁹tüoyangpoi nange nok-a yewelak; hüpoi nang mepu puhpu nanghawe ümin jingne nok-a welak.’

¹⁰“Sha-a Youngwanpawe Iye janpu ngaowa ütahte ngaiye tam; hangjingne üpa David shotjing me tao onge ngohnang, hüyange Youngwanpawe janpuke, Israel ahngpa shotjing me shotnang, hüyange Israel Kahwang Youngwanpa min jingne nok-a weteki.

¹¹Hüyange hanghe me Israel kahtalan phei Youngwanpawe jiengjeppu longsheng ni me yah, tüopa pheipu ghonu khümjing me taowe angteki.”

¹²Tüophei me Solomon Israel ükhong üshei sheshao me Youngwanpa wümjong tangme yong, hüyange I yak no.

¹³Sha-a Solomon-e yakkong nga laopu, khaopute yakkong nga, hüyange daopute yakkong lüm shakphan yan lengjong ja ling, hüyange hatüo nokshüm phang me ang; hüyange tüopa tang me I yong. Hüwante Israel jemme ngohpu khongkümpu sheshao me Iye yatuh shinge khüm, hüyange I yak wangyete hong.

¹⁴Hüyange Iye i, “O Youngwanpa, Israel Kahwang, wangdang me yejema-a kahtoknyu me nang lepu Kahwang yenang; nang shaoshanpalan aoyinne yoi kenmong üsheiye nang sheshao me kem imante jiengjeppu yewintüohpe hüyange yetüoh okpu kenpu nange hüonang.

¹⁵Nange nang shaoshanpa üpa David te nange hanghe jan hatüo ling; eihyang, nange nang ju kaiye ngao hüyange tenyih nang yakke hatüo ütahte ngaiye tamteki.

¹⁶Sha-a tüojing üne, O Youngwanpa Israel Kahwang, nang hayim-e yoi lamnyu me nange ü-sheshao me kempuke ü-ngao khümme kentinge kema-a, ü-sheshao me Israel ahngpa shotjing me shotlak jingne nang aope-o kahtawe toinanne yengohlak, she nang shaoshanpa David Üpate nange janpu jontam pha.

¹⁷Sha-a, tüojingne, O Youngwanpa, Israel Kahwang, nang shaoshanpa David te nange ngaowe tampu nang ngao ütingpa me ngai ne tampha.

¹⁸“Hüpoi ütingtingha me kahtoknyu me kahtalan phei Kahwang ngohlak a? Leihuyah, wangdang hüyange ütahpa wangdange nangte yeyüoh ok; hüma-a tüopa nok hanghepa taowe we, hatüowe wanglak a?

¹⁹Tüoyangpoi O Youngwanpa Ü-Kahwang, nang sheshao me nang shaoshanpawe hanghepa yopnang tüopa üngwünpu hüyange yoppu te jaiye, nang shaoshanpa yoppu hüyange yoppe dopute jai pha;

²⁰hüke tüopa nok yekaote wangnyak wangngai nange nang min ümpeyekaote anglakei she i tüoye me nang mük shontam pha; tüome tüopa nyoijing yekao me nang shaoshanpawe yoppu nange jaine oklak.

²¹Hüyange nang shaoshanpa hüyange nang kahta Israel-e tüopa nyoijing yekao me aope yoplakei imante jaipha, eihyang, nange nang nyoijing, hüke wangdang mepu jaipha; hüyange aope nange jailakei, tomante ümeng winpha.

²²“Aope kahta jawe yoi yupi phei tüi-e ünu omlakei, hüyange Ite jiengjeppe tamlak ne I tang me jiengjeppu angma-a, hüyange tüopa nok me nang wümjong me I peiye jiengjepma-a:

²³hüwante ümengpa toishao-a I yoi shangtang me leih ki ne tamyange, hüyange ngaotingpa-a yinne tamme I üjaopa phei phinne Ite küw phawe nange wangdang mepu jaipha, hüyange lingtüoh hüyange nang shaoshanpa ngao phüntam tüoh.”

²⁴“Aope nang kahta Israel-e nang phei tüi-e ünu ompu jingne iman wepalan sheshao me ye-okpu ngelakei, aope iman-e nishe leppe yelakei, hüyange nang min yah lakei, hüyange tüopa nok me yoplakei hüyange tonglakei;

²⁵hüwante nange wangdang mepu jaipha, hüyange nang kahta Israel ünu wintampha, hüyange nange imante hüyange iman pajeiyong lante phapu kahtokte iman woi peitam shih.”

²⁶“Aope iman-e nang phei tüi-e ünu ompu jingne wangdang küpyange wai yekei lakei, iman-e tüopa khümjing yekaome yopma-a, hüyange nang min yahma-a, hüyange iman ünu mepu monglüpma-a, nange imante aope shaoshi puwe shangne tamlakei;

²⁷aope nange shemeipupa lam hanghe me iman kemlak ngohnang hatüo imante nange hüolakei, O Youngwanpa, hüwante nange wangdang mepu jaipha, hüyange nang shaoshanpalan, nang kahta Israel ünu wintam pha.”

²⁸“Kahmük me seanyao yengle ngohma-a, leamdak, wangyang dak, deihaliha tang me dak, nyaodukh, yejema-a yongheiyat ngaima-a; iman chingnyu ütamte iman wepalan-e shümma-a, hangkihpu shanghah shaoshi yejema-a hangkihpu dak-hei-tin ngohlakei;

²⁹kahta lili yoi shanghah shaoshi, hüyange yoi mongmeng shinge tüopa khümjing yekaote yoi yak honge hanghe yoppu hüyange yoppe tongpu kahta ütam-e yejema-a nang kahta Israel khongkümpuwe shonlakei;

³⁰hüwante nange wangdang nang ngohjing nyoi mepu jaipha hüyange ümeng winpha, hüyange kahta lili, aohi mongjang nange shinge ngohnang, I yoi lamnyu phei shuwe phatamshih hangjingne nang, hüke nange hei, kahtanyuha mongjang shing;

³¹hümme nakshih iman-e nange toman pajeiyonglan te phapu kahmük me hipak hangshin ngohlakei, iman nang lamnyu me kemme nangte nyamme lelak.”

³²“Hükemuh aope yinhu ja, ao nang kahta Israel ne yeje aope Iye kahmük üjai mepu, nang min üyong hüyange nang yak wongnangpu, hüyange nang yaklow hongyange ngohpu jingne peilakeih; aope iman peilakeih, hüyange tüopa khümjing yekao me yoplakei;

³³hüwante nange wangdang nang ngohjing mepu jaitamshih, hüyange yinhupawe hanghe jingne nangte nyiklakei tüopa phei shuwe lingtam shih: hümme nakshih kahtoknyu kahta khongkümpuwe nang min shinglak, hüyange nangte nyamlak, hüyange nang kahta Israel-e shingpuke, taowe wepu tüopa khümjing nang min me nyiknang she iman-e shinglak.”

³⁴“Aope nang kahta iman wepalan phei shapju me ponglak jingne tailakei, hanghepa lam me nange iman shonlakei, hüyange tüopa chingnyu hanghepa nange le hüyange khümjing hanghepa nang min jingne taowe we, iman-e nang tangte tüopa yekao me meyange yopma-a:

³⁵hüwante iman-e yoppu hüyange iman-e tongpu nange jaitamshih, hüyange imante okpupa phashih.”

³⁶“Aope nang kahtalan-e iman-e nang phei tüi-e ünu om ma-a, hangjingne ünu ye-ompu kahta ao-o yenang, hüyange nange imante mongshih ngaiye hüyange wepate phünne phawe, tüojing ne kahmük üjai te yejema-a ü-o me phowe teiye ngohma-a;

³⁷tüoyangpoi hanghepa kahmük me iman phowe ang iman nying nyingke teihtüoma-a, hüyange lüpeyema-a, hüyange iman phowe ngohpu kahmük me nang tangte yoppe tongpu shonne, ‘Toman-e ünu omyangki, toman ünyong yete tai hüyange ümeng lingyangki’, she ima-a;

³⁸iman phowe angpu kahmük hanghepa me iman phowe teiye ngoh tüoken me mongjang üsheiye hüyange iman yaha üsheiye nang tangte lüppe yema-a, hüyange iman kahmük yekaote yopma-a, hanghepa nange iman pajeiyong lante pha, hüyange chingnyu hanghepa nange leyah, hüyange nang min jingne taowe wepu khümjing yekaote yopma-a;

³⁹hüwante iman-e yoppu hüyange iman-e yoppe tongpu, nange wangdang mepu, hüke nang ngohjing nyoi mepu jaitam pha, hüyange iman jingne shupu toi me tükke hüyange nang phei tüi-e ünu ompu nang kahtalante ümeng wintam shih.”

⁴⁰Sha-a, O Ü-Kahwang, taowe nangte yoppe tongnang, tüome yoppu te nang mük eptam tüoh, hüyange nang na shongtam pha.

⁴¹“Hüyange sha-a yayong tüoh, O Youngwanpa Kahwang, hüyange nang toloimei jingte ongtüoh, nang hüyange nang wong üyong jiengjeppu ghonu phei. O Youngwanpa Kahwang, nang ngengpalan-e lingpu üshei me moiman tampha, hüyange nang üjaolan-e nang meipu me mongmeine tamshih.

⁴²O Youngwanpa Kahwang, nange minnga phowe tampu ahngpa winnetah tam! Nang shaoshanpa David jingne nange yetüohpe kenpu teih tüoyah.”