Read Konyak Naga ESTHER 8 Bible Online

ESTHER 8 - Konyak Naga bible

ESTHER 8

¹Tüopa nyih me ahngpa Ahasueruswe Jehudilan wepa Haman jing nok hei shemin lamphe Esther ahngyha te pha. Estherwe ahngpate Mordecai-a yha pheipu üja she ngaowe tam; tüohipak me peiye Mordecai ahngpa shongte ongpu ok.

²Hüyange ahngpawe I mepu shüptet hanghepa Iye Haman mepu yah, hatüo hukke yah, hüyange hatüo Mordecaite pha. Hüyange Estherwe Mordecai Haman jing moth tangme angtam.

³Tüophei me Estherwe üne-o ahngpa phei nishe ngao, hüyange I yashong me ümme khüm; hüyange Agaglan Haman konmeng, hüyange Jehudilan phei tüi-e Iye konmeng konne ngohpu winne tampha she mükphi phei Ite yoppe tong.

⁴Ahngpawe hon shengshaoh-a Esther te nowe tam; tüokhei Esther lao hüyange ahngpa sheshao me yong.

⁵Hüyange yhawe i, “Ahngpawe mongma-a hüyange taowe nang sheshao me shüpshe tüopu ne mengma-a hüyange ahngpa sheshao me hatüowa shunang she teihma-a, hüyange tao I sheshao me meiye hüopu ne mengma-a, Agaglan Hammedatha üha Haman-e linge tampu nyanpu lailan hanghe pa Iye ahngpa yenghoi üshei ye me ngohpu Jehudilan mahtamlak jingne nyan, hatüo jeileiye nyan-e tamshih.

⁶Hangjingne ü-kahtalan tangme ümeng peine ngohpu taowe hangke iye nün oklak? Yejema-a üpheipulan mahtampu, hatüo taowe hangke nün oklak?”

⁷Hüwante ahngpa Ahasueruswe Esther ahngyha hei Jehudilan Mordecai te i, “Leihuyah, taowe I kon ümeng konpu jingne Haman lüntpe me takke toiyangki, hüyange I moth taowe Esther te phayangki.

⁸Hüpoi ahngpa min me hüyange ahngpa mepu füosang tüpyange ponge tamyangpu ngaowa lanne ye-ok. Tüoyangpoi, numan-e hangke linghu hüke Jehudilan tangte nyan ne ok; hüyange numan-e hatüowa ü-min me nyanne ok hüyange ahngpa mepu füosang tüpyange shonne ok.”

⁹Tüohipak me ahngpa yaknyanpalan, lekeng lüm shepupa Siyan leat, hüyange nyih da me lüm shepupa me nyik-e jem; hüyange Mordecaiye Jehudilan te ngaophawe tampu kih-e, wanglam lampalante, hüyange governor hei yenghoi me üshanglan, India mepu Sudan ngoiye, yenghoi gho ja da me nyit, yenghoi lilite yoi yoi ngao me, hüyange kahta lili ngao me hüyange Jehudilan tangte iman nyanpu wanglamme, hüyange iman ngao me hatüo nyan:

¹⁰Hüyange Iye Ahngpa Ahasuerus min me nyan, hüyange hatüo me ahngshange tüp, hüyange nyanpu lai-a laiphet palan-e koipong me shotyange, koipong shephet pupa ahngpa shongnying shonglai te jonpu leyangphei koiponglan me shotyange shonne tei.

¹¹Tüopa nyanpu lai me ngohpuwa ahngpawe chingnyu lili mepu Jehudilan yoi yoi yinlak tümlak phanang she ngoh. Yenghoi ütam me hüyange hangkihpu jatlan-e yonglah phei iman phei hoklakei, imane-o hokke yelak hüyange iman shekonyulan hei hashih nahalan-o omme mahtamlak; iman-e iman ükümpa kahta ngoiye toine tamyange iman jing moth lanshe yahlak she ngoh.

¹²Tüopa pongtampu ngaokhüm-a Persia ahngching üshei ye me Jehudilan toitamlak jingne itpu nyih, lekeng pen me ni, Adar leat pen me lüm nyih khongküm pu me jonlak;

¹³Hatüowa ngaokhüm ja leye pongtamlak hüyange yenghoi me ngohpu lilite shingne tamlak, hümme nakshih aope tüonyih ngoilakei iman wepate phuh hahlak jingne Jehudilan-e tüm-e tanlak.

¹⁴Tüokhei koipong shephet shepulan ahngpa shongnying shonglai me jonpu me shotyange, ahngpa ngaokhüm phei mam-e hüyange heh-e lai phei pulan phet. Hüyange pongtampu ngaokhüm-a jongwang chingnyu, Susa me moilanne shinge linge yan.

¹⁵Hüyange Mordecai ahngnok mepu, ahngpa oleng wanghüng hüyange he-engpu, phutti kihpu nyekhai hüyange shemei yaomapu ahngpa hon shaoshaoh yahyange yayonge ngai. Hüwante Susa chingnyu chingyang me hoongli pu phei mongmei üngwünpu ngoh.

¹⁶Jehudilan jingne wangngai hüyange mongmeipu, hüyange hoongli mongonge okkeshangpu nyih ne ngoh.

¹⁷Hüyange yenghoi lili me, hüyange chingnyu lili me, ümeken ye me ahngpawe ngaophawe tampu hüyange I ngaokhüm ngoi, Jehudilan mongmeipu hüyange hoonglipu mo hüyange sanyih ngoh. Hüyange kahmük me kahtalan üngang Jehudilan ne meng; hangjingne ima-a Jehudilan te nyampu iman tangme pei.