Read Konyak Naga ESTHER 4 Bible Online

ESTHER 4 - Konyak Naga bible

ESTHER 4

¹Aope Mordecai-e linge peipu khongküm shinge pei, Iye yoi inkhek hit, hüyange tüpla phuyange monnye in, hüyange chingnyu chingyang kaiye kem, hüyange ngao üyong ngaiye hüyange yeonge khah-e üngwün-e shappe yoong.

²Hüyange I ahngnokte ongpu peten te pei; I ümongte ye-ong, hangne ima-a monnye inyange ao-o ahngnok te ongne yetam.

³Hüyange yenghoi lili me ümpuken me ahngpawe pongetampu hüyange ngaokhüm pei, Jehudilan yo me yeonge üngwün-e shappe yoongpu, nyaowelepu, hüyange shappu hüyange moppu ngohyangki. Hüyange üngang monnye phei hüyange tüpla me lamyange ngoh yangki.

⁴Aope Esther shaoshannyulan hüyange moiko kahtalan-e yhate Mordecaiye hanghe ling tüopa jeng ngaowe tamyapeih, yha yeonge mongshang ne tam. Monnye nanleiye yahlak jingne yhawe Mordecaite nyemo ütam shon; hüpoi Iye tüolan yeyah.

⁵Hüwante yhawe ahngnok mepu moikolan yo mepu sheja, ahngpawe yha shaoshanpa ne lepu Hathach te nyik, hüyange Mordecai tangte taiye hanghe ngai hüyange hangne hüke ngoh üpong tüowe yamlak jingne shon.

⁶Tüokhei chingnyu ü-atye kahjee, ahngnok te ongpu peten pongte Mordecai tangte Hathach wen.

⁷Hüyange Jehudilan mahtamlak jingne Haman-e ahngnok ngin angjing nyoi me ngin khongkümpu sheiye hangshin phalak jingne jan, hüyange Mordecaiye Ite ngaipu khongkümpu jeng Ite i.

⁸Iye Hathach te Jehudilan mah tamlak jingne ngaokhüm phawe Susa chingnyu me ngaiye tampu pongpu ngaolan laija pha. Hüyange Mordecaiye Ite tonge i, hatüo lai Esther tangte peiye phatüoh, yhate juheiwan jeng meimei-e itamtüoh, hüyange ahngpa tangte taiye yoppe tonglak jingne yha te tongshih, hüyange yha pheipu jat hei lilante shüpshe pha she Ite yoppe tongtüoh she itüoh she i.

⁹Hathach leih ye hüyange hüke ngaowe tam;

¹⁰hüwante Mordecai tangte yah yelak jingne Estherwe Ite tüolan ngaolan pha:

¹¹“Ahngpawe yenyikpute, sheko jeyah netan jeyah aohipa ümongpa ghonu te onglakeih, tüopa kahta-a lilak. Hatüowa ngaokhüm; ahngpa yakjongpa mepu tawe yenghoi me ngohpu kahtate ngoiye tüopa jeng shingnang. Tüopa ngaokhüm mepu yinne oklak ne lamnyu ja hei ngohnang: ahngpawe I jing hon shengshaoh te jonne ütamjate hüoma-a, hüma-a tüopa kahta-a lilak mepu yinnang. Hüpoi ahngpawe tao teiyang phei me sha-a lekeng ja ngoiteki.”

¹²Aope Mordecaiye Esther mepu ngaolan tüo,

¹³Iye yhate tüopa deingao shon: “Jehudilan khongküm tüohyange nanga ahngnok me yinpu oklak she nang nying nyingke tahteih.

¹⁴Hangjingne tüo kihpu hipak ja me nang lanshe ngao yengaipe ngohma-a, hüwante ülao nyoija mepu Jehudilan tangte jampu hüyange yinne tampu ngaikülak, hüpoi nang hüyange nangpa nyahtap lanpa-a mahlak. Hüyange tüokihpu hipak jingne nanga ahngching te ahngyha ne peiye ngohpu aowe shing!”

¹⁵Hüwante Estherwe Mordecaite tüopa janpu ye:

¹⁶“Taitüoh, Susa me ngohpu Jehudilan khongküm jamshe jemtüoh, hüyange üjingne numan-e nyaowele tüoh. Nyih lüm pha lüm jingne hah-o tah hah ying-o tahying: Tao hüyange ü-rhanyulane-o hüke linglak; tüophei me ngaokhüm me yenang yapoi tao ahngpa tangte onglak: Tüopa lingpu jingne tao li ne ngaima-a tao lilak.”

¹⁷Tüophei me Mordecai yoi lamte tai hüyange Estherwe Ite ngaowe tampu khongküm ling.