Read Konyak Naga ESTHER 7 Bible Online

ESTHER 7 - Konyak Naga bible

ESTHER 7

¹Tüokhei ahngpa hüyange Haman Esther phei mongmeimo hahlak jingne ün ni shepupa pei.

²Wuwüngti mongongpu tangme ahngpawe nishe yhate tong, “Sha-a ahngyha Esther, nange hanghe yah hu nangki? Üte ipha hüyange nange hatüo tüolak. Taowe ü-ahngching ni ne tamme pha ne ngaiyapoi phalak.”

³Hüwante Estherwe ahngpate jan hüyange i, “O ahngpa, taowe nang sheshao me shüpshe tüoma-a, hüyange hatüo ahngpawe mongma-a, ü-üyin üte muh angpha she taowe tongnang, hüyange ü-kahtalan üyin me angtam pha she taowe yoppe khümnang.

⁴Hangjingne tao hüyange ü-kahtalan menge winlak jingne hüyange toilak jingne, hüyange mahtamlak jingne toman yüowe tamteki. Toman hüke netan hüyange sheko rha ne menglak jingne yüopu ne mengma-a tao jünge ngohhah shepuweih, hangjingne ima-a ahngpa shaoshitampu yewang!”

⁵Hüwante Ahngpa Ahasueruswe ahngyha Esther phei ngaowe i, “Yoi mongjang me hüke linglak mongyange teihpu I ao shi hüyange ümeken me ngoh nangki?”

⁶Hüyange Estherwe jan-e i, “Tomante yemeipa hüyange wepa, hüke tüopa ümengpa-a Haman!” Hüwante ahngpa hüyange ahngyha ni shaote Haman yeonge nyampu pei.

⁷Hüyange mongshih ngaiye ahngpa mongmeimo mepu yayonge ngai hüyange ahngnok peshate yu. Hüyange Esther ahngyhate I üyin jingne yoppe khüm-e Haman yong; hangjingne ahngpawe I phei tüi-e ümeng teihtümpu Iye nge.

⁸Estherte I üyin jingne shüpshepha she tonglak jingne ahngyha shotjing tang me I lamme tapu phei jam she, pesha te yutepu ahngpa tüpte leih ye. Tüopa ngeyange Ahngpa üngwün: “Hatüo kahtawe ü-ahngnok hatüo me ahngyha te kange jonne ipu a?” Ahngpa ngao I jume ngaipu phei jamshe moikolan-e Haman shangte lüm.

⁹Hüwante ahngpa sheshao me ngohpu moikolan yo mepu sheja; Harbonah she minpuwe i, “Leihuyah, üne-o Mordecai aowe ahngpa lilak mepu yinnetam, I jingne Haman-e takke toilak jingne lüntpe yakkong denga laopu lingyange Inok me angnang!” Ahngpawe ngaophawe i, “Tüopa tangme Haman takke toitamtüoh!”

¹⁰Tüokhei Iye Mordecai jingne lingpu lüntpe me Haman takke toi. Tüophei me ahngpa mongshih ngaipu mepu lak.