Read Konyak Naga ESTHER 3 Bible Online

ESTHER 3 - Konyak Naga bible

ESTHER 3

¹Hipak ütenja linyang phei me Ahngpa Ahasueruswe ahnghalan üshei tangme ütahpa Prime Minister shotjing me Haman shotne tam. Haman-a Agag huhayim Hammedatha üha ne ngoh yangki;

²Ahngpawe I phang me shaoshanpalan üshei te Haman te yahtuhshing yange hüyange Ite khümme wangshüm hüolak jingne ngaokhüm yan. Iman khongkümpuwe hangke i hüke ling, hüpoi Mordecai shahawe hüke minkhüm she yekhüm.

³Ahngnok me ahngpa phangme shaoshanpu ülao lan-e Ite i, “Hangne nange ahngpa ngaokhüm yejai ki?”

⁴Nyih jeih she iman-e Ite khümtüoh she kang, hüpoi iman ngao Iye yeyah. Iye hüke i, “Taowa Jehudi kahta ja,” “Taowe Hamante khümne ye-ok!” Tüokhei Mordecaiye hüke hüopu nyoingohte Haman-e nünne ngoh oklak jeya shi, she tüopa jeng iman-e ngaowe tam.

⁵Aope Mordecaiye yekhüm, yejema-a Ite wangshüm yehüo she Haman-e nge ok, hüwante Haman yeonge mongshih ngai.

⁶Hüyange aope Iye Mordecai-a Jehudi kahta she jai Iye Mordecai shahate yeje Jehudilante shenyei shepu ümeng linglak she tüm. Tüokhei Haman-e Persia ahngching khongkümpu mepu Jehudilan toilak she tüm.

⁷Ahngpa Ahasuerus wanglam lampu wangpeng pen me ni shepupa, üwangpa leat, Nisan leat me, Haman-e Iye lingne teihpu kon meng jingne lekeng hei nyih itte ngailak jingne, (hanghete iman-e “Purim” she nyik) phongyenglak ngaolan pha. Tüopa jingne lekeng pen me ni, nyih pen me lüm shepupa nyih, Adar leat me she tüm.

⁸Tüokhei Haman-e ahngpate i, “Nang ahngching yenghoi üshei me kahtalan yo me üshei yeme yanne jat ja ngohnang; hüyange iman wanglam-a ülaolan üshei phei yoi yoi ne ngoh nang; tüo shaha ne yeje iman-e ahngpa ngaokhüm yejon, tüokhei hüke tüohlak ahngpa jingne hatüowa nünne oklak ne yeje.

⁹Üyongpa nangehi monghah teihma-a, iman-a li ne tamlak she ahngpa ngaokhüm ja yanne tamshih. Nange hüke lingma-a, ahngching me shaoshanpalan jingne ahngnok ngin angjing me taowe khüm ngin kilogram lakh lüm haja deli phei nyeiye phalak.”

¹⁰Ahngpawe I yak mepu shüptet khokke yah, hüyange Judahlan wepa Agaglan Hammedatha üha Hamante hatüo pha.

¹¹Ahngpawe Hamante i, “Kahtalan hüyange iman ngin-a nangjing; nange hangke mong hüke imante lingtüoh.”

¹²Hüwante, üwangpa leat tepu nyih pen me lüm shepupa me Haman-e ahngpa yaknyanpalan nyik-e jem hüyange pongetampu ngao nyan-e tam-e ahngching üshei yeme yoi yoi ngao me lüplak hüyange nyanpu wanglam me nyanyange wanglam lampalan, governorlan, hüyange shaoshanpalan khongkümpute shonne yan. Hatüowa Ahngpa Ahasuerus min me nyan hüyange I shüptet-e tüpyange ngohyangki.

¹³Lai phei phetpalan-e ahngching mepu yenghoi üshei yete pongetampu ngaolan phei phet. Tüopa me ngohpu ngaolan-a, nyih ja mongme hatüowa Adar leat nyih pen me lüm shepu nyih me Jehudilan khongkümpu üjoi hei üyong, sheko hei hashih nahalan toilak. Iman-a shüpshe yenangpe toiwinlak hüyange imanjing khongkümpu nyieyahlak, she nyanyange ngoh yangki.

¹⁴Tüopa nyih peiwante moilan-e tüm-e ngohlak jingne, hanghepa pongtampu ngao ngohnang hatüowa yenghoi lili me ükhongte ngaiye jai ne tam.

¹⁵Ahngpa ngaokhüm kaiye pongetampu ngaowa Susa ahngjong chingnyu me moilante jai ne tam-e ling, hüyange ngaophei phetpalan-e yenghoi lilite ngaolan-a yahtai. Ahngpa hei Haman ni-a wuwüngti yinge shot, hüpoi Susa chingnyu püngkapa she nüngneipu ngohyangki.