Read Konyak Naga NEHEMIA 9 Bible Online

NEHEMIA 9 - Konyak Naga bible

NEHEMIA 9

¹Sha-a tüopa leat da me peli shepupa me Israel kahtalan monnye inyange, hüyange iman tangme sham phoyange nyaoleye jem.

²Hüyange Israellan iman nying nyingke yinhulan mepu yoi yoi ne yong; hüyange iman yoi ünu hüyange pajeiyonglan-e ompu ünu toishao jingne ünu ümeng jan.

³Ghonda lüm nanjing mongme iman Kahwang Youngwanpa Ngaokhüm imante iye hüo, hüyange ünepu ghonda lüm nanjing me iman-e iman ünu jan hüyange iman Kahwang Youngwanpate yoppe khüm.

⁴Levilan jingne lengjong ja ngoh, hüyange tüopa tangme Jeshua, Bani, Kadmiel, Shebaniah, Bunni, Sherebiah, Bani, hüyange Chenanilan yong. Iman-e iman Kahwang Youngwanpate üngwünne yop.

⁵Tüolan Levilan-e yoppe khümlak jingne hüke nyik: Jeshua, Kadmiel, Bani, Hashabneiah, Sherebiah, Hodiah, Shebaniah, hüyange Pethahiah. Iman-e i: “Yongtüoh hüyange nang Kahwang Youngwanpate min yongtüoh; Ite jin jintepu jingne minyong phatüoh! Kahtanyuhawe minyong phapu me wange ye-ok yapeyoi, kahta liliye I müktishiwa minyong tüoh.”

⁶Hüyange tüophei me Israel kahtalan-e tüopa yoppu yopyangki: “Nang, Youngwanpa, nang shaha Youngwanpa ngohnang. Nange wangdang hüyange wang me ngohpu shanhalan linge ngai. Nange kahtok hüyange yengching hüyange tüolan me ngohpu khongküm ling; nange khongkümpute üyin pha. Wangdang üngan lan-e nangte ümme khüm hüyange yoppe khüm.

⁷Nang, Youngwanpa, Kahwang, aowe Abram le hüyange Caldialan kahmük Ur mepu woi pei; Ite Abraham min leiye tam.

⁸Hüyange nangte ütinglakke okpu nange I me nge, hüyange nange I phei jiengjeppu yah. Hüyange nange Kananlan, Hitlan, Amorlan, Perizzlan, Jebuslan, hüyange Girgashlan ngohpu kahtok Iye hüyange I huhayimlan te phalak jingne jan. Hüyange nang ngao toine menge ling, hangjingne nanga üjaopa.

⁹“Nange Egypt kahtok me hangke toman pajeiyonglan shaoshi, tüopa ngeyangki; hüyange Ütak Yengching me iman-e üngwünpu ngaowüng nange jai.

¹⁰Ahngpa (Pharaoh) sheshao me hüyange I kahtalan hüyange iman kahmük kahtalan nopute nange yepinlakpa hüyange yashan yali hüowe tam; hangjingne nange shing, iman-e otawe tüolan phei tüi-e jon; hüyange tenyihpu kih-e nang min shinge tam.

¹¹Hüyange iman-e yengching hotan kaiye kahwan tok me linne tailak üne nange yengchinga tangetam; hüyange imante jange woipu wepalan-a Yeng Üyongpa ümong me long ja kih-e, yenglu pume mahtam.

¹²Nyih ning me wangphom phei nange iman woi, hüyange wangnyak me nange iman lamnyu vün phei toon.

¹³Nange üne-o Sinai kahtang tangme yu, hüyange iman phei wangdang mepu ngao hüyange iman te ngaoting ngao phünpu hüyange ngaoting ngaokhüm linglak ngaokhüm hüyange nyanpu ngaokhüm pha.

¹⁴Nang jing üjao Sabbath jaowe anglak jingne nange imante nyüo, hüyange nang shaoshanpa Mosa kaiye nange nang ngaokhümlan pha.”

¹⁵“Aope iman seanyao, wangdang mepu an nange imante pha, hüyange aope iman yengle, longnyu mepu yeng ngaine tam. Nange pha ne janpu kahtok yete taiye ngohtüoh she imante i.

¹⁶Hüpoi iman-e hüyange tomanjing pajeiyong lan-e otawe üngei ne menge nang ngaokhümlan yejaipe lak.

¹⁷Iman-e nang ngao yejai; iman sheshao me nange lingpu yashan yali toishaolan iman mongjang me teih yepei; hüpoi iman üngei ne menge ngao yejaipu hüowe üne-o nishe sha-apu liengjeng yafün te leih-e yelak iman-e woipa ja le. Hüpoi nanga ümeng winne okpupa Kahwang, shüpshe hüyange kenpuwe maawe ngohpu Kahwang mongshih ngailak monglüowe, shüpshe wangman-e ngohpu Kahwang, tüokhei nange iman yetüoh.

¹⁸Iman-e mahu üpong lepu me moung ling, hüyange hatüowa iman Egypt mepu woipeipu kahwang üja she i! Hangshin iman-e nangte yaowe letampu, Youngwanpa!

¹⁹Hüpoi nang shüpshe jamloipu jingne nange iman phaonyu jongme winne yetüoh; nyihning lamwoipu wangphom shongnyu hüyange yaning vün shongnyu kaiye wangngai hüo; hüyange iman taipu yekao me lam hüolak jingne iman yewintüoh.

²⁰Nang meiyahpuwe iman-e hanghe linglak nange imante i; nange iman manna phei uhying hüyange yinglak jingne yeng pha.

²¹Wangpeng deli nange iman phao me tam, iman hanghe me-o toinan-e yetüoh; iman nyemo ülangne menge yetai, hüyange iman ya peak-e yengai.”

²²“Nange imante jatlan hüyange ahngchinglan chinghah ne tam, iman-e ompu kahtoklan mepu yikeng ponglan: Iman-e Heshbon kahtok ümeken me Sihon ne wanglam lam, hüyange Bashan kahtok ümeken me Og ahng ne meng omyangki.

²³Iman hayim wangdang shanhalan kih-e nange jaalun-e tam, hüyange iman pajeiyonglante hanghepa kahtok phalakei she jan, tüoken te nange iman woipeiye tüoh.

²⁴Iman-e Kanan kahtok omme yah; tüome ngohpu kahtalan nange okne tam. Kanan ahngpa hüyange kahtok kahtalante iman-e hangke linghu hüke linglak jingne nange nang kahtalante wong pha.

²⁵Nang kahtalan-e chingtuk pepe yangpu chingnyulan hüyange üyao ngohpu kahmük-a iman-e yah; hüyange tüome toinyu nanhawe maawe ngohpu noklan, shaoyange ngohpu yengkooklan, olive peelan, ülick pheipu peelan, hüyange wuwüngkahlan wangman-e iman jingne meng. Iman-e wangman-e hah hüyange ying hüyange nütte mah; nange meiye paowe tükpu jingne iman mongmei.

²⁶“Hüpoi nang kahtalan-e mopngai hüyange nang ngao yejai; nang ngaokhüm tokphei yeme winne tüoh. Hipalan aoyinne iman nang tangte leih ye tamlak jingne saki pha, iman toi hüyange hipak phe me iman-e nangte yaowele.

²⁷Tüokhei nange iman wepalan-e naoyange iman tangme wanglam lamne tam. Shanghah shaoshi hipak me iman-e üngwünpu ngaowüng wangdang mepu nange jai, hüyange nang shüpshe üyonge, iman wepalan yak mepu yinne anglak jingne nange imante yinne tampalan pha.

²⁸Aope chingmei pei, iman-e üne-o ünu ling, hüyange üne-o nange iman wepalan-e iman tangme naone tam. Tüoyangpoi aope iman monglüp hüyange iman yintampha she nangte tong, wangdang mepu nange jai, hüyange hipak phe me nang shüpshe üyong kaiye nange iman yinne muh tam.

²⁹Nange iman nang ngaokhüm phangte yah peilak jingne deingao pha; hüpoi iman otapuwe nang ngaokhümlan iman-e yeyah, nang Ngaokhüm jonpuwa üyin lamnyu ne mengyapoi; hüyange ngapa phakshan hüyange üngei ne menge ngao yejai.

³⁰Wangpeng ja phei me ja she nün-okpu phei nange imante deingao pha. Nange nang hipalante ngaowe tamlak jingne henge tam, hüpoi nang kahtalan-a na panne mah, tüokhei nange ülao jatlan-e imante naone tam.

³¹Tüoyangpoi nange imante yeonge shüpshepu jingne, iman lanshe mah ne yetam yejema-a winne yetüoh, hangjingne nanga yayeng hüyange shüpshe ngohpu Kahwang ngohnang!”

³²“O Kahwang, toman Kahwang, nang hangshin yongpu! Hangshin yashanlakpa, hangshin wongnangpupa! Nange jiengjeppe janpu nange khakshuwe angnang. Assyria ahnglan-e tomante shaoshi phapu hipak mepu, sha-ate ngoishe, toman hangshin shaoshi hümpu! Toman ahnglan, toman woipalan toman ngengpalan hüyange hipalan, toman pajeiyonglan, hüyange toman kahta khongkümpu shaoshi yangki. Toman hangshin shaoshi yangki teihtüo pha!

³³Tomante shaoshi phapu me nange khakshuwe lingyangki; toman-e ünu omme lingyapeyoi, nangepa-a ngaoting iye lingnang.

³⁴Toman pajeiyonglan, ahnglan, woipalan, hüyange ngengpalan-e nang Ngaokhüm tükke ye-ang ok. Iman-e nange phapu ngao hüyange deingao yejon.

³⁵Nange jamloi meipu kaiye nange imante phapu, iman-e wangmanpu hüyange üyao ngohpu kahmük ümei tüo; hüpoi tüome iman-e nang shao yeshan yejema-a ümengpa toishao mepu iman yelüp.

³⁶Leihuyah, tenyih toman rha ne ngoh nang, nange toman pajeiyonglante phapu kahmük me hüyange pelick wenglick hüyange shemeipupa hah hahshepu nanleiye, toman rha ne mengnang.

³⁷Tüopa kahmükke, ahnglan aoyin, toman ünu kaiye toman tangme nange ahngne menge tam, imante ülick ünyei lickke pha, toman tangta tangme hüyange toman jing yinmoklan tangme iman-e hangke mong hüke jonlak wong ngohnang, hüyange toman shanghah shaoshi üyong me ngoh nang!”

³⁸Tüolan khongkümpu jingne toman Israel kahtalan-e teijanpu jiengjeppu monge angnang, hüyange nyan-e angnang; hüyange toman woipalan, Levilan, hüyange toman ngengpa lan-e tüome iman min tüppe angnang.