Read Konyak Naga EZRA 7 Bible Online

EZRA 7 - Konyak Naga bible

EZRA 7

¹Wangpeng nangjange lin phei me, aope Persia ahngpa ne Artaxerxes ngoh, Ezra she minpu kahta ja ngohyangki. I jing pajeiyonglan üjüng yamwante, ütahpa ngengpa Aaron ngoiye hüke yepu ngoh: Ezra-a Seraiah üha, Azariah üha, Hilkiah üha,

²Shellum üha, Zadok üha, Ahitub üha,

³Amariah üha, Azariah üha, Meraioth üha,

⁴Zerahiah üha, Uzzi üha, Bukki üha,

⁵Abishua üha, Phinehas üha, Eleazar üha, Aaron üha.

⁶Tüopa Ezra Babilon mepu ong, Israel Kahwang Youngwanpawe Mosate phapu ngaokhüm mei mei-e shinge okpu laipa ja ne ngoh yangki. Hüyange Ezra-a Youngwanpa Kahwange moiman phayangpu kahta ne menge, Iye hanghe jingne tongyapeih ahngpawe Ite pha.

⁷Artaxerxes ahngpa wanglam lampu wangpeng nyit shepupa me, Ezra, Babilon mepu Jerusalem ngoilak jingne Israellan ükhong ja ngengpalan, Levilan, khümjing hemlokpalan, khümjing yompalan, hüyange toi lingpalan nang yange yayong.

⁸Ahngpa wangpeng nyit lekeng nga shepupa me Ezra Jerusalem ngoi.

⁹I Babilon mepu üwangpa hat hüyange üwangpa nyih me yayonge kemwang; hüyange Kahwange jampu kaiye iman lekeng nga shepupa üwangpa nyih Jerusalem ngoi.

¹⁰Hangjingne Ezrawe Youngwanpa ngaokhüm yamlak, hüyange hatüo linglak, hüyange Israel me nyanpu ngaokhüm hüyange linglak ngaokhüm nyüowe tamlak Iye mongjang lanshe phünne phawe ngoh yangki.

¹¹Artaxerxeswe ngengpa hüyange laipa, Ezra, aowe Youngwanpa Kahwange Israel te phapu ngaokhüm meimeiye shinge ngoh, Ite nyanne phapu ngaolan hatüo ngoh nang:

¹²“Ahngpa Artaxerxes mepu wangdang Kahwang Ngaokhüm meimeiye shinge okpa ngengpa hüyange laipa Ezra tangte,”

¹³“Taowe ngaophawe inang, Ü-ahngching üshei yemepu Israel kahtalan, ngengpalan, hüyange Levilan aoyinne monge teih, iman nang phei Jerusalemte leih yene tampu oklak.

¹⁴Taowe Jerusalem hüyange Judah me nang Kahwang Youngwanpa ngaokhüm, hanghepa nangte lingne nyinge tam, tüolan-a khakshuwe nyingme yah-e linge taiya leilak jingne, iman üpheipu ütahpalan nyit ngoiye nang phei shonnang.

¹⁵Hüyange tao hüyange üpheipu ütahpalan-e Israel Kahwang, ao Jerusalem me ngohnang Ite mongmei sheiye khüm hüyange hon dopu phapu nange yah tailak yang.

¹⁶Hüyange nange Babilon kahmük üshei mepu tüopa hon hei khüm, kahtalan hüyange ngengpalan-e mongloong dopu, iman Kahwang khümjing hanghepa Jerusalem me ngohnang, tüopa jingne phapu mongloong dopu khongküm yahyange tailak yang.”

¹⁷“Nange tüolan ngin-a kentinge winlak yang hüyange mahu üponglan, nyeeponglan, nyeehalan, hahying, hüyange wuwüngti shaktüoh hüyange Jerusalem Khümjing mepu wümjong me do tüoh.

¹⁸Hüyange hon hei khüm topulan-a nangte hüyange nang pheipulan mükte hanghe yin lingküme meilak she teih, hatüo numan-e numan Kahwange mongpu kih-e lingtüoh.

¹⁹Hüyange tük hei sheng nang Kahwang toishao jingne nangte phapuwa nange Jerusalem Kahwang sheshao me phünne phatam tüoh.

²⁰Hüyange üne-o nang Kahwang khümjing jingne hanghe yin wongpongne ngainang, hatüo jingne-a nange ahngnok ngintük mepu wintüoh.”

²¹“Tao, Artaxerxeswe Euphrates henyip yekao kahmük me ngohpu ngin jonpalan khongkümpute tüopa ngao phanang, hüke wangdang Kahwang Ngaokhüm laipa hüyange ngengpa, Ezrawe hangheyin numan mepu wongpongne ngailakei, hatüo mong phawe mamshe lingtüoh,

²²khüm kilogram haja lüm gho peli ngoiye, wheat tah kilogram haja pen ngoiye, wuwüngti liter haja ni ngoiye olive minnga liter haja ni ngoiye, hüyange hümpa-a okpu shinne phatüoh.

²³Wangdang Kahwange Ite khümjing jingne hangshinne wongpong ne meng numan-e kentingpu phei khakshuwe phatüoh, hüyange hümme nakshih Iye üte hüyange ü-phei me wanglam lampulan te mongshih yengailak she shingyah.

²⁴Numan-e ngengpalan te, Levilante, hemlokpalante, khümjing yompalante, toi lingpalante, yejema-a tüopa Kahwang Khümjing toishao me aoshin yakyuwe toi lingnang imante kahngin, yejema-a poon shailak mepu tiennang.”

²⁵“Hüyange nang, Ezra, nang Kahwange nangte phapu konngao jonne, aoyin nang Kahwang Ngaokhüm phangme nyoi, tüolan yo mepu henyip yekao Euphrates me nyoipu kahtalante wanglam lamlak jingne wanglam lampalan hüyange kahpalan lelak yang.

²⁶Kahta ütam-e nang Kahwang yejema-a ahngching ngaokhüm yejaima-a, Ite kahphünpu khakshuwe phalak. Li ne tampune jeyah, yejema-a ching janglak, yejema-a I jing toinyu nanha lanshe khokke yahlak yejema-a küpnok me angnyi-hi anglak.”

²⁷“Youngwanpa teman pajeiyonglan Kahwang minyong tüoh! Aowe hükihwe ahngpa mongjang me, Jerusalem me ngohpu Youngwanpa nok shemei yaoma tamlak jingne hinne tam:

²⁸hüyange üte ahngpa hüyange I pheipu ütahpalan sheshao me, hüyange I jing wongnangpu woipalan üshei sheshao me shüpshe hüo. Hüyange Youngwanpa yaklaopu ü-phei ngohpu phei shuwe tao wongnangne tam, hüyange taowe Israel puhulan mepu üshanglan ü-phei onglak jingne jamshe nyik-e jem.”