Read Konyak Naga EZRA 3 Bible Online

EZRA 3 - Konyak Naga bible

EZRA 3

¹Aope lekeng nyit shepupa pei hüyange Israel kahtalan yoi yoi chingshao yam-e nyoingoh, hüwante iman khongküm Jerusalem me jem;

²hüwante Jehozadak üha Joshua, hüyange I pheipu ngengpalan, hüyange Shealtiel üha Zerubbabel hüyange I pheipu jeiheinaolan yong, hüyange Kahwang kahta Mosa ngaokhüm me nyan-e ngohpuke, iman-e Israel Kahwang wümjong, tüopa tangme jakke dopu dolak jingne linge ye.

³Phowe ngohyange leih yepu kahtalan kahmük me nyoiye ngohpalan te nyamyapoi, üshongwante ngohyangpu nyoi me muh iman-e wümjong linge ye. Tüophei me iman-e nishe shomme hüyange ünme jakke dopu phawe yoppe khümne wang.

⁴Nyan-e ngohpuke iman-e peamsheam mo mo; nyih jeih she iman-e tüopa nyih wongpong ne ngaipulan shinne dopu pha;

⁵hüyange tüopa tokte yelakpe jakke dopu, hüyange lela dopu, hüyange tamyange ngohpu Youngwanpate phünne phapu molan, hüyange kahta lili aoyinne mongloong dopu pha iman-e tüopa jon.

⁶Kahtalan-e khümjing welak jingne ükong manwang yahpeyoi, iman-e lekeng nyit shepupa üwangpa nyih me Youngwanpate jakke dopu phawe ükong wang.

⁷Kahtalan-e long ai jonpalan hüyange pee ai jonpalante phalak jingne ngin pha, hüyange hahying, yinglak, hüyange olive minnga Tyre hei Sidon chingnyulan te Lebanon mepu cedar pee hanghe yin yengching kaiye Joppa te yah peilak ngohnang, tüolan phei teileihpu ne shonlak ngohnang tüolan jingne pha. Tüolan khongkümpuwa Persia ahngpa Cyruswe o-ngao phapu jingne lingyangki.

⁸Tüokhei Jerusalem mepu khümjing nyoite iman leih yepu wangpeng ni shepupa lekeng nishepupa me, iman-e toi lingne ükong wang. Zerubbabel, Joshua, hüyange iman chingshao kahtalan, ngengpalan, hüyange Levilan, ütingpa me aope ilakei phowe ngohpu mepu Jerusalem te leih yepu khongküm toi lingpute jam. Wangpeng da hüyange tüo tok tepu Levilan khongküm khümjing linge yepu toishaote nokpu ne menge tam.

⁹Hüwante khümjing toi lingpalan te leilak jingne Joshua hüyange I hayim hüyange jeiheinaolan, Kadmiel hüyange I hayimlan, Judah hayimlan phei jam she yong. Henadad puhu iman hayimlan hüyange iman jeiheinao Levilan omme jam-e yong.

¹⁰Aope kahtalan-e khümjing nokjing linge wang, ngengpalan-e iman oleng yahyange iman yak me nyawong jonyange yoi nyoijinglan me yong, hüyange Asaph puhu mepu Levilan ne yankok jonyange yong. Ahngpa David hipak memuh phapeipu wanglam kih-e iman-e Youngwanpa te minyong pha.

¹¹Iman-e Youngwanpate minyong phapu leihyepu yelakpe yah-e hüke lok: “Youngwanpa-a meinang, hüyange Israel jingne I yayeng shüpshe jin te ngohnang.” Hüyange aope iman-e Youngwanpa min yong, kahta liliye ngao üyong ngaiye üngwün; hangjingne Youngwanpa khümjing nokjing ükong wang ngoh.

¹²Hüpoi ngengpalan, Levilan hüyange puhu üshang ülanglan aoyinne üwangne wepu khümjing ngeyangki tüopa ngepalan-e iman mükshao me tüopa nok nokjing lingpu ngeye, ngao üyong ngaiye shap. Hüpoi ülaolan aoyin tüome ngoh, mongmeipu jingne üngwün.

¹³Tüokaiye kahtalan-e shappu ngaowüng mepu mongmei puwe üngwünpu ngaowüng yoi yoi yeshing okpe ngai; hangjingne kahtalan jamloi ngao üyong ngaiye üngwün, hüyange ngaowünga üjai me-o jaiye ngoh yangki.