Read Konyak Naga NEHEMIA 8 Bible Online

NEHEMIA 8 - Konyak Naga bible

NEHEMIA 8

¹Aope lekeng nyit shepupa ngoi Israel kahtalan khongkümpuwa yoi yoi chingshao me nyoiküm. Tüopa leat tepu üwangpa nyih Jerusalem me Yeng peten mong kahjee me iman khongkümpu jem. Iman-e Ezra ngengpa hüyange Israel te Mosa kaiye phapu Ngaokhüm tepu Ütahpa te Ngaokhüm laitep ngailak jingne tong.

²Tüokhei ümeken me sheko netan, hüyange nahalan, aoyin shinge okjang pulan jem-e ngoh tüoken te Ezrawe nyit shepupa leat üwangpa nyih yah pei.

³Tüopa nyoi peten mongme yongyange Iye Ngaokhüm-a shom mepu ünshao ngoiye shinge okjangpu kahtalan jem-e ngohpu yo me i, hüyange iman khong kümpuwa yeonge mong phawe jai.

⁴Tüokihpu hipak jingne lingpu pee phei lingpu lengjong tangme Ezra yong. Hüyange I yakjah ye me tüolan kahta yong. Mattithiah, Shema, Anaiah, Uriah, Hilkiah, hüyange Maaseiah; hüyange I yaknya ye me tüolan kahta yong: Pedaiah, Mishael; Malchijah, Hashum, Hashbaddanah, Zekharia, hüyange Meshullam.

⁵Kahtalan üshei phei shedaopu lengjong me Ezra yongpu jingne, iman khongkümpuwe Ite mükshaoh-e lei. Iye laitep eppu phei jam she, iman khongküm yong.

⁶Ezrawe i, “Üyongpa Kahwang Youngwanpa min yongtüoh!” Kahta khongkümpuwe wangyete iman yak hong hüyange jan-e i, “Amen! Amen!” Hüyange iman sheta kahtokte khuhtayange yoppe khüm-e Youngwanpate khüm.

⁷Hüwante iman yayong hüyange yoi yoi nyoi me yong, hüyange tüolan Levilan-e Ngaokhüm jeng khoih-e i: Jeshua, Bani, Sherebiah, Jamin, Akkub, Shabbethai, Hodiah, Maaseiah, Kelita, Azariah, Jozabad, Hanan, hüyange Peliah.

⁸Hüyange Kahwang ngaokhüm laitep mepu meimeiye iyange iman-e lüppe i; tüokhei iye hüopuwa kahtalan-e shinge yah.

⁹Aope kahtalan-e Ngaokhüm me hanghepa yah hu tüopa jaiwante imante yeonge shah hüyange iman üngwünne shapne wang. Tüokhei Nehemia, ao governor ne ngoh, Ezra ngengpa hüyange Ngaokhüm tepu ütahpa, hüyange Levilan iman aoyinne ngaokhüm mei meiye nyüowe tamnang kahtalan khongkümpute hüke i, “Tüopa nyih-a nang Kahwang Youngwanpa jingne üjao nyih ngoh nang, tüokhei numan tahshap yejema-a mang tahshap.

¹⁰Sha-a nokte yetüoh hüyange momotüoh. Numan hahying hüyange wuwüngti wange yenangpalan phei teitamtüoh. Tenyih-a teman Kahwang jingne üjao nyih ngohnang, tüokhei mong tahmeng. Numante Youngwanpawe phapu mongmei-a numan jingne wong.”

¹¹Tüokhei Levilan-e kahtalan khongkümpute mong toloimei ne tam-e i, numan jünge ngohtüoh, hangjingne ima-a tenyih-a üjao nyih ngoh nang; numan mongmenge tahngoh.

¹²Tüokhei kahta lili nokte yan hüyange mongong mongle puphei hahying hüyange iman me hanghe ngoh eihalante teitam-e pha, hangjingne ima-a imante hanghepa iye hüo iman-e shinge yah.

¹³Üne nyih puhu tepu üshanglan, ngengpalan hei Levilan phei jam-e, iman khongküm Ezra tangte Ngaokhüm me nyüopu yamlak jingne jem.

¹⁴Hüyange Youngwanpawe Mosa te phapu ngaokhüm me iman-e hüke nyanyange nge; Israel kahtalan-e nyit shepupa leat me mo ma-a peamshem me ngohlak yang.

¹⁵Hüyange chingnyu üshei yeme hüyange Jerusalem me iman-e hüke ponglak yang; “Kahtangte ongtüoh hüyange nyanyange ngohpu kih-e peamshem welak jingne yankhek pee, olive pee, myrile pee, log pee, hüyange ülao peelan mepu pequilan jemtüoh.”

¹⁶Tüokhei kahtalan taiye tüolan toinan yahye yange kahta liliye yoi noktok me, nokshao me, hüyange khümjing nokshao me Yeng Peten üko hüyange Ephraim Peten üko me yoi yoi nying nyingke peamshem we.

¹⁷Hüyange aoyin phowe teiye ngohpu mepu leihye yange jempu ngoh, iman üsheiye peamshem-a we hüyange tüome ngoh; hangjingne Nun üha Joshua nyih hei hipak mepu wange tüopa nyih te ngoiye Israel kahta lan-e hüke yelingpe ngoh pei: hüyange kahta lili hoongli mongongpu üyong ngoh yangki.

¹⁸Hüyange nyih jeih she, üwangpa nyih mepu ükümpa nyihte ngoiye iman Kahwang Ngaokhüm laitep mepu i. Hüyange iman-e nyih nyit ngoiye mopuwa ngoh hüyange tet shepupa me ükümpa mo shüppe jempu ja wanglam kih-e iman-e ngoh.