Read Konyak Naga NEHEMIA 6 Bible Online

NEHEMIA 6 - Konyak Naga bible

NEHEMIA 6

¹Aope jantpenyuwa shoteki, shaaji heamtepuwa towe yenang she Sanballat, Tobiah, Arab lan Geshem, hüyange towe ngohpu wepalan-e jai, tüoyangpoi tüo hipak me üne-o Peten me taküp mansha pe ngoh,

²hüwante Sanballat hei Geshem niye ü-tangte ngaolan shonne i, kei teman Ono kahjee me chingshao ja me jamme hüohah. Hüpoi iman-e üte ümeng linglak jingne teih.

³Hüyange taowe imante ngaolan kipa shonne i, “Taowe toinyu ja lingnangki, tüokhei tao laine ye-oklak; tao numan phei hüone laiyangpu jingne lingne ngohpu toishao lakne ye-ok.”

⁴Iman-e tüopa ngaoja muh iye ün peli ngoiye shonne pei, hüpoi peipu lep iye taowe jakih muh janne ye.

⁵Tüophei me nga shepupa Sanballat-e shaoshanpa ja nyanpulai epyang phei yahyange ü-tangte shon:

⁶Tüopa me hatüolan nyanyange ngoh: “Neikonne ngohpu jatlan tangte tüopa ngaolan peiteki she Geshem-e hatüo ngao üte hüke i; hüke nang hüyange Judahlan-e mopngailak jingne teihnang, tüojingne nange jantpenyuwa lingnangki; üne-o tüopa ngao jaipu me nanga iman ahngpa ne menglak;

⁷hüyange Judah kahtok me ahngpa ja ngohnang she Jerusalem me nang jeng ponge tamlak jingne nange hipalan le; hüyange tüopa ngaowa sha-a ahngpa tangte teilak. Tüokhei peikei teman-e jamshe showe tümhah.”

⁸Hüwante taowe I tangte shonne i; “Nange hanghe yin iyapeih ja-o ütingne yeje; Nange nang nying nyingke tüolan khongkümpuwa linge ngaopu hei ngohnang.”

⁹Hangjingne iman khongkümpuwe toman nyam-e toi yelingpe lakke tamlak jingne ling. “Iman yak-a toi me wong yenangpe ngailak, hüyange hatüo yelinglak she iman-e teih.” Hüwante taowe yop, hüpoi sha-a, O Kahwang, nange ü-yak wong nange tampha!

¹⁰Tüolan nyih hipak me Mehetabel ühu Delaiah üha Shemaiah, ao Inok mepu taine ye-okpe ngoh, I phei hüolak jingne tao tai. Iye üte i, “Nang hei tao taiye khümjing mepu Üjao nyoi me taküplan küpyange jam-e lolak yang, hangjingne iman-e nang toi ne peiküki. Wangnyak ja me iman peilak hüyange nang toilak.”

¹¹Taowe janne i, “Phette taiye lolak kahta ne tao yeje, Tao khümjing me lopu kaiye ü-üyin yinlak she nange teinang kü a? Taowe hatüo kih yelinglak.”

¹²Aope taowe tüopa jingne teih nyüo, Shemaiah te Kahwange ngaowe tampu ne yeje she taowe shinge pei; hüpoi Iye ü-phei tüi-e hi-ngao ngaolak jingne Tobiah hei Sanballat niye Ite yakjai pha.

¹³Hüke tao nyam-e tamlak hüyange nyampuwe ünu omme tamlak hüyange üme ngaolan ümeng ütam iman-e nge oklak hüyange üte phoiwümlak jingne konphei I yoh yangki.

¹⁴Taowe yop, “O Kahwang, Tobiah hei Sanballat niye lingpu toi teih tüoyah hüyange imante shaoshi tamshih. Hüyange hinyu Nodiah hüyange ülao hipalan khongkümpu aoyinne üte nyam-e tamlak jingne ngang teih tüoyah.”

¹⁵Hüke jantpenyu linge peipu nyih denga me ni me, Elul leat da me nga shepupa me tüm.

¹⁶Aope wepalan ne tüopa jai, neikon-e ngohpu jatlan kümpuwe tomante nyam hüyange yeleihupe ngai; hangjingne hatüowa Kahwange jampu toishao yang she iman-e shing.

¹⁷Tüopa ju hei wan khongkümpu me Jehudi woipalan-e Tobiah phei teishin pongpu ngoh yangki.

¹⁸I küo Jehudi kahta Arah üha Shecaniah ngohpu jingne Judah kahtalan maapu I phei ngoh yangki. Tüopa tokte Iha Jehohanan-e Berekhiah üha Meshullam yhala yah.

¹⁹Kahtalan-e ü-sheshao me Tobiahwe lingpu toishao ümei jeng ngao, hüyange taowe hanghe yin ngao I tangte peiye ngaowe tam. Hüyange Tobiahwe tao nyam-e tamlak jingne nyanpulai shonpu yelak.