Read Konyak Naga NEHEMIA 4 Bible Online

NEHEMIA 4 - Konyak Naga bible

NEHEMIA 4

¹Aope toman-e jantpenyu-a linge yenangki she Sanballat-e jai, I mongshih ngaiye mongmeng hüyange Judah lante phoiwüm-e nyitam.

²Hüyange Iye I jeiheinaolan hüyange Samaria nyahponglan sheshao me ngaowe i, “Tüolan wong yenangpu Judah lan-e hang lingpu shi? Iman-e iman nying nyingke yonge oklak a? Iman-e toidopu phapu kaiye nyih ja mongme toi lingpuwa sho oklak she teihpu a? Phongyange ngohpu, vünne hahyang phei mepu longlan-a üla ne linge iman-e linge yepu oklak a?”

³Ishongme Ammonlan Tobiah yongyange ngoh, hüyange Iye paowe i, “Iman-e hangkihpu jantpenyu linghümpu? Hiyan jawe nehoi tüopa-a shunge toitaipu oklak!”

⁴Taowe yop, “Jaihuyah, O Kahwang, hangjingne tomante phoiwümme tamteki; iman-e phoiwümpu ngaowa leihye-e iman shangme kitamshih, hüyange iman-a rhapalan phowe angjing yinching kahmük me imanjing khongküm nyieyahne tamyange angtamshih.

⁵Iman-e lingpu ünu jingne ümeng tahwin hüyange iman-e lingpu ünu tahpe; hangjingne iman-e toi lingpalan sheshao me mongshih ngaiye nangte phoiwüm teki.”

⁶Tüokhei toman-e jantpenyuwa yelakpe ling hüyange jantpenyuwa linge inpu ütangye wosat ngoiye linge in, hangjingne kahtalan-e linglak jingne yeonge hoongli mongong.

⁷Hüpoi aope Sanballat hei Tobiah, hüyange Arabia hei Ammon, hüyange Ashdod kahtalan-e Jerusalem jantpenyu lingpuwa yelakpe, hüyange menge ngohpuwa lingkhan lingnangki she jai, hüwante iman yeonge mongshih ngai.

⁸Tüokhei iman khongküm jamshe lowe noksa me taisheng yange Jerusalem phei tüi-e hoklak iman phei hoklak jingne kon ling,

⁹hüpoi toman-e toman Kahwangte yop hüyange iman phei hoklak jingne wangnyak wangngai kahtalan yomme ang.

¹⁰Hüpoi Judah kahtalan-e hüke i: “Hangki yih kiyange teman wong yenangpe tainangki; makke nyate-phei üne-o winlak üngang ngohnang, teman-e jantpenyuwa hangke pelak?”

¹¹Hüyange wepalan-e hüke teihnang: “Teman-e iman ngohpu hotan ngoiye manpei manpei hüyange iman toiyange toishaowa lakne mantam mantam iman-e yeshinglak hüyange ye-ngelak.”

¹²Tüoyangpoi iman shongme nyoipu Jehudilan toman tangte pei-e pen phei nyei-e hüke i: “Ümpeyekaote numan lüplakeih, iman-e temante shumphalak.”

¹³Tüokhei taowe kahtalante yanglow hei ngou, üne-o wenglah jonyange, ümeken nyoi me manshope ngoh, tüolan nyoi me jantpenyu tokphei ye me puhu puhu yongne tam.

¹⁴Kahtalan mongshangpu taowe nge, tüokhei taowe iman, iman woipalan, hüyange shaoshanpa woipalante i, “Numan-e teman wepalante nyam-e tah ngoh. Youngwanpa ao üyongpa ngohnang hüyange nyamlakpa ne ngohnang, I teihtüo yah, hüyange numan, numan hayimlan hüyange yhalalan, numan shekonyulan hüyange noksalan jingne wehok tüoh.”

¹⁵Hüyange aope toman-e tüopa-a shingteki she toman wepalan-e jai, hüyange Kahwange iman kon ükeng ne menge tam; toman khongkümpu jantpe shongte leihye hüyange kahta lili yoi toishao me yong.

¹⁶Hüyange tüopa hipak mepu wange ü-kahtalan jakih-e tam-e toi lingne tam hüyange iman jakih tam-e ngou, ree, wenglah, hüyange yan phakshaoh wangman-e shaohyange, hüyange wanglam lampalan Judah jat khongkümpu tokphei yeme yongne tam.

¹⁷Aoyinne jantpe ling, hüyange aoyinne hangki sheih, kahta lili yak jaye kaowe toite jon hüyange jaye kaowe ngouyang jon.

¹⁸Hüyange kahta lili aoyinne toi lingnang yoi yoi shieng me yanglow japong leap ne tam; hüyange nyawong wünge tamlakpa-a ü-phin me yongne tam.

¹⁹Hüyange üyonglan, wanglam lampalan, hüyange kahtalante taowe i, “Linglak toishaowa khaonang hüyange te-shaiye ngoh nang, hüyange jantpenyu tang me teman sheja hei sheja pa me jamloi jaiye ngohnang.

²⁰Nang ümeken me ngohlakei ngohyapoi, aope nyawong wüngpu jailakei, hüwante muh ü-ngohjing te jemkei teman Kahwange teman jingne hoklak.”

²¹Tüokhei nyih jeih she wangngaipu phei jam she yongpuwa shanhalan manngai manngai, toman tangkhüw ja-a jantpenyu me toi ling, hüwante tangkhüw ja-a ngou phei yomme yong.

²²Tüopa hipak me yakjongpa ne mengpu kahta lante taowe i, “Iman hüyange imante jamme pongpulan wangnyakma-a Jerusalem me ngohtüoh, hümme nakshih toman-e wangnyak me chingnyuwa yompu oklak hüyange nyihning toi lingpu oklak.”

²³Tüokhei taowe jeyah, ü-jeiheinaolan hüyange shaoshanpalan yejema-a ü-phei te woipu yompalan ne jeyah, toman aowe-o nyemo yekhok. Toman khongkümpuwe yak mepu ngou hei yang phei yeyanpe ngoh yangki.