Read Konyak Naga NEHEMIA 5 Bible Online

NEHEMIA 5 - Konyak Naga bible

NEHEMIA 5

¹Sha-a kahtalan maawe sheko netan moini nangyange iman pheipu jeiheinao Judahlan phei tüi-e ngao ngai.

²Ütam jawe i, “Toman-a nokpang nokne ngohnang, toman üyin ngohlak jingne tah wongpong ne ngai nang.”

³Ülao lan-e i, “Seanyao yenglepu mepu yinlak jingne tah hei cee jingne toman-e toman kah, wuwünglick pesha hüyange noklan penge kümnangki.”

⁴Üne-o ülaolan ütam-e hüke i, “Kah hüyange wuwünglick pesha lan jingne ahngpate kahngin phalak jingne toman-e ngin sea yah.

⁵Toman-o toman pheipu Jehudilan phei meitam ja. Iman hayim meipu kih-e toman hayim-o yemeipu a? Hüpoi toman-e pa-a toman hayim rha ne menge tamlak ne ngai nang. Toman yhalalan ütam-a rha nyu ne yüoteki. Toman me shaaji wong yenang, hangjingne ima-a toman kah hüyange wuwünglick pesha toman mepu yah teiteki.”

⁶Aope taowe iman yemeipe moppu jai tao yeonge mongshih ngai;

⁷hüyange ngaolak jingne tüm. Taowe woipalan hei wanglam lampalan hüyange kahtalan phei tüi-e bangjem nyik, hüyange imante i, “Numan-e numan pheipu jeiheinaolan te shaoshi yateng pha nang!” Shaoshi pongpu ngaolan ilak jingne taowe ükhong bangjem ja nyik;

⁸hüyange hüke i, “Teman pheipu Jehudi jeiheinaolan iman nying nyingke yinhu jatte yüoyangpu shakke leihyelak jingne, okpu shinne toman ngang yangki. Hüpoi sha-a numan-e nangjei nangnaolan iman nying nyingke numante numan pheipu Jehudilan yüopha she kangnang!” Woipalan wünge mah hüyange ngaoja nehoi yengai.

⁹Hüwante taowe i, “Numan hanghe lingnang tüowa yeshu! Wepalan-e temante phoipu jingne üne-o numan-e Kahwangte nyampu me yekemlak a?

¹⁰Üne-o taowe, ü-jeiheinao hüyange shaoshanpalan-e imante ngin hüyange tah hei cee seatam nang. Chingmei lamlinge teman-e ngin hei nükte küw tahyam hah.

¹¹Taowe yoppe tongnang, numan-e yah ngohpu iman jing kah, wuwünglick pesha, olive kah, hüyange nok üne-o nginte ngin paowe yampu, hüyange tah, wuwüngti hüyange minnga, numan-e yah ngohpu khongkümpu tenyih muh leih yetam tüoh!”

¹²Hüwante woipalan-e jan-e i, “Leih yetamhah hüyange iman mepu hango yeyahlak; Nange ipuke toman-e linglak.” Hüwante taowe ngengpalan nyikyange janpu kih-e iman-e jonlak jingne jiengjep ne tam.

¹³Tüophei me, taowe ü-shieng me hityange ngohpu shienghit nye yahpuwe konge hüoyange hüke i, “Kahwange tüokih-e, aoyinne janpu yejonlakei konge winlak.” “Kahwange nenoklan hüyange nangme nangpu khongküm yahteiyange nang ükeng me tüoh phalak.” Aoyin tüome omme ngoh moilan-e i “Amen!” Hüyange Youngwanpate minyong pha. Hüyange woipalan-e iman-e janpu ang.

¹⁴Üne-o Judah kahtok me tao governor ne lepu hipak mepu Artaxerxes ahngpa wanglam lampu wangpeng da shepupa mepu delüm me ni shepupa hatüo wangpeng pen me ni, tao hüyange ü-jeihei naolan ne governor hahying yehah.

¹⁵Ü-sheshao me aoyin governor ne ngoh; iman-e bangnyuha mepu ümee jamloi yah, hüke kahngin ne khüm ngin ükhüw deli yahyangpu tokte üne-o hahying hei wuwüngti iman mepu kang; hüke muh iman phang me shaoshanpalane-o bangnyuha tangme wong loishe jon. Hüpoi taowe hüke jon, hangjingne tao Kahwangte nyam.

¹⁶Tüo nanlei Taowe ü-wong khongkümpuwa jantpenyu linge yelak pha hüyange moth hei kat hango yowe ye-ang. Üjingne aoyinne toi ling, iman lili jantpenyu linge yepu me ü-phei jamyangki.

¹⁷Üne-o taowe hahpu khao me, neikon-e ngohpu yinhulan aoyin toman tangte pei, iman tokte kaiye, Judahlan hüyange, wanglam lampalan kahta gho ja phei me denga nyih jeih she jamme taowe uhyangki.

¹⁸Nyih jeih she taowe hahying tümwante mahu üpong ja hüyange shemeipupa nyee wok ngoiye, hüyange awhalan üngang tümyangki. Hüyange nyih pen mong me shemeipupa wuwüngti taowe phayangki. Hüpoi taowe governor jawe tüo hahshepu hahying aope-o yeyu; hangjingne kahtalan tangme sheappu sheam-a yih-e shayange ngoh yangki.

¹⁹Taowe nangte yopnang, O Ü-Kahwang, kahtalan jingne taowe hanghe ling, tüojingne tao teih tüoyah.