Read Konyak Naga EZRA 6 Bible Online

EZRA 6 - Konyak Naga bible

EZRA 6

¹Hüwante Darius ahngpawe ngaokhüm ja linge yan, hüyange laitep angpu nyoi Babilon me nyanne angjing me yam.

²Hüyange Ecbatana me, Media kahmük mepu ahngnok me, lai ütee ja tüo, hüyange tüome hüke nyanne ngoh:

³“Iye wanglam lampu üwangpa wangpeng me Cyrus ahngpawe ngaokhüm phawe hüke i: Jerusalem Khümjinga toidojing hüyange jakke dojing nyoi ne linge yene tamtüoh. Tüopa khümjinga daopute yakkong dewok, hüyange khaopute yakkong dewok.

⁴Jantpe-a shünge inpu long üphong lüm nyoi tangme pephat ülao ja ja heyange linglak. Sheng ngin winpu khongkümpuwa ahngnok ngin mepu winlak.

⁵Üne-o hon hei khüm hüyange tük heisheng hanghepa Nebuchadnezzar ahngpawe Jerusalem khümjing mepu Babilon te yah pei tüolan-a Jerusalem khümjing mepu iman angpu yoi yoi nyoi me leih yene tamtüoh.”

⁶Hüwante Dariuswe tüolan ngaolan shonne ye: “Euphrates henyip yekao governorpa, Tattenai, Shethar Bozenai, hüyange Euphrates henyip yekao me nang phei jamme ngohpu woipalan tangte.” “Khümjing nyoi mepu yanne ngohtüoh,

⁷hüyange tüopa wepu te tahpok tah no. Judah governor hüyange Jehudi woipalan-e Kahwang Khümjing üshongwante ümeken nyoi me yonge ngoh tüoken nyoi me linge we ne tamtüoh.

⁸Hatüome taowe numante nok linge yepu me imante jamlak jingne ngao phanang. Iman-e mah shupute yeshaipe phalak jingne Euphrates henyip yekao mepu peipu ahngpa meitam kahngin mepu jontüoh; hümme nakshih toi-a yelakpe linglak.

⁹Nyih jeih she, yeshaipe, Jerusalem mepu ngengpalante; iman wongpongne mengpu hanghe yin numante ngaolakei, numan-e hüke: mahu üpong üha, nyee, yejema-a nyeeha lan-a wangdang Kahwangte jakke dopu phalak, yejema-a wheat tah, hüm, wuwüngti, yejema-a olive minnga phatüoh.

¹⁰Hatüowa linglak wongpong hümme nakshih iman-e wangdang Kahwange yah oklakpa ne jakke dopu phalak hüyange I mepu moiman jingne tao hüyange ü-halan jingne yoplak.

¹¹Taowe yelakpe ngaokhüm phanang aohipawe tüopa ngaokhüm yejailakei, jaye üju tüpyang phei püangpeam ja Inokte lütte tamtüoh hüyange I püm kaiye shuitam tüoh. Hüyange Inoka mak shokjing ne menglak.

¹²Kahwang aohipawe yoi min tüoken me angnang, ahngpa yejema-a jat aowe tüopa ngaokhüm jeileilakei, yejema-a tüopa Kahwang Khümjing Jerusalem menge winlak jingne nganglakei, Kahwange kawintüoh. Tao, Dariuswe tüopa ngaokhüm phayangki. Hatüowa khakshuwe jailak wongpong.”

¹³Hüwante Tattenai governor, Shethar Bozenai, hüyange iman pheipu woipalan-e, Darius ahngpawe hangke ngaowe shonne pei, hüke khakshuwe ling.

¹⁴Hüyange hipa Haggai hüyange Iddo üha Zekhariawe itte tampu kaiye Judahlan woipalan-e shemei she ling hüyange moimanpu pei. Hüyange Israel Kahwange ngaowe tampuke, hüyange Cyrus, Darius, hüyange Artaxerxes ngaokhüm kih-e iman-e we, hüyange shotüm.

¹⁵Iman-e tüopa Khümjing Darius ahngpa wanglam lampu wangpeng wok shepupa hüyange Adar leat lüm shepupa nyih me tümme sho.

¹⁶Tüophei me Israel kahtalan, ngengpalan, Levilan, hüyange ülaolan aoyin phowe ngohpu mepu leihye üsheiye hoongli mong ongpu phei khümjing jaopu hipak ngoh.

¹⁷Hüyange tüopa Kahwang Khümjing jaowe tampu me iman-e mahu üpong gho ja, nyee üpong gho ni, nyee üha gho peliye dopu pha; hüyange Israel jatlan jingne ünu dopu jingne youn pong pen me ni, Israel puhu penme ni jingne do.

¹⁸Hüyange Mosa laitep me nyanne ngohpu kih-e iman-e Jerusalem mepu khümjing shaoshanlak jingne ngengpalan hüyange Levilan leye tüoh.

¹⁹Kahtalan aoyin phowe ngohpu mepu leihye iman-e ünepupa wangpeng üwangpa lekeng nyih pen me peli shepupa me linne taipu mo ngoh.

²⁰Hangjingne ngengpalan hüyange Levilan-e iman nying nyingke moilan jaowe shayange ngoh; iman khongküm jaoyange ngoh; hüyange iman-e phowe teiye ngohyangpu kahtalan jingne hüyange iman jeiheinao ngengpalan jingne, hüyange iman yoi jingne linne taipu mo nyeeha toi.

²¹Hüyange Israel kahtalan phowe ngohpu mepu leih yepulan, hüyange tüopa kahmük me ngohpu kahtalan aoyinne ülao kahwanglan te khümpu tüohyange Israel Kahwang Youngwanpate khümne pei, tüolan khongkümpuwe dopu mei-a hah.

²²Nyih nyit jingne iman-e do yenyetpu an mo mongong puphei nyoi. Hangjingne Youngwanpawe iman mongmei ne tam, hüyange iman yak me Israel Kahwang Khümjing toishao me wong nangne tamlak jingne iman tangte Assyria ahngpa mongjang lüpne tam.