Read Konyak Naga ESTHER 2 Bible Online

ESTHER 2 - Konyak Naga bible

ESTHER 2

¹Phei me, ahngpa mongshih ngaipu nehoi lak tephei me, Vashtiye hanghe ling hüyange yha phei tüi-e yanyangpu ngaolan Iye teih tüo.

²Hüwante Ite shaoshanpu ahngpa shaoshanpalan ne Ite i, “Ahngpa jingne wangengoipu naoyha ümei yamne tamtüoh!

³Nange ahngching mepu yenghoi üshei me woipalan le ne ok, hüyange naoyha ümei yhashaohalan khongkümpu tüopa nang ahngjong nyoi Susa te yah jemkei she ngaopha tüoh. Nangjing shekolan tepu yakjongpa moiko Hegai te yomne tamtüoh, hüyange imante shemei yaomawe jongyane tamtüoh.

⁴Tüophei me nange shemei she lengpupa naoyha letüoh, hüyange Vashti nanleiye ahngyha ne mengtam tüoh.” Hatüowa meipu juteih ngao she ahngpawe teih, tüokhei Iye hüke ling.

⁵Susa me Benjamin nokphong mepu hüyange Kish hei Shimei huhayimlan Jair üha Mordecai she minpu Jehudi kahta ja ngoh.

⁶Aope Babilon ahngpa Nebuchadnezzarwe Judah ahngpa Jehoiachin Jerusalem mepu phowe tei, phowe teipu khong me Mordecai omme ngoh yangki.

⁷Iphei Esther she minpu üliyhanyu ngoh, aohinyute Hebrew me Hadassah she min; yha yeonge naoyha mei, hüyange pümheita meiye ngoh. Inyu Ipa liteiye, Mordecaiwe Iha ne meng hüyange yoiha ne menge jongne tam.

⁸Aope Ahngpawe I mepu ngaokeng üla yanne tam hüyange naoyhalan maawe Susa chingnyute jemne tam, Esther-o iman yo me omme ngoh. I-o Hegai yompu phang me ahngnok shekolan tüp me angne tam.

⁹Hegaiye Esther te ken, hüyange yhawe I mepu monghahpu tüo. Yhate shemeipupa hahying uhyinge hüyange yha pümhei tangta shemeipupa me tümme tamlak jingne Iye hipak yewinpe namno. Iye yhate shekolan tüp me shemeipupa nyoijing tam, hüyange ahngnok mepu naoyha nyit yhate namnolak jingne ünyeine lepulan ange tam.

¹⁰Sha-a, Mordecaiye hengpu kaiye, Estherwe yha Jehudi yha she shingne yetampe lowe ang.

¹¹Hüyange Esther hangke ngoh hüyange yha hanghe ne mengkülak hatüo shinglak jingne Mordecai nyih jeih she ahngnok longkon shekolan tüp phei tinge kemme yonge ngohyangki.

¹²Shekolante shemei yaomawe tamlak jingne namnowe paowe tükpuwa wangpeng ja hipak yah ngoh yangki; Üpe meipu minngawe lekeng wok mongme tangta linglak hüyange yeonge wünge pepu minnga phei lekeng wok linglak. Tüophei me naoyhalan ja phei me ja ja phei me ja she ahngpa Ahasuerus tangte woiye peiye hüolak.

¹³Aope shekolan tüp mepu yha ahngnok te peilakeih, yhawe hangke leng hüke tümyange peilak ngoh yangki.

¹⁴Yha ünpong me onglak, hüyange üne nap yha-a ülaopa shekolan tüpte teilak hüyange ahngpa phongphenyulan te paopa lingyangpu kahta Shaashgazwe leiye anglak, Yhate ahngpawe monghah-e teih-e hüyange min toonne yenyükma-a, yha ahngpa tangte üne-a ye-onglak.

¹⁵Ahngpa tangte peilak Esther jingne hipak peingoi. Esther-a Abihail yhala hüyange Mordecai üliyhanyu, aowe yoi ha ne yinne tam; hatüo Esther aoyinne ngelakei monghah-e leipu ngoh yangki. Aope yha onglak hipak ngoiyapeih, moiko kahta Hegai shekolan tüp tepu yakjongpawe hangke nyüowe tam hüke o-yange ong.

¹⁶Tüokhei I ahngne mengpu wangpeng nyit shepupa, lekeng pen shepupa hüyange Tebeth leat me, Ahasuerus ahngpa tangte I yoi ahngnokte Esther woi pei.

¹⁷Hüyange naoyhalan üshei phei ünyei ahngpawe Esther te ken, hüyange naoyhalan üshei phei ünyei I mepu yhawe shüpshe hüyange kenne teihpu tüo; tüokhei Iye yha shang me ahngyhanyu shaoshaoh shaohtam, hüyange Vashti nanleiye yha-a ahngyha ne menge tam.

¹⁸Hüwante ahngpawe I phang mepu üyonglan hüyange I shaoshanpalan khongkümpu jingne mongmeimo üyong ja hüke Esther Mo ling; hüyange ahngching nopu me sanyih ne menglak jingne ngaolan yan, hüyange ahngpa nanshange hünghao pha.

¹⁹Aope yhashaohalan nishe jem, Mordecai-a ahngnok peten me shot-e ngoh.

²⁰Hüpoi Esther jingne-a sha-ate ngoi she yha-a Jehudi yha she shingne mantam. Mordecaiye ao te-o hüng tah i she yhate i, hüyange I phang me sheko naha ja ne ngohwantepu kih, yhawe I ngao jai.

²¹Mordecai ahngnok me toishao me ngohwante, Bigthana hei Teresh ahngnok yomlak jingne moiko kahtalan yo mepu ni aoyinne ahngpa shinjing tüpte ongpu taten yomme ngoh, Ahngpa Ahasuerus phei tüi-e we ne menge yong hüyange I toilak jingne konkon.

²²Tüopa jeng Mordecaiye shinge pei, hüyange Iye Esther ahngyha te shingne tam; hüyange Estherwe hatüo jeng Mordecai min me ahngpate i.

²³Hüyange tüopa jeng yamne tam, hüyange hanghe ngaolan peiyangki hatüowa üting yang she shinge okyang phei me, imni moini lüntpe me takke toine tam. Tüopa jeng-a ahngching putahpangao me nyan-e anglak jingne ahngpawe ngao pha.