Read Konyak Naga 2 PUTAHPANGAO 7 Bible Online

2 PUTAHPANGAO 7 - Konyak Naga bible

2 PUTAHPANGAO 7

¹Aope Solomon ahngpawe Iye yoppu sho, wangdang mepu vün yu, hüyange jakke dopu hüyange toidopu khongkümpu hahwin; hüyange Youngwanpa müktishiwa wangngai peipuwe khümjing maa.

²Youngwanpa müktishiwa-e khümjinga maapu jingne ngengpalan khümjingte ye-ong ok.

³Aope Israel kahtalan khongkümpuwe vün yupu nge, hüyange Youngwanpa müktishiwa khümjing me maa; hüwante iman nying nyingke iman sheta taleng tangte khuhta, hüyange yop; hüyange Youngwanpate mongmei hüowe i, “Hangjingne I-a meinang, hangjingne I yayeng shüpshe jinte ngohne tamnang.”

⁴Tüophei me Ahngpa hüyange kahta khongkümpuwe Youngwanpa sheshao me toidopu pha.

⁵Solomon Ahngpawe mahu üpong haja da me ni, hüyange nyee lakh ja haja da toidopu pha. Hüke ahngpa hüyange kahta liliye Kahwang nok jao.

⁶Hüyange ngengpalan iman yoi yoite tampu taitam me yong; Levilan-e Youngwanpa hem kongtoilan, hanghepa David ahngpawe Youngwanpate mongmei hüolak jingne ling, “Hangjingne I yayeng shüpshe jinte ngohnang” hanghepa David-e iman toishao kaiye minyong pha, iman sheshao me ngengpalan-e nyawong wüng; hüyange Israel khongkümpu yong.

⁷Hüyange Youngwanpa khümjing shaome hotanpa ghonyoi Solomon-e jaowe tam, hangjingne Iye tüome jakke dopu, hüyange chingmei dopu üyao phei do. Hangjingne shakphan yan wümjong hanghepa Solomon-e ling tüome jakke dopu, hüyange hahying dopu, hüyange üyaowe dopu dolak jingne yenyippe ngoh yangki.

⁸Tüopa hipak me Solomon-e mo-a nyih nyit ngoh; hüyange Israel khongküm I phei ükhong üngang ngoh yangki, Hamath te taipu lam mepu Egypt yengpong ngoiye ngoh yangki.

⁹Hüyange tet shepupa nyih me iman ükümpa bangjem ja ngoh; hangjingne wümjong jaowe tampu nyih nyit, hüyange mopu nyih nyit iman-e nyoi.

¹⁰Hüyange lekeng nyit shepupa nyih da me lüm shepupa me Iye kahtalan-a iman nyenok yamme yene tam; hüyange David te, hüyange Solomon te, hüyange I kahta Israel te Youngwanpawe moimanpu jingne, mongmei sheiye hüyange mongong puphei yan.

¹¹Hüke Solomon-e Youngwanpa nok hüyange ahngnok-a tüm. Khümjing me hüyange yoi nok me Solomon-e linglak jingne tümme tapu khongküm Iye okpu ngeye ling.

¹²Hüwante Youngwanpa yaning Solomon tangte ngai hüyange i, “Taowe nange yoppu jaiteki, hüyange nyoijing hatüowa üjingne toidopu nok ja ne ngohlak.

¹³Wai yekeitamlak ne Taowe wangdang küppe tamküma-a, yejema-a Taowe nyaodukh te kahmük lünge kümlak jingne ngao phama-a, yejema-a ü-kahtalan yo me Taowe leamdak shonma-a;

¹⁴Ü-kahta aoyin ü-min me nyik-e ngoh nang, iman nying nyingke innenyailakei she ima-a, hüyange yopma-a, hüyange Tao yama-a, hüyange iman lamnyu ümengpa mepu lüpma-a, hüwante Taowe wangdang mepu jailak, hüyange iman ünu winlak, hüyange iman kahmük toloimeilak.

¹⁵Taowe tüopa Khümjing yomlak hüyange tüopa nyoi me yoppu lili jailak jingne Taowe tümyange ngohlak.

¹⁶Hangjingne sha-a tüopa nok ü-min tüome jinte ngohlak jingne Taowe le hüyange jaowetam; hüyange ü-mük hüyange ü-mongjang jinte tüome ngohlak.

¹⁷Hüyange nang jingne-a nangpa David te lingpuke nange ü-sheshao me kemlakei she ima-a, hüyange nangte ngaowe tampuke khongküm nange linglakei she ima-a, hüyange ü-nyanpu ngaokhüm hüyange ü-ngao phüntampulan jonlakei she ima-a;

¹⁸hüwante nangpa David phei Taowe jiengjeppu; Israel me wanglam lamlak kahta nang jingne ja nehoi yenangpe-a yengohlak she ipuke, Taowe nang ahngching linglak.”

¹⁹Hüpoi nang hüyange nang kahtalan-e ü-ngaokhümlan hüyange Taowe ngaowe tampu lan tüohyange ülao kahwanglan shaoshan-e hüyange imante khümlakei she ima-a;

²⁰hüma-a Taowe imante phapu kahmük mepu üya me pheckke Taowe iman bheiye winlak; hüyange tüopa nok hanghepa ü-min jingne Taowe jaowe tamme ling; Taowe ü-mükshao mepu wintamlak, hüyange kahta lili sheshao me hatüowa Taowe pungao ja ne hüyange leppu ja ne menge tamlak.

²¹“Sha-a tüopa khümjinga yeonge yihnoon nang, hüpoi kemmeyongpu kahta liliye yashanlak, hüyange ilak, ‘Hangne Youngwanpawe tüopa kahmük hüyange tüopa nokte hüke lingpu?’

²²Hüyange kahtalan-e janlak; ‘Hangjingne iman-e yoi pajeiyonglan Kahwang, aowe iman Egypt kahtok mepu woitei, I winne tüoh, hüyange ülao kahwanglan jon hüyange imante khüm;’ tüojingne Iye iman tangme shanghah shaoshi khongkümpu peitam.”