Read Konyak Naga EZRA 4 Bible Online

EZRA 4 - Konyak Naga bible

EZRA 4

¹Aope Judah hei Benjamin kahtalantepu wepalan-e phowe teiye ngohpalan leihye-e Israel Kahwang Youngwanpa khümjing linge yenangki she jai;

²iman Zerubbabel hüyange puhu üshanglan tangte pei ngoi hüyange ngaowe i, “Khümjing wepu te toman-o numan phei jamküning. Tomane-o numan-e khümpu Kahwang ja te muh yoppe khümnang; hüyange tomane-o Assyria ahngpa Esarhaddon, aowe toman tüome woiye in, tüopa nyih mepu Ite toidopu phanang.”

³Hüwante Zerubbabel, Joshua, hüyange puhulan tepu üshanglan-e imante i, “Toman Kahwang Youngwanpa jingne khümjing ja welak toman phei numan hang wongpong ne-o yeje; Persia ahngpa Cyruswe tomante ngaowe tampuke, toman nying nyingke Youngwanpa Israel Kahwangte we tamlak.”

⁴Hüwante tüopa kahtok me nyoi ngohyangpu kahtalan-e nüngneiye tamlak jingne hüyange khümjing welak mepu Jehudilante nyamshaowe tamlak jingne ngang.

⁵Hüyange iman toishao leihkheih tamlak jingne iman phei tüi-e yonge tamlak jingne Persia üyonglan te yakjai pha, hüke yelakpe linge Cyrus ahngpa hipak mepu Darius wanglam lampute ngoiye ling.

⁶Xerxes (Ahasuerus) ahngpa wanglam lamne wangwante, Judah hüyange Jerusalem me nyoipu wepa kahtalan-e, iman phei tüi-e nyanpu lai yahpei.

⁷Üne-o Persia ahngpa Artaxerxes wanglam lamwante, Bishlam, Mithredath, Tabeel, hüyange iman phei jampulan-e ahngpa te lai nyan. Tüopa nyanpu lai-a Aramaic ngao me nyan, aope iye hüolakei lüppe ilak ne ngohyangki.

⁸Rehum, governor hüyange Shimshai, province (kahkao) yaknyanpa, iman-e Jerusalem jeng iye Artaxerxes te tüolan ngao nyan:

⁹“Governorpa Rehum mepu, kahmük yaknyanpa Shimshai mepu, kahpalan hei iman pheipulan mepu, hüyange ülao woipalan khongkümpu mepu, aoyin üwangne muh Erech, Babilon, hüyange Elam kahtok mepu Susa,

¹⁰ülao kahtalan phei jam-e, aoyin üyongpa hüyange wongnangpupa Ashurbanipal-e iman nok mepu sheihtam hüyange Samaria hüyange Euphrates apyekao kahmük lan me nyoine tam.”

¹¹Nyanpu laingao mepu ngaolan-a hatüo: “Artaxerxes ahngpa te I shaoshanpalan Euphrates henyip yekao kahtalan mepu.”

¹²“Nang yekao mepu ongpu Judahlan toman tangte Jerusalem me peiye ngohnang she ahngpawe shingpu meilak yang. Iman-e tokteiye ümeng ngailak chingnyu linge yenangki, hüyange jantpe shoteki, hüyange nokjing linge yeteki.

¹³Ahngpawe hatüo mongte onge shingpu meilak yang, hüke hatüo chingnyu linge yema-a, hüyange jantpe linge shoma-a, kahtalan-e kahngin phapu lakkülak, hüyange nang üyongpa meitam poonlan yepeipe mahlak.

¹⁴Sha-a, toman-e ahngpa hüm hahtepuwe, ahngpa wüotüopute leiye ngohlak toman jingne yeshutepuwe, hatüo toman-e shonyangki hüyange ahngpate saki pha nang:

¹⁵hüke nang pajeiyonglan laitep me nyanne ngohpu teiyamlak jingne nange ngaopha tehu! Nange aope yamme nyaolakei, nyanne ngohpu laitep me nange tüopa chingnyuwa tokteipu chingnyu, ahngpalan hüyange kahmüklan (province) jingne yemei she, hüyange üshongwante muh tüopa chingnyu me iman-e kahmük phei hokwe-e yong she shinglak. Tüojingne tüopa chingnyuwa menge winyangki.

¹⁶Tüokhei, tüopa chingnyu linge yema-a hüyange jantpelan linge shoma-a, tüopa te leppuwa shaaji Euphrates henyip yekao kahmük ma-a nang meitam yenangkülak, she ahngpate toman-e saki phanang.”

¹⁷Ahngpawe tüopa ngao janne ye: “Governor Rehum tangte, kahmük yaknyanpa, Shimshai tangte, hüyange iman phei teijampulan aoyin Samaria hüyange Euphrates henyip yekao me ngoh üshei tangte salam.”

¹⁸“Nyanpulai hanghepa numan-e shon, üte iye hüo, hüyange lüppe tamyangki,

¹⁹Hüyange taowe ngaokhüm pha, hüyange teiyamteki, hüyange tüopa chingnyu üshongwante muh ahngpalan phei tüi-e yong, hüyange tokteipu hüyange mopngai tampu nyoi she ngeteki.

²⁰Jerusalem me wongnangpu ahngpalan-e wanglam lam hüyange Euphrates henyip yekao lanshepu te wanglam lamme poon hei kahngin shai.

²¹Tüokhei, taowe ngaokhüm ja manling manling tüopa chingnyu linge yeyelak numan-e tüolan kahtate laklak jingne ngao phatüoh.

²²Tüopa mamshe lingtüoh, hümme nakshih taowe lahnyikke lingpu toi me ümeng yengailak.”

²³Artaxerxes mepu nyanpu lai Rehum, Shimshai, hüyange iman phei teijampu lan te iye hüopu phei jamshe, iman nünge Jerusalemte ong hüyange Jehudilan-e chingnyu linge yepu mepu kange lakne tam.

²⁴Hüwante Kahwang khümjing Jerusalem me linge ngohpuwa Persia ahngpa Darius wanglam lampu nishepu wangpeng manngoi manngoi lakke ngohyangki.