Read Konyak Naga NEHEMIA 13 Bible Online

NEHEMIA 13 - Konyak Naga bible

NEHEMIA 13

¹Tüopa nyih me kahtalante Mosa Ngaokhüm laitep mepu iye hüo, tüome Ammon hei Moablan aope-o Kahwang khümjing me jempute omne ye-ok she nyanyange tüo.

²Hangjingne ima-a Israellan Egypt mepu yayonge taipu lamme Ammon hei Moab kahtalan-e hahying hei yeng yahyange pongte yeta. Hüohah shepu nanleiye imante phoiwüm-e tamlak jingne iman-e Balam te ngin pha; hüpoi toman Kahwange phoiwümpuwa moiman ne linge tam.

³Aope Israel kahtalan-e ngaokhüm ipu jai, iman-e iman phei nyütte ngohpu yinhulan khongkümpu yanne tam.

⁴Tüo shao me ngengpa Eliashib, ao khümjing mepu tüplan tangme nokpune le,

⁵I Tobiah phei chingmei me ngohyange, tüp üyong ja, ümeken me üshong me muh hahying dopu, sünyet, wanhei sheng, penphong dopu tah, wuwüngti, hüyange minnga angjing, Levilante, hemlokpalan hei khümjing yompalante ngaokhüm kih-e jempu hüyange ngangpu dopu ngengpalan jingne jempu, tüolan khongküm angyange ngoh.

⁶Tüopa hipak khongkümpu me tao Jerusalem me yengoh; hangjingne Artaxerxes Babilon ahngpa wangpeng delüm me ni shepupa me tao ahngpa tangte ngaolan phalak jingne tai, hüyange hipak üten ja ngohyange taowe ahngpate o-ngao yu,

⁷hüyange tao Jerusalem te yeyang phei me Eliashib-e khümjing mepu tüp ja phapu kaiye Tobiah jingne hanghe ümeng ling hatüo taowe shing.

⁸Tüo kaiye tao yeonge mongshih ngai; tüokhei taowe Tobiah toinan khongküm tüp mepu yahwin.

⁹Hüwante taowe ngaokhüm pha, hüyange iman-e tüp-a jaowe tüm; hüyange khümjing me angpu wan heisheng, üne-o hahying dopu hei sünyet khongküm nishe tüopa tüpte taowe yahye.

¹⁰Üne-o Levilante iman meitam yephapu taowe shinge pei; tüo kaiye Levilan hei khümjing hemlokpalan iman toishao tüohyange kahta lili Jerusalem mepu yoi yoi kah yam-e yanteiye ngoh.

¹¹Hüwante taowe wanglam lampalante tee hüyange i, “Hangne numan-e Kahwang nok winne tüohpu?” Hüyange taowe hemlokpalan hei Levilan khongküm nishe woijem hüyange kahta lili yoi yoi toishao me tüoh.

¹²Hüwante Israel kahta khongkümpuwe penphong dopu tah hei cee, wuwüngti, hüyange minnga yojingken me yah pei.

¹³Hüyange taowe ngengpa Shelemiah, nyanpa hüyange laipa Zadok, hüyange Levilan mepu Pedaiah she yowe angjing nyoi me yakjongpa ne mengtam; hüyange iman phang me jam-e ponglak jingne Mattaniah hayim Zaccur üha Hanan le; hangjingne imante monghümpu ngoh, hüyange jeihei naolante tam-e phalak-a iman toishao ne ngoh yangki.

¹⁴O Ü-Kahwang, tüopa toishao jingne tao teihtüoyah, hüyange ü Kahwang khümjing jingne taowe lingpu toimei hüyange taowe namnopu nange phutte tahwintam.

¹⁵Tüolan nyih hipak me Judah kahtok me ütam-e Sabbath nyih wuwünglick, üyeng phütpu, ütam-e tah hei cee, wuwüngti, wuwünglick, phuklick, hüyange ülao toinan iman gado me sheihpu hüyange Jerusalem te yah taipu taowe nge; hüwante Sabbath me hango yeyüolak jingne taowe imante deingao pha.

¹⁶Üne-o Jerusalem me nyoipu Tyre chingnyu mepu kahta ütam-e Sabbath me nyah hüyange ülao toinan maayah peiye Jerusalem mepu kahtalante yüopu ngohyangki.

¹⁷Hüwante taowe Judah woipalante tee hüyange i, “Numan-e lingpu ünu toite leihuyah! Numan-e Sabbath nu ne tamnang.

¹⁸Numan pajeiyong lane-o hüke ümeng yeling a? Hüyange tüojingne teman tangte hüyange tüopa chingnyu tangte tüopa shanghah shaoshi yafün Kahwange peiye yetam a? Tüoyangpoi üne-o numan-e Sabbath mengpu jingne shanghah shaoshi ünyei Israel tangte yahpei nang.”

¹⁹Tüokhei Sabbath ngoipu lep iye, aope ün-ngoilakei chingnyu peten küplak, hüyange Sabbath manlin manlin ye-eplak jingne taowe ngaokhüm pha. Sabbath me chingnyute hango yah yepeilak hüyange hatüo kentinge yomlak jingne taowe ü-kahtalan ütam Peten me yomne tam.

²⁰Hüwante pheeinyu leihpalan hüyange yinkempalan (hatngaya) chingnyu jantpenyu ü-at me ja hei ni me lak.

²¹Hüwante taowe imante deingao phawe i, “Hangne numan-e jantpenyu shongme tanne ngohpu? Numan Üneye hüke ngohma-a numante yak hünglak.” Tüophei me peiye iman Sabbath me yepeipe lak.

²²Hüyange, taowe Levilante, iman yoi nying nyingke jaoweshalak yang she hüyange Sabbath jaowe shawe anglak jingne iman-e peten-a yomlak yang she ngao pha. O Ü-Kahwang, tüojingne-o nange tao teihtüoyah hüyange nang yayeng üyong kaiye tao yintampha.

²³Üne-o tüopa hipak me muh Judah kahtalan-e Ashdod, Ammon, hüyange Moab shekolan phei mata tongningpu taowe nge.

²⁴Hüyange iman hayimlan jakih-e tampuwe Ashdod ngao hüyange ülao ngao me ngao, hüyange toman Judah ngao hangke ngaolak yeman.

²⁵Hüyange taowe iman phei yemeipe tee, imante phoiwüm-e nyik, imante shüt, hüyange iman shangmin me shuwe shüt. Tüophei me taowe imante shaaji tenyih me peiye yinhu jatlan phei iman-e hüyange iman hayimlan-e mata tongningpu yengohlak she Kahwang min me jiengjep ne tam.

²⁶Taowe imante i, “Ahngpa Solomon ünu me yütne tampuwa yinhujat sheko kaiye ngohnang, ülao jat hei li ahngpalan üshei phei sheyongpupa-a I ne ngohyangki. Kahwange Ite ken hüyange Israel üshei tangme ahngne menge tam, tüoyangpoi I tüopa ünu me yei.

²⁷Hüma-a toman-e numante yinhulan sheko kaiye teman Kahwangte ünu omlak hüyange tüokaiye ümeng toi linglak ilak a?”

²⁸Jehoiada-a ütahpa Ngengpa Eliashib Üha ne ngoh, hüpoi Jehoiada hayim yo me shejawe Beth Horon ching mepu Sanballat üha yahyange ngoh; tüokhei taowe Jehoiada Jerusalem mepu jange teine tam.

²⁹O Kahwang, iman teihtüopha, hangjingne iman ngengpa shotjing, Levilan hüyange ngengpa jiengjeppu toishao kaiye nuwe shakteki.

³⁰Hüke taowe iman khongküm yinhulan mepu yanne tamyange jaowe shawe tam, hüyange ngengpa hei Levilan yoi yoi toishao me yongne tam.

³¹Hüyange dopu phawante jaklak han hüyange üwangpa ülick dopu phalak jingne hipak itte tam. Tüolan khongküm teihtüo pha, O Kahwang, hüyange tüopa jingne üte moiman pha.