Read Konyak Naga NEHEMIA 2 Bible Online

NEHEMIA 2 - Konyak Naga bible

NEHEMIA 2

¹Ahngpa Artaxerxes wanglam lampu wangpeng da shepupa hüyange Nisan leat me, aope I jingne wuwüngti yahpei, taowe wuwüngti yah hüyange Ahngpate pha. Tüo shaote ahngpa sheshao me taowe aope-o mongmenge yehüo.

²Tüokhei ahngpawe üte tong, Nanga dakpu-o yejeputa hangke iye nang sheta yengai pu? Hatüo ülao hango yeje, hüpoi mongjang me mongmeng ngohtüoh puwe! Hüwante tao yeonge nyamme teih;

³Taowe Ahngpate i, “Üyongpa ahngpa, nang jinlao shangshaowe ngohshih! Aope ü-pajeiyonglan mujing chingnyu heamme taiteiye hüyange menge mahteiye ngoh hüyange chingnyu jantpe hüyange petenlan khongküm vün-e hahküm teiye ngoh, hüwante tao mongmengpu sheta ye-ompe ngoh oklak a?”

⁴Hüwante ahngpawe üte i, “Nange hanghe tonghupu?” Tüokhei taowe wangdang Kahwangte yop;

⁵Hüyange taowe ahngpate “Ahngpawe mongma-a hüyange nang shaoshanpawe tongpuwa üting she teihma-a, ü-pajeiyonglan mujing chingnyu Judah kahtokte, menge ngohpu linge yelak jingne tao yeshih nüng.”

⁶Ahngpawe ahngyha, I phin me shotte angyange taowe tongpu te monge jan. Iye üte tong, “Nang hipak hangshin laowe tailak hüyange nang aope leih yekülak?” Hüwante taowe Ite üpong tüowe ngaowe tam.

⁷Üne-o taowe ahngpate tong: “Ahngpawe mongma-a Euphrates henyip yekao yenghoi me ngohpu governorlante taine tampu nyanpu lai, tao Judah kahtok man ngoi manngoi she linne taipu oklak shepu nyantam khu she yoppe tong.

⁸Üne-o ahngnok phaojong (Fandei) te leipa Asaph tangte, khümjing yomtep peten, chingnyu jantpe, hüyange tao ngohlak nok tüolan khongkümpu welingwante yahlak shongnyu hei pelao ne menglak, hüyange wongpong ne mengpu peelan üte pha ne tamlak nanjingne nyanpu lai ja ahngpawe nyan-e tamlak jingne tong.” Hüyange Kahwang ü-phei omme ngohpu kaiye, ü-wongpong khongküm ahngpawe phawe ok.

⁹Ahngpawe ü-phei jamme woipalan ütam hüyange koipong pheipu nyahpong ükhong ja shon; hüyange Euphrates henyip yekao te tao yayong, Tüoyekao me taowe ahngpawe nyanpu lai governorlante pha.

¹⁰Hüpoi Beth Horon ching mepu Sanballat, hüyange Ammon yenghoi mepu woipa yome ja Tobiah, imniye Israellante paotüklak jingne kahta ja ngoiküki she jaiwante yeonge mongmeng.

¹¹Tao Jerusalem ngoi, hüyange tüome nyih lüm mongme ngoh.

¹²Kahwange üte Jerusalem jingne hanghe toi linglak jingne henge tam, ao te-o yengaope ngoh. Hüwante phawo me tao shinlao, hüyange ü-phei pulan ütam woiyange tao yayonge tai. Toman phei-a tao ongyange peipu gado ja shingha yinmok üne-a woiyange tai.

¹³Hüyange tao wangnyak me Kahjee Peten, Hiyan yengpeiwo ngohpu hüyange makshok Peten yekaote tai hüyange mengtephei Jerusalem jantpelan hüyange tüome vün ne hah-e kümtephei Petenlante leiye pong.

¹⁴Tüophei me tao chingnyu heong yekao me yengpeiwo Peten hüyange ahngnok yengtung apyekao te wen. Hüpoi hüwante tao shotpu gado tailak ne nyoi yenangpe ngoh.

¹⁵Tüokhei tao Kidron kahjee te lai hüyange ongyange jantpe te leiye kem. Tüophei me tao peipu lamte muh leih ye hüyange kahjee peten kaiye tao chingnyute leih ye.

¹⁶Tao ümpeyekao te tai, hangheyin toi ling, woipalan jawe nehoi yeshing. Hangjingne tüopa jeng üne-o taowe Judah lante, ngengpalan, üyonglan, wanglam lampalan, hüyange ülao kahta ao te-o toi linglak taowe yengao.

¹⁷Tüophei me taowe imante i, “Numan-e teman yatuhshao ümeng me ngohpu ngenang, hangke Jerusalem heamteiye hüyange tüopa tepu petenlan vünne hahkümteiye ngohnang! Kei, Jerusalem chingnyu jantpenyulan teman-e linge yehah, hüma-a teman wüotüopu yenanglak.”

¹⁸Hüyange ü-Kahwange üte meipu, hüyange ahngpawe üte ngaopu ngao khongküm imante i. Hüwante iman-e i, “Kei, teman yayonghah hüyange nok-a linge yehah!” Hüyange toimei linglak shinge iman wongnange ükong wangne yong.

¹⁹Hüpoi aope Sanballat, Tobiah, hüyange Geshem she minpu Arablan-e, toman-e hanghe lingne she teih yong, tüopa jaiwante, iman-e tomante nyitam hüyange i, “Numan-e lingpu hatüowa hang ngeih she teihpu? Numan-a ahngpa phei tüi-e yongne ikü a?”

²⁰Hüwante taowe jan-e i, “Wangdang Kahwange tomante okpu ngetam phalak, toman-a I shaoshanpalan, hüyange nok linge yelak jingne toman yayong nang. Hüpoi Jerusalem me numan jing hango meitam yenang, hüyange numan jingne hango yenanglak.”