Read Konyak Naga NEHEMIA 1 Bible Online

NEHEMIA 1 - Konyak Naga bible

NEHEMIA 1

¹Hatüowa Hacaliah üha Nehemiawe ngaopulan ngohnang. Artaxerxes wanglam lampu wangpeng da shepupa Kislev leat me, Tao, Nehemia, Susa ahngjong chingnyu me ngoh yangki.

²Hanani, ü-jeiheinaolan yo mepu ja, kahta ükhong ja woiyange Judah mepu pei ngoi, hüyange taowe imante Jerusalem jeng, hüyange toman pheipu Jehudilan aoyin Babilon mepu phowe ngohpu mepu leihye iman jeng tong.

³Iman-e üte hüke i, aoyin yinne tüoh hüyange aoyin phowe ngohpu mepu leih ye, iman-a yeonge shaoshi nang ei, hüyange iman neikonne nyoipu yinhu jatlan-e imante yaowele nang ei. Jerusalem jantpenyuwa meng teiye hüyange petenlan-a vünne hahkümyange manling yepe ngohnang ei she i.

⁴Aope taowe tüolan khongkümpu jai, tao shot hüyange shap. Nyih nangjange tao shappe yoong hüyange yehah yeying. Taowe Kahwangte yop,

⁵“Wangdang Kahwang Youngwanpa! Nanga üyongpa ngohnang, hüyange nang sheshao me nyamjang nyamme toman yongnang. Aoyinne nangte ken hüyange nange phapu ngaokhüm jonnang tüolan phei nange jiengjeppu ütingpa me angnang.

⁶Üte leipha, Youngwanpa, hüyange taowe yoppu jaipha, hüke taowe wangnyak wangngai nang shaoshanpalan, Israel kahtalan jingne yopnang. Israel kahta toman-e ünu omyangki she taowe jannang. Tao hüyange ü-pajeiyonglan-e ünu omyangki.

⁷Toman-e nang phei tüi-e ümengpa loishe lingyangki, hüyange nang shaoshanpa Mosa te hanghepa ngaokhümlan, jonlak ngaokhüm hei linglak ngaokhümlan nange pha, tüolan khakshuwe toman-e yejon.

⁸Taowe nangte yoppe tong nang, nange nang shaoshanpa Mosate phapu ngao teih tüopha: ‘Numan-e ünu om ma-a taowe numan jatlan yo me yanne tamlak.

⁹Hüpoi numan-e ü-tangte leih yema-a, hüyange ü-ngaokhümlan angma-a hüyange jonma-a, winne tüohpu kahtalan-a shejaipupa kahtok me taiye ngohyapoi Taowe iman tüopa nyoi mepu nyik-e jemlak hüyange Taowe ü-min anglak jingne lepu kahmük yamme iman woijemlak.’

¹⁰Youngwanpa, hatüolan-a nang shaoshanpa hüyange nang kahtalan ngohnang, aoyin nange nang wong üyong hüyange nang wongnangpu yakke yinne ang.

¹¹Taowe nangte yoppe tongnang, sha-a nang shaoshanpawe yoppu hüyange nangte nyammelepu shaoshanpalan-e yoppu nange jaipha. Taowe nangte yopnang, tüopa nyih me nange nang shaoshanpa okpu nge ne tampha hüyange tüopa ahngpa sheshao me I shüpshe ngene tampha.” Tüopa nyih hipak me taowa ahngpa wan jonpa ne ngohyangki.