Read Konyak Naga ESTHER 9 Bible Online

ESTHER 9 - Konyak Naga bible

ESTHER 9

¹Sha-a lekeng pen me ni shepupa, hanghepa Adar leat nyih pen me lüm shepupa me, aope ahngpa ngaowe tampu hüyange ngaokhüm jonlak hipak ngoi, Jehudilan wepalan-e iman tang me nokpu ne menglak she teihpu nyih me; tüoyangpoi hatüo leihkheih-e, hüke iman tangme pahi iman-e nupu Jehudilan-e nokpu ne menge ngoh.

²Jehudilan iman nying nyingke jamshe iman chingnyu me, ahngching yenghoi üshei me, imante yak yu ne yampalan te yaklelak jingne jem. Hüyange ao-o iman phei tüi-e yeyong ok; hangjingne kahta khongkümpute nyampu ngoh.

³Hüleima yenghoilan mepu üshanglan, hüyange woipalan, hüyange governorlan hüyange ahngpa phangme shaoshanpalan khongkümpuwe Jehudilan te jam; hangjingne Mordecai te nyampu iman tangme ngoh.

⁴Hangjingne ahngnok me Mordecai üyongne ngoh, hüyange I minyongpu yenghoi üshei yeme tai: hangjingne tüopa kahta Mordecai sheyong sheyong she yong.

⁵Tüokhei Jehudilan-e iman wepalante hanghe linghu hüke ling. Iman-e yanglow phei hok hüyange iman toi ne tam.

⁶Susa me, jongwang chingnyu nyoi me Jehudilan-e kahta gho nga toi.

⁷Iman yo me Jehudi wepa Hammedatha üha Haman hayim,

⁸Parshandatha, Dalphon, Aspatha, Poratha,

⁹Adalia, Aridatha, Parmashta, Arishi, Aridai, hüyange Vaizatha naoshe pen toi;

¹⁰Tüoyangpoi toinan nyieyahpu hango yeling.

¹¹Tüonyih Susa chingnyu me toitampulan kahta shangtoi ahngpate shingne tam.

¹²Hüyange ahngpawe Esther ahngyha te i, “Jehudilan-e Susa chingnyu shaha me, Haman hayim pen omme kahta gho nga toiteki. Ülao yekao yenghoi lan me iman-e hangke linge ngohkülak! Sha-a nange hanghe yah-hupu? Nange tüopa tüolak. Üte itüoh üne-o hanghe yah-hupu, hüyange hatüo nange oklak.”

¹³Hüwante Estherwe i, “Ahngpawe mongma-a Susa me ngohpu Jehudilante tenyihpu ngaokhüm kih-e, ngainyih-o linge tamshih; hüyange Haman hayim pen-a lüntpe me jhotne tamtüoh. Hüyange iman-e Haman hayim pen ükhonge ngeye lüntpe me jhotte tam.”

¹⁴Ahngpawe hüke linglak jingne ngao pha; hüyange Susa me ngaokhüm ja pha.

¹⁵Hüyange Susa me ngohpu Jehudilan Adar leat nyih pen me peli shepupa me iman shüppe jem, hüyange Susa chingnyu me kahta gho lüm toi. Hüpoi iman-e üne-o mothkat nyieyahpu yenang.

¹⁶Hüyange ülao yenghoi me ngohpu Jehudilan jam she jem, hüyange iman yoi üyin tüklak jingne yong. Iman-e iman wepalan phei hokke yong hüyange iman-e haja denyit me nga kahtalan toitam. Hüpoi iman-e mothkat nyieye yahpu yenang.

¹⁷Tüopa-a Adar leat nyih pen me lüm shepupa me ling; hüyange pen me peli nyih shepupa me iman-e toloimei, hüyange hatüo momopu hüyange mongong monglepu nyih ne ling.

¹⁸Hüyangpoi Susa me ngohpu Jehudilan-e pen me lüm shepupa hüyange pen me peli shepupa nyih me toiyang phei me pen me nga shepupa nyih me toloimeiye mongmeiye nyoi.

¹⁹Tüokhei Jehudilan aoyin chingtuk penyu yenangpu chingshaolan me nyoi nang, Adar leat nyih pen me peli shepupa nyih-a hoongli mongongpu mo hüyange sanyih nyih ne ngohnang; hüyange hoishop nükshop teiphapu nyih ne jonnang.

²⁰Hüwante Mordecaiye tüolan nyan, hüyange Persia ahngching yenghoi me Jehudilan üshei tangte, ü-o me hüyange üjai te.

²¹Adar leat pen me peli shepupa hüyange pen me nga shepupa nyih, wangpeng lep iye nyoilak ngaolan yan.

²²Tüolan nyih-a Jehudilan iman wepa mepu toloimei ngepu, hüyange iman jingne mongmeng mepu mongmei, hüyange shappu mepu lakke tampu, jeilei tampu leat, hüke iman-e tüolan-a momopu hüyange mongmei, hüyange jajate hünghao teiphapu hüyange toihalan te hoishop nükshop tei phapu nyih ne jonlak imante i.

²³Tüokhei Jehudilan-e Mordecaiye phawe tampu nying me yah, hüyange teihtüopu mo-a wangpeng lep iye ngohpu wanglam ne meng.

²⁴Jehudilan wepa Agaglan Hammedatha üha Haman-e Jehudilan phei tüi-e iman mahtamlak konkon, hüyange “Purim” tokke lei, tüote leppu, iman mahtamlak hüyange menge tamlak phongyeng.

²⁵Hüpoi ahngpa tangte Esther pei, hüyange ahngpawe pongtampu ja nyan-e yan, tüokaiye hüke I ümengpa kon hanghepa Iye Jehudilan phei tüi-e konkon, I shang tangte leihye, hüyange I hei I hayimlan lüntpe me jhotte li ne tam.

²⁶Tüojingne tüolan sanyih nyihlan te Purim she nyiknang. Mordecaiye nyanpu lai kaiye hüyange iman me ngaiye peipu sheminlamphe jingne,

²⁷Jehudilan-e iman jingne, iman huhayimlan jingne, hüyange Jehudi ne aohipa menglakei tüopa jingne, hüke hipak ümei me wangpeng lep iye tüopa nyih ni-a Mordecaiye nyinge tampu kih-e yeshaipe wangpeng lep iye ngohlak wanglam ja ne ling.

²⁸Jehudi noksa lili hüyange ngoikülak Jehudi jin lili me hüyange yenghoi hei chingnyu lili me hüyange jin jinte tüopa Purim yepin yeshaipe teih tüowe nyoilak ngaokhüm ja ne tüm.

²⁹Hüwante Abihail yhala Esther ahngyhawe, hüyange Jehudilan Mordecaiye, tüopa nishepupa Purim nyanpu lai monge tamlak jingne wong khongkümpu phawe nyan.

³⁰Hüyange Jehudilan üshei tangte, Persia ahngching yenghoi gho ja me da me nyit tangte, chingmei hüyange ngaoting phei,

³¹Purim nyihlan-a leye ngaipu hipak ümei me nyoilak wongpong, hüke Jehudilan Mordecai hüyange Esther ahngyhawe imante hüyange huhayimlan te shingne tam-e ngaopu ke, nyaowelepu hüyange teihtüopu hem jeng iye nyanpu lai shon.

³²Hüyange Esther ngaophapu kaiye Purim jeng tüolan toishao mongne tam; hüyange hatüowa laitee me nyan.