Read Konyak Naga ESTHER 6 Bible Online

ESTHER 6 - Konyak Naga bible

ESTHER 6

¹Tüoya ahngpa mükyengoih ok, tüokhei Iye ahngching me ngaipu nyanpu putahpangao laitep yah peilak jingne ngaopha, hüyange I sheshao me ine tam.

²Iman-e iye taipu yo me ghonu taten yompu moiko kahta Bigthana hei Teresh niye ahngpa toi ne she konkonpu hangke Mordecaiye toilak mepu yin tüopa jeng nyanpu omme ngoh.

³Ahngpawe tonge i, “Tüopa jingne Mordecaite teman-e yihnoonpu hüyange minyongpu pha ya ei?” I shaoshanpalan-e jan, “I jingne hango yelingja.”

⁴Hüyange Ahngpawe tonge i, “Ü-shaoshanpalan ütam ahngnok me peiye ngohya?” Sha-a Haman-e Mordecai jingne tümpu lüntpe me I takke toitamlak, ahngpa phei teingaolak jingne ahngnok longkon mongme Haman shaaji onge ngohyangki.

⁵Hüwante shaoshanpa lan-e Ite jan-e i, “Leihuyah, Haman ahngnok nokshao me yongyange ngoh nang.” Ahngpawe i, “I ongne tamtüoh.”

⁶Tüokhei Haman noksa te ong, hüyange ahngpawe Ite i, “Kahta ja ngohnang, Ite taowe yeonge minyong pha hu nangki. Tüopa kahta jingne taowe hangke linghah shi?” Haman-e yoi nying nyingke hüke teih, “Sha-a, ü-tokte kaiye ahngpawe ao te minyongpu pha hulak shi?”

⁷Tüokhei Haman-e ahngpate i, “Ahngpawe minyong pha hupu kahta jingne,

⁸ahngpawe yahnangpu ahng oleng hüyange ahngpa shotpu koipong, hüyange shangme ahngpa shaoshaoh shaohne tamyange, woi peine tamtüoh.

⁹Tüophei me nang shaoshanpalan yo mepu ütahpa ja te tüolan oleng tümne tamyange, koipong tok me I inne tamyange, chingkeng lamnyu paowe, ‘Leihuyah, Iye mongpu kahtate ahngpawe hangshin minyong ngampai phatam nang shi?’ ” she wenne woiye kemne tamtüoh.

¹⁰Hüwante ahngpawe Hamante i, “Mamtüoh, nange ipu kih-e oleng hüyange koipong yah peikei, hüyange hüke ahngnok peten me shotte ngohpu Jehudipa Mordecai te linge tamtüoh: nange ngaoyangpu hango yelingpe tah ang.”

¹¹Tüokhei Haman-e oleng hüyange koipong yahpei, hüyange Iye oleng-a Mordecai te owe tam. Mordecai koipong tok me ong hüyange Haman-e I woiyange chingkeng lamnyu paowe: “Leihuyah, Iye mongpu kahta te ahngpawe hangshin minyong ngampai phatam nang shi!” she kahtalante jaine tam-e kemjang kem-e üngwün.

¹²Tüophei me Mordecai ahngnok peten te muh leihye. Hüpoi Hamanpa-a shangme inkhek lümyange shapjang shappe Inokte mam-e leihye.

¹³Aope Haman-e yoi shekonyu Zeresh hei I shümpalan te Ite ngaipu khongkümpu i; hüwante I shümpalan hei I shekonyuwe Ite i, “Mordecai sheshao me nang palak ne ükong wangnang; I-a Jehudi kahta, hüyange nange I tangme okpu ye-ngelak. Iye nanga ütingme naowe tam phalak.”

¹⁴Iphei üne-o iman-e ngaojang ngaowe ngohwante ahngnok mepu moiko pei ngoi, hüyange mam-e Estherwe tümyange ngohpu mongmeimo te Haman woi tai.