Read Konyak Naga EZRA 1 Bible Online

EZRA 1 - Konyak Naga bible

EZRA 1

¹Sha-a Persia ahngpa Cyrus üwangpa wangpeng me, Jeremia ju kaiye Youngwanpa ngao ütahte ngailak jingne, Youngwanpawe Persia ahngpa Cyrus yahate henge tam, tüokhei I ahngching üshei me hüyange üshei yete Iye ngaoyan hüyange nyan-e tam:

²“Hatüowa Persia ahngpa Cyrus ngaolan: Youngwanpa, wangdang Kahwange üte kahtoknyu nopute wanglam lampa ne menge tam, hüyange Judah mepu Jerusalem me I jingne khümjing ja welak üte wong phayangki.

³Aoyin I kahta ne mengnang iman phei Kahwangpa ngoh shih. Numan Jerusalem te onglak yang, hüyange Israel Kahwang, aohipa Kahwangte Jerusalem me yoppe khümnang, tüopa Youngwanpa khümjing linge yelak yang.

⁴Hüyange aohipawe hanghepa me toinanne ngohnang, hüke Jerusalem me ngohpu Kahwang khümjing jingne mongloong dopu tokte kaiye yoi ngohjing me ngohpu kahtalan-e hon hei khüm, toinan hüyange yinmok phei teijamtüoh.”

⁵Hüwante Judah hei Benjamin nokphonglan mepu puhu üshanglan, ngengpa hüyange Levilan, hüyange aoyin mongjangte Kahwange powe tam, tüolan-e Jerusalem te onge Youngwanpa khümjing linge yelak jingne tüm.

⁶Iman yupi chingshüm khongküm puwe ülam lili phawe hüke jam: khüm tük-heisheng, hon, hahying, yinmok yinha, ülao toinyunanha, hüyange khümjing jingne dolak toinan phei imante jam.

⁷Hüyange üne-o Youngwanpa khümjing mepu tük-heisheng hanghepa Nebuchadnezzarwe Jerusalem mepu yah pei, hüyange iman kahwang nok me ange ngoh, tüolan-a Cyrus ahngpawe ngaiye leih pha.

⁸Tüolan-a Persia ahngpa Cyruswe ngin jonpa Mithredath yak me yah in, hüyange tüolan-a Judah governor Sheshbazzar te iye pha.

⁹Hüyange tüolan iye phapu hüke ngoh: Dolak jingne hon yankhong delüm Dolak jingne khüm yankhong haja ja Tükkhok yankhong, da me tu

¹⁰Hon yankhong üjoi delüm, Khüm yankhong üjoi gho peli phei me pen, Ülao tük heilak haja ja.

¹¹Hon hei khüm hüyange ülao toinan khongküm sheiyange yankhong haja nga gho peli. Tüolan khongkümpu yahyange Sheshbazzarwe phowe teipalan Babilon mepu Jerusalemte yah yewante yahyange ong.