Read Konyak Naga EZRA 8 Bible Online

EZRA 8 - Konyak Naga bible

EZRA 8

¹Hatüolan-a puhu üshanglan aoyin Babilon te phowe teiye ngoh hüyange aope Artaxerxes ahngne ngoh, Ezra phei Jerusalem te leih yepalan ngohnang:

²Phinehas puhu mepu Gershom, Ithamar puhu mepu Daniel, David puhu mepu Shecaniah üha Hattush.

³Parosh puhu mepu kahta netan gho ja denga iman puhu mepu phei Zekharia. (Iman jongnyoi hüke nyanne angpu ngoh yangki.)

⁴Pahath-moab puhu mepu kahta ghoni phei Zerahiah üha Eliehoenai.

⁵Zattu puhu mepu kahta gho lüm phei Jahaziel üha Shecaniah,

⁶Adin puhu mepu kahta denga phei Jonathan üha Ebed,

⁷Elam puhu mepu kahta denyit phei Athaliah üha Jeshaiah,

⁸Shephatiah puhu mepu kahta detet phei Mikhael üha Zebadiah,

⁹Joab puhu mepu kahta ghoni pen me tet phei Jehiel üha Obadia,

¹⁰Bani puhu mepu kahta ghoja dewok phei Josiphiah üha Shelomith,

¹¹Bebai puhu mepu kahta da me tet phei Bebai üha Zekharia,

¹²Azgad puhu mepu kahta gho ja pen phei Hakkatan üha Johanan,

¹³Adonikam puhu mepu kahta dewok phei Eliphelet, Jeuel, hüyange Shemaih (Iman phei me leih yeyangki),

¹⁴Bigvai puhu mepu kahta denyit phei Uthai hüyange Zaccur.

¹⁵Hüyange taowe iman Ahava yekaote yünne tapu yengyin me ükhong khongkümpu jemne tam, hüyange tüome toman nyih lüm nyoi. Ükhong yo me taowe ngengpalan nge, hüpoi Levilan yenangpe ngoh.

¹⁶Taowe woipalan iman tu-Eliezer, Ariel, Shemaiah, Elnathan, Jarib, Elnathan, Nathan, Zekharia, hüyange Meshullam, hüyange konnyüopa ni-Joiarib hüyange Elnathan jingne shon.

¹⁷Taowe iman Casiphia ükhong yo mepu üshangpa Iddo, I pheipulan, khümjing toilingpalan tangte khümjing me Kahwang shaoshanlak jingne tomante kahta shonpha, she iye shon.

¹⁸Kahwange shüpshe wong kaiye iman-e tomante Mahli puhu mepu lamphe li okkeshangpu Sherebiah, hüyange I phei I halan hei Ijei inao Levilan pen me tet shon.

¹⁹Iman-e üne-o Merari puhu mepu, iman pheipulan kahta da phei Hashabiah hüyange Jeshaiah shon.

²⁰Tüolan tokte üne-o khümjing toilingpalan aoyin pajeiyonglan te Ahngpa David, hüyange I phang mepu lan-e Levilante jamlak jingne nyinge tam iman kahta ghoni da. Iman khongkümpu min nyanyange ngohyangki.

²¹Hüwante taowe Ahava yengyin me toman lili jingne toman Kahwang sheshao me toman taipu lamnyu Iye woilak jingne hüyange toman hüyange toman hayimlan hüyange toman toinyu nanhalan yinlak jingne nyaoweleye hüyange innenyaiye yoplak ngao pha.

²²Lamme taiwante wepalan hüoyapoi tomante jamlak jingne ahngpa mepu nyahponglan hüyange pongtongtoi pheipulan yulak jingne tao wüowe teih ngoh yangki. Hangjingne taowe ahngpate i, ümeipa jingne aoyinne I yamlakei khongküm puphei toman Kahwang yaklaopu omme ngohnang; hüpoi I wong hüyange I mongshih ngaipu I winne tüohpalan üshei tangme ngohnang.

²³Tüokhei toman yintam pha she nyaoweleye toman Kahwangte yop, hüyange toman-e yoppute Iye jan.

²⁴Tüophei me Ngengpa ütahpalan yo mepu hüke Sherebiah, Hashabiah, hüyange ülaolan pen ngoiye taowe le.

²⁵Tüophei me imante hon hüyange khüm, hüyange tük hei sheng, hüke toman Kahwang khümjing nok jingne dopu hanghepa ahngpa, hüyange I pheipu ütahpalan, hüyange I phang mepu üyonglan hüyange tüome omme ngohpu Israel khongkümpuwe dopu phawe ngoh, hatüo iye pha.

²⁶Taowe imante phapu tüolan ne ngohyangki: Khüm, tok gho wok phei denga, Khüm kilogram denyit ngoipu tük hei sheng gho ja, Hon, kilogram gho ja ,

²⁷Hon kilogram tet phei jenyeipu jing hon yankhong da, hon yankhong shinne muh meipu shemeipupa shakphan yankhong ni.

²⁸Hüyange taowe imante i, “Youngwanpate numan üjao ne ngohnang, hüyange tük hei sheng üjao ne ngoh nang; hüyange hon hei khüm-a Youngwanpa numan pajeiyonglan Kahwangte mongloong dopu ngohnang.

²⁹Numan-e khümjing ngoiye manpei manpei tüolan-a yeonge kentinge yomtüoh. Tüoken Jerusalem me numan-e ngengpalan tüp me tüolan-a tokke leitüoh hüyange tüolan-a ngengpa woipalan hüyange Levilan, hüyange Israel kahta woipalan yak te phatüoh.”

³⁰Tüokhei ngengpalan hüyange Levilan-e tüolan-a Jerusalemte toman Kahwang nokte tüolan-a yah-e peilak jingne hon, khüm hüyange tük hei shenglan tokpuwa yah.

³¹Hüwante toman-e Jerusalemte tailak jingne üwangpa leat nyih pen me ni shepupa me Ahava yengyin mepu yayong; hüyange toman Kahwang toman phei ngoh, hüyange taiwante wepa hüyange lam me dodoyange ngohpulan yak mepu Iye toman yin.

³²Aope toman Jerusalem ngoi, toman nyih lüm mongme toloimei.

³³Tüophei me nyih peli shepupa me toman khümjing te peiyange hon hei khüm hüyange tük hei sheng tokkelei, hüyange tüolan-a Uriah üha Meremoth ngengpa yakte pha. I phei jamme Phinehas üha Eleazer, hüyange Levilan naoshe ni Jeshua üha Jozabad, hüyange Binnui üha Noadiah ngohyangki.

³⁴Khongkümpu iye leiyange hüyange tokyange yah: hüyange tokke yahpu khongkümpuwa hüwante muh nyanne ang.

³⁵Phowe ngohpu kahtalan aoyin leih yeyangki, iman khongkümpuwe Israel Kahwangte jakke dopu phalak jingne dopu yahpei; Iman-e Israel khongkümpu jingne mahu üpong pen me ni, nyee üpong detu me wok, hüyange nyeeha denyit me nyit dopu pha; iman-e üne-o ünu mepu iman jaolak jingne younpong pen me ni dopu pha. Tüolan yinmok khongkümpu Youngwanpa te jakke dopu phayangki.

³⁶Iman-e üne-o ahngpawe imante phapu nyanpu ngaolai yah ngai hüyange Euphrates henyip yekao kahmük tepu governor hüyange üyonglante iman-e pha, tüopa kaiye tüolan kahtalan-e kahtalante hüyange khümjing me yoppe khümpute jampu pha.