Read Konyak Naga ESTHER 5 Bible Online

ESTHER 5 - Konyak Naga bible

ESTHER 5

¹Sha-a yha nyaowelepu nyih lüm shepupa nyih me Estherwe ahngyha oleng tüm, hüyange wenne ahngnok ghonu ümongpa me ahngpa shotjing tüp yekaote meyange yong. Ahngpa-a noksame ahngpa shotjing me shotyange taten yekaote meye ngoh.

²Aope ahngpawe ahngyha Esther nokshao yeme yongyange nge, I sheshao me Estherwe shüpshe tüo: hüyange ahngpawe hon ahngshengshaoh I yak me ngohpu Esther te nowe tam. Tüokhei Esther owe wen, hüyange ahngpa shengshaoh üjengte let.

³Hüwante ahngpawe yhate i, “Nange hanghe ihupu, ahngyha Esther?” “Nange hanghe yah hupu üte itüoh, hüyange nange hatüo tüolak, Ü-ahngching ni ne tam-e yahlakne ngaipoi tüolak.”

⁴Estherwe jan-e i, “Üyongpa, nange mongma-a, nangni jingne taowe tümpu mongmei mo me teya Haman nangni pei ne tamhu nangki.”

⁵Hüwante ahngpawe i, Estherwe nyikpu kih-e omme oklak jingne Haman mamshe peine tamtüoh. Tüokhei ahngpa hüyange Haman Estherwe tümpu mongmeimo te pei.

⁶Hüyange ahngpawe wuwüngti mongmei mo me Esther te i, “Nange hanghe tonglak? Nange tongpuwa tüokülak. Nange hanghe tonglakei taowe phalak; nange ü-ahngching ni ne tange tongyapoi taowe phalak.”

⁷Estherwe jan-e i, “Hatüowa taowe yah-hupu yoptongpu:

⁸Üyongpa nange taowe tongpute shüpshe hüowe monglak ne mengma-a, taowe ngaiya üne-o mongmeimo ja me nang hüyange Haman peine tamhu nangki. Hüwante nakshih taowe hanghe yahhu nangte ipha ning.”

⁹Aope mongmei mo tüohyange Haman ngai I yeonge mongmei hüyange meiye teih. Hüpoi üne-o Iye ahngnok taten me Mordecai nge, hüyange aope Mordecaiye I linne taiwante hang wangshümo yehüopu ngeyapeih, Haman yeonge mongshih ngai.

¹⁰Tüoyangpoi Haman-e yoi nying nyingke nünne tükke lak, hüyange nokte ye; hüyange Iye shonne teiye I shümpalan hüyange I sheko Zeresh nyik-e jem.

¹¹Hüyange Haman-e imante I jing toinyu nanha müktishiwapu, hüyange I hayim üngang, hüyange toi lili hanghe me ahngpawe I ütahpa me nowe inne tam, hüyange hangke Iye üshanglan hüyange ahngpa shaoshanpalan tangme I yongne tam, tüolan me I ngampu jeng i,

¹²“Üne-o tüo tokte jam hanghe!” Haman-e yelakpe ngao, “Ahngyha Estherwe mongmei mowa ülao ao-o ye-ompe ahngpa phei tao hei omyange nyik, hüyange ngaiya-o hüke muh tomni shaha te nyik-e ngoh nang.

¹³Tüoyangpoi Judahlan Mordecai ahngnok taten me shotte ngohphei ma-a tüolan khongkümpu üjingne hangne-o yejelak yang.”

¹⁴Hüwante I sheko Zeresh hüyange I shümpalan khongkümpuwe Ite i, “I lüntpe me takke toilak jingne yakkong denga lüopu ja lingne tamtüoh, hüyange ngainap tüopa me Mordecai-a takke toi oklakpa ne ahngpa phei ngao tüoh; tüophei me mongmei mo te mongmei sheiye ahngpa phei ongtüoh.” Hatüo juteih-a shunang she Haman-e teih, tüokhei Iye lüntpe ülüoja linge sho.