Read Konyak Naga 2 PUTAHPANGAO 8 Bible Online

2 PUTAHPANGAO 8 - Konyak Naga bible

2 PUTAHPANGAO 8

¹Solomon-e khümjing hüyange Inok welak jingne wangpeng da hipak yah.

²Üne-o ahngpa Hiram-e Ite phawe ngohpu chingnyulan Solomon-e linge ye hüyange Israel kahtalan tüolan me angne tam.

³Solomon Hamath Zabah te tai hüyange tüopa omyah.

⁴Iye wanwüng jeng mepu Tadmor chingnyu chingtuk pepe. Iye Hamath mepu chingnyulan khongkümpu shemin lamphe yowe anglak jingne linge ye.

⁵Iye, üne-o Beth-Horon chingtokye hüyange Beth-Horon chingphang ye linge ye; jan, peten, hüyange tienpu phei chingnyulan-a chingtuk pepe yange ling;

⁶hüyange Baalath, hüyange Solomon-e lingpu lamphe li yo-anglak chingnyulan üshei, hüyange I pongtongtoilan jingne chingnyu khongküm, koipong pheipulan jingne chingnyulan, hüyange Jerusalem me, hüyange Lebanon me, hüyange I ahngching khongkümpu me hanghe yin Solomon-e yahhuwe teih tüolan ling.

⁷Israel ne üjepu kahta lili, aoyin Hitlan, Amorlan, Perizzlan, Hivitlan, Hüyange Jebuslan,

⁸iman-e üshongwante muh tüopa kahmük me ngoh pei, tüoyangpoi Israel kahtalan-e mah ne yetampe tüoh, tüolan khongkümpu-a Solomon-e kange toi linglak ne letampu kih-e tenyih te ngoiye ngohnang.

⁹Hüpoi Israel hayimlan Solomon-e rha ne yejon; hüpoi iman-a wetaipalan ne, woipalan ne, pongtongtoi woipalan ne, hüyange koipong jonlak jingne jon.

¹⁰Nok toi lingpu ülam lili te yakjongpa ne iman woipa ne kahta ghoni phei me denga ngoh yangki.

¹¹Hüyange Solomon-e Egypt ahngnok mepu yahpu yoi shekonyu David chingnyu mepu Iye yha jingne wepu nokte woi in, hangjingne Iye i; “Yha Israel ahngpa David ahngnok me yengohlak yang, hangjingne Youngwanpa jiengjeppu ghonu peiye ngohpu nyoi-a üjao ngoh nang.”

¹²Hüwante Solomon-e Youngwanpa wümjong hanghepa Iye khümjing nokshao me lingyangki tüoken me toidopu Youngwanpate pha.

¹³Nyih jeih she khüm-e wümlak meitam kih-e, Mosawe ngaowe tampuke Sabbath nyih, lela, hüyange wangpeng lep iye lümme mopu do yenyütpu an mo, tahphak mo, hüyange panha mo jingne toidopu Iye pha.

¹⁴Ipa Davidte tüohpu linglak ngaokhüm kih-e, iman toishao jingne ngengpalan toishao tampu Iye le, hüyange nyih jeih she linglak toishao kih-e, Levilan ngengpalan sheshao me minyong phawe shaoshanlak jingne, hüyange peten jingne peten yompalan iman meitam me, hangjingne Kahwang kahta Davidte hüke lingne tam.

¹⁵Hüyange sheminlam phe jingne hüyange moth angpulan jingne ahngpawe hanghe ngengpalan hüyange Levilante lingne tam, tüopa mepu iman-e shinne üye.

¹⁶Youngwanpa khümjing nokjing linge wangpu nyih mepu tüopa toishao mansho mansho, Solomon toishao khongkümpu hüke tüm. Tüokaiye hüke Youngwanpa khümjing shoyangki.

¹⁷Tüophei me Edom kahtok mepu, Aqaba yengtung pheang mepu Eziongeber hei Elath te Solomon tai.

¹⁸Hüyange Ahngpa Hiram-e I tang te I shaoshanpa kaiye yenglinlan hüyange yengching jeng üpong tüowe shingpu shaoshanpalan shon; hüyange Solomon shaoshanpalan phei jamshe iman Ophir kahtokte tai, hüyange tüomepu hon kilogram haja pen me nga phei nyeipu yah ye hüyange Solomon ahngpa tangte hatüo yahpei.