Read Konyak Naga EZRA 9 Bible Online

EZRA 9 - Konyak Naga bible

EZRA 9

¹Tüolan khongkümpu linyang phei me, Israel yomepu woipalan ütam ü-tangte pei, hüyange üte i: Kahtalan-e, ngengpalan-e, hüyange Levilan-e iman neikon-e ngohpu Ammon, Moab, hüyange Egypt yejema-a Kananlan, Hitlan, Perizzlan, Jebuslan, hüyange Amorlan mepu iman nying nyingke yanne yengoh ok. Imane-o tüolan kahtalan-e lingpu nunushepu toishao lingnangki.

²Jehudi kahtalan-e hüyange iman hayimlan jingne yinhu jat yhalalan yahteki, hüke Kahwang jing üjao jat-a iman nying nyingke nyütteki. Woipalan hüyange üyonglan-e üwangne meng.

³Aope taowe tüopa jai, mongmengpuwe taowe ü-inkhek hüyange shiengnye hit, hüyange ü-shang mepu shangmin hüyange ü-jumin bheiye win hüyange mongmeng puphei yashan-e shot.

⁴Tüoken me tao mongmeng puphei ünpong me jakke dopu phalak hipak manngoi manngoi shotte ngoh, hüwante phowe ngohpu mepu leih yepalan-e ünu ompu jingne Israel Kahwang ngao me nyamme teihpalan ü-neikon-e jem.

⁵Aope ünpong me jakke dopu phalak hipak ngoi, ümeken me tao mongmenge shotte ngoh tüoken mepu yayong, hüyange hittepu ü-inkhek muh yahyange, tao yatuh shüng hüyange yak noyange ü-Kahwang Youngwanpate yop.

⁶Taowe i, “O Kahwang, nang ngohjang ngoh-e ü-üng nganlak tao yeonge wüonangki; toman ünuwa toman shang phei shenyei she phonge ongteki; hüyange toman ünulan-e wangdang yüoteki.

⁷Toman pajeiyonglan hipak mepu tenyih te ngoiye toman yeonge ünu me ngohnang: hangjingne toman ünu jingne toman, toman ahngpalan, hüyange toman ngengpalan, kahmük me ngohpu ahngpalan yak me, yanglow phei lilak, phowe teilak, nyieyeyahne tamlak, hüyange tenyih pu kih-e wüotüolak phünne phayangki.

⁸Sha-a ütenjapu jingne towe ngohpu yakpoih ja rha ne mengpu mepu yinlak ne, hüyange I üjaopa nyoi me yafün lingpu ja tüolak, hüke toman Kahwange toman mük wangngai tamlak, hüyange rha yatuhshao mepu toman üjingha jeileitamlak Youngwanpa toman Kahwang mepu shüpshe hüoteki.

⁹Hangjingne toman rha yatuhshaome ngohpalan; tüoyangpoi toman Kahwange toman rha yatuhshao me toman winne yetüoh, hüpoi toman jeileitampu ngaitamlak jingne, toman Kahwang khümjing yongne tamlak, hüyange tüopa heamme mengtepu linge yelak, hüyange Judah hei Jerusalem me toman yintampu tüolak jingne Persia ahngpalan sheshao me tomante shüpshe ngene tam.”

¹⁰“Hüpoi sha-a, O toman Kahwang, tüopa pheima-a toman-e hang linglak? Hangjingne toman-e nange nyinge tampulan winne tüoh teki,

¹¹hangheyin nang shaoshanpalan hipalan kaiye ngaowe tam, hüke numan-e yahne taipu kahmük-a, kahmük me ngohpu kahtalan yejaopu kaiye kahmük-o yejaope ngohnang, iman nunushepu lan kaiye hanghe kaiye hatüo jaye üshuk mepu jaye üshuk ngoiye iman yejao yeshapuwe maawe ngoh nang.

¹²Iman-e üne-o hüke i, numan yhalalan iman hayim me ngohne tahtam, yejema-a numan hayimlan-e iman yhalalan tahyah tam, yejema-a numan-e aope-o iman mepu chingmei hüyange moiman tahyam. Hümme nakshih numan wongnanglak, hüyange kahmük mepu numan-e meipu hahyinglak, hüyange hatüowa numan mothleipalante jinjintepu jingne tüohlak.

¹³Sha-a toman yemeipu hüyange ümeng üyong jingne tüolan khongküm toman tangme peipu jeyahpoi, nanga toman Kahwang, toman ünu phei shuhah shepu phei shephang she tomante shangne tam, hüyange tüokih-e toman towe ngohpulante phatepuwe;

¹⁴nishe toman-e nange nyinge tampulan, menglak a? Hüyange tüolan nunushepu lingpu kahtalan phei mata tongnünglak a? Topu ja nehoi yetüoh tamlak üne yejema-a ja nehoi yeyinlakne, nange toman manmahtam manmahtam she nange tomante mongshih yengai lak a?

¹⁵O Youngwanpa, Israel Kahwang, nanga ngaoting ipa; hangjingne tenyih ngohpu kih-e toman yintamlak jingne üjingha hei towe tüoh. Leihuyah, nang sheshao me toman ünu me ngohnang; tüojingne ao-o nang sheshao me yongne ye-ok.”