Read Konyak Naga ESTHER 1 Bible Online

ESTHER 1 - Konyak Naga bible

ESTHER 1

¹Hatüowa Ahasuerus nyih hipak me ngai, tüopa Ahasuerus India mepu Ethiopia ngoipu mongme yenghoi gho ja da me nyit tang me wanglam lam.

²Tüopa nyih hipak me Ahngpa Ahasuerus Susa ahngjong chingnyu me ngohyange wanglam lam.

³Iye wanglam lampu wangpeng lüm shepupa me Iye I phang mepu üyonglan hüyange I shaoshanpalan khongkümpu jingne mongmeimo ja tüm. Persia hüyange Media nyahpong woipalan, hüyange yenghoi mepu ükhe-üyonglan, hüyange governorlan omme jem.

⁴Hüwante Iye ahngching müktishiwapu toinyu nanha hüyange I kheyongpu wangshüm üyong minyong ngampaipu nyih nangjange, hüke nyih gho ja detet mongme hüopu ngoh.

⁵Hüyange aope tüolan hipak ngoiye pei, ahngpawe Susa chingnyu me peiye ngohpu, üjoi üyong, kahtalan khongkümpu jingne, ahngnok pesha me nyih nyit mongmeimo tümyange ngoh.

⁶Shongpu inkhek ne, pengkhai üheng, wanghüng hase inkhek jhotyange, pengkhai hüyange phihlange lüpyangpu wu-e khüm shüptet phutti shongnyu me shinyange ngohyangki. Nyenglak shotjinglan-a hon hei khüm, phutti long Ütak, hüyange üheng, phihlangpu hüyange ünyakke janpu tangme shotne ling.

⁷Yinglak wan khongkümpu hon wan shaha, wan ni nehoi teilepu yenang, hüyange ahngpa wuwüngti üngang, ahngpa me nangpu phei phinne iman te pha.

⁸Yinglak jingne halan hei yinglak she itpu yenang; ahngpawe ahngnok me shaoshanpalan te kahta liliye yoiye hangke mong hüke kangpu yenangpe yingne tamtüoh she ngao pha.

⁹Hüwante muh, Ahngyha Vashtiye shekolan jingne Ahasuerus ahngnok nok mongme mongmeimo tüm.

¹⁰Nyih nyit shepupa me, ahngpa mong wuwüngti kaiye hoongli mongonge ngohwante, Iye moiko nyit, aoyin I shaoshanpalan ne ngoh, Mehuman, Biztha, Harbona, Bigtha, Abagtha, Zethar, hüyange Carkaslante nyik.

¹¹Imante kahtalan hüyange üyih-üyonglan te ahngyha naoyha meipu hüolak jingne ahngpa shongte ahngyha Vashti yha yoi Ahngyhanyu o o-yange woipeilak jingne ngao pha; hangjingne yha yeonge naoyha meiye ngoh.

¹²Hüpoi aope moiko shaoshanpalan-e Ahngyha Vashti te ahngpawe phapu ngaolan i, yhawe min pei she lan; tüokaiye ahngpa yeonge vün ngaiye mongshih ngai.

¹³Hüwante ahngpawe Ite konheingao phapa shinge manpalan, aoyinne toishaolan shinge üpong tüowe ngoh nang imante hangke linghah she nyik; hangjingne ima-a hüke ngaokhüm hei ngao phünpu üpong tüopalante ahngpawe tongpu wanglam ne ngoh.

¹⁴Hüyange I phang mepu aoyin phei ahngpawe konheingao teiyamnang, hüyange ahngching me shotjing ütahpa me shot, tüolan Carshena, Shethar, Admatha, Tarshish, Meres, Marsena, hüyange Memucan Persia hüyange Media üyonglan nyit ngoh.

¹⁵Iye tüolan kahta te i, “Tao, Ahngpa Ahasuerus-e ahngyha Vashti tangte ü-shaoshanpalan nyiklak jingne shon, hüyangpoi yhawe minpei she lan! Teman-e yhate hangke linglak she ngaokhüm me ngoh nangki?”

¹⁶Hüwante ahngpa hei üyonglan sheshao me Memucan-e jan, “Ahngyha Vashtiye ahngpa sheshao me shaha yeje, hüpoi üyonglan khongkümpute hüyange Ahasuerus ahngpa yenghoi üshei ye me ngohpu kahtalan te yaowe leyangki!

¹⁷‘Hangjingne Ahngpa Ahasuerus ahngyha Vashti te ahngpa shongte woipeikei she nyik, hüpoi yha yepei’, she aope tüopa ngaolan jai tailakei, ahngching me ngohpu sheko liliye tüopa ahngyha kon yah-e iman netanpalante yaowe le ne wanglak.

¹⁸Aope Persia hei Media mepu üyonglan shekolan-e Ahngyha lingpu nyoingoh iman-e jailakei, iman netanlante wanghe mannyip pemuh ngaokülak. Kenphe mepu shekolan-e iman netanpalan ngao yeyah külak, hüyange netanpalan shekonyulan te mongshih ngailak.

¹⁹Ahngpawe hatüo monge teihma-a, ahngpa ngaokhüm I mepu I teine tamshih, hüyange hatüo Persia hei Media lan ngaokhüm yo me nyan-e tamtüoh, hüyange hatüowa yejeilei oklak ne hüke shaaji Vashti-a ahngpa shongte yepeilak hüyange yha phei shemeipu ülao sheko ja te ahngpawe monghah tamshih.

²⁰Aope nange yantampu ngaolan ne tüopa jamloi kheyongpu ahngching me shinge peilakeih, shekonyu khongkümpuwe iman netanpalan üjoi hei üyong moiniye iyeshepu phakülak.”

²¹Ahngpa hüyange I shaoshanpa lan-e tüopa juteih meinangki she yah, hüyange Memucan-e hanghepa juteih pha hüke ahngpawe ling.

²²Ahngpa phang me ngohpu yenghoi üshei tangte, yoi yoi nyanpu wanglam me, hüyange yoi yoi ngao me yenghoi lilite, hüke netanpa lili yoi noksa me wanglam lampa ne menglak hüyange I tokte ao-o ye-angtamlak she nyanyange shon.