Read Konyak Naga 2 PUTAHPANGAO 9 Bible Online

2 PUTAHPANGAO 9 - Konyak Naga bible

2 PUTAHPANGAO 9

¹Aope Sheba ahngyhawe Solomon teehepu jeng jai, tongpu üwan phei Solomonte toklak jingne, ükhong üyongja woiyange, üpe meipu kipu udhlan, hüyange hon üngang hüyange toinyu long yah yange yha pei: hüyange aope yha Solomon tangte pei, yhawe I phei yha mongme teihpu khongküm tongyangki.

²Solomon-e khongkümpute jan; I jingne meiyange wanpu hango yenangpe ngoh.

³Aope Sheba ahngyhawe Solomon konngao nangpu khongkümpu phei, hüyange Iye wepu ahngnok nge;

⁴hüyange Iye hahpu khao, hüyange shaoshanpalan khakwange angpu, hüyange I jing üyonglan-e Ite shaoshanpu, hüyange iman müktishiwapu nyemo, hüyange I wan jonpalan, hüyange Iye khümjing me toidopu phawante hangke Youngwanpa nokte ong, khongkümpu nge; shaaji yha yashanpuwe lüo nehoi yehe okpe ngaimah.

⁵Tüokhei yhawe ahngpate i, “Ü-kahtalan mepu nang toishaolan hüyange nang konngao jeng ngaolan taowe hanghe jai ütingyang!

⁶Hüpoi tao manpei manpei hüyange hatüo ü-mük-e mannge mannge, taowe üting yelakpe ngoh yangki; hüyange leihuyah, ütangkhüw nehoi üte ye-iyangpu yang; nang konngao hüyange jaalunpu taowe jaipu phei sheloipu yang.

⁷Nang shaoshanpalan aoyin nang sheshao me yelakpe yongnang hüyange nang konngao jainang iman hangshin moimanpu!

⁸Nang Kahwang aowe nangte mongmei nang, hüyange nang Israel tangme ahngne menge tam, I moimanpupa: Hangjingne Youngwanpawe Israel jinte kennang, tüokhei ngao phünlak hüyange ngaotingpa linglak nang ahngne menge tam.”

⁹Hüyange yhawe yahpeipu Solomon ahngpate hon kilogram haja peli phei nyeiye, üne-o üpeameipu üngang, hüyange toinyu long maawe hünghaone pha. Sheba ahngyhawe Solomon ahngpate phapu shinne üpeameipu üngang phapu ao-o yenangpe ngoh yangki.

¹⁰Hüyange üne-o Hiram ahngpa hüyange Solomon ahngpa shaoshanpalan, aoyinne Ophir mepu hon yah pei. Juniper pee hüyange toinyu longlan yah pei.

¹¹Hüyange ahngpawe juniper pee phei Youngwanpa khümjing hüyange ahngnok jingne shinne dang jan, hüyange hemlokpalan jingne kongkilahha hei kongki ümtüklan ling: hüyange Judah kahtok me üshongwante hükihpu hango je-mannge.

¹²Hüyange Solomon ahngpawe Sheba ahngyha te yha tongpu khongküm, yhawe hanghe yin jingne tong; yhawe ahngpa tangte yahpeipu ümee ne phapu tokte pha. Tüophei yha hüyange yha phei peipulan yoi kahtok Sheba te leihye.

¹³Sha-a wangpeng ja me Solomon tangte peipu hon kilogram haja da me lüm;

¹⁴pheeileihpalan mepu, pheeinyu leihpalan onge peipalan mepu, hüyange jatlan ahnglan mepu, hüyange Israel wankam mepu Governor lan-e kahngin ne phapu tokte kaiye peipu ngoh yangki.

¹⁵Solomon ahngpawe honne yaopu ree üyong gho ni ling; ree ja ja me hon kilogram nyit nyit nanjing ngoh yangki.

¹⁶Hüyange Iye hon phei howe lingpu ree sheshoipu gho lüm ling; ree ja me hon kilogram lüm lüm phei ling; hüyange ahngpawe Lebanon phao nok me tüolan-a ang.

¹⁷Üne-o ahngpawe meinyu fa phei ahngpa shotjing üyong ling; hüyange tüopa tangme honne pho.

¹⁸Ahngpa shotjinga dangjanpu wok ngoh yangki hüyange yalokjing tüopa phei neckyange honphei ling, hanghepa ahngpa shotjing me shinne inyange ngoh, hüyange moini ünahye me yak nyengjing hüyange yengkong mailang ni yak nyengjing shongme yongyange ngoh.

¹⁹Hüyange dangjanpu wok me yafün ja ja üjengye moini me yengkong mailang pen me ni yonge lingyange ngoh yangki. Hanghe ahngching me-o tüopa leye ahngpa shotjing yenangpe ngoh yangki.

²⁰Solomon ahngpa yingpu wan khongküm hon shaha ne ngoh; hüyange Lebanon phao nok tük-hei-sheng khongküm hon shaha ngoh: Solomon hipak me khüm-a hangne-o ye-i-pe ngoh yangki.

²¹Ahngpa Hiram yenglin phei yengching te kempu yenglin I me ngoh. Wangpeng lüm mongme ja me tüopa yenglin hon, khüm, meinyu fa, shemeinyu, hüyange shemeilan yahyange ye-e ngoh yangki.

²²Tüokhei Solomon ahngpa kahtoknyu me ahnglan üshei phei toinyu nanha hüyange konjong me ütahpa ne ngoh yangki.

²³Iman khongkümpuwe Kahwange Ite phapu konjong jailak jingne yam-e pei.

²⁴Moilan-e Solomonte hünghao ne khüm, toinan hüyange hon toinan, nyemo, yonglah, üpeameipu, koiponglan, hüyange lwngkoilan yah pei. Tüolan-a wangpeng lep iye yelakpe pei.

²⁵Ahngpa Solomon-e I jing pongtongtoi hüyange koiponglan jingne nok haja peli; hüyange koipong pheipu kahta haja pen me ni ang. Iye ütam-a Jerusalem me ang hüyange topulan-a Iye chingnyulan me angne tam.

²⁶Hüyange Iye ahngpalan üshei tangme ütahpa ne, Euphrates mepu Philistia kahmük ngoiye, hüyange Egypt yikeng pong ngoiye wanglam lam.

²⁷Iye wanglam lampu hipak me Jerusalem me khüm-a long kih-e jon, hüyange cedar pee-a yengphuk pee tüopu shinne üngang ngohyangki.

²⁸Solomon-e koiponglan-a Musri (Egypt) mepu hüyange ülao kahmüklan mepu yah pei yangki.

²⁹Sha-a towe ngohpu Solomon toishaolan üwang mepu üküm ngoiye, hipa Nathan pungao me, hüyange Shilohlan Ahijahwe itte ipu me, hüyange Nebat üha Jeroboam jing hipa Iddo himang me nyanyange ngohnang.

³⁰Solomon-e Jerusalem me Israel khongkümpu tangme wangpeng deli ahngne meng.

³¹Hüyange Solomon Ipayimlan phei shi, hüyange Ipa David chingnyu me mu; hüyange I ha Rehoboam-e I nanlei ahngne meng.