Read Konyak Naga WOITEI 1 Bible Online

WOITEI 1 - Konyak Naga bible

WOITEI 1

¹Tüolan-a yoi yoi noksalan woiyange Jacob phei Egypt te peipu Israel hayimlan min ngohnang.

²Reuben, Simeon, Levi hei Judah,

³Issakhar, Zebulun hei Benjamin,

⁴Dan hei Naphtali, Gad hei Asher,

⁵Jacob mepu jalunpu kahtalan khongküm denyit ngoh yangki. Iha Josephpa-a Egypt me nyoiteiye ngoh yangki.

⁶Tüophei me Joseph li, I jeiheinaolan khongküm li, hüyange tüome jalunpu jin khongkümpu liküm.

⁷Hüpoi Israel hayimlanpa-a ülick lick-e jalun, iman üngang ngaiye wongnangpu phei ngoh, tüokaiye iman-e kahtok-a maa-e ngai.

⁸Sha-a Egypt kahtok me Joseph yeshingpu ahngpa üla ja ngai.

⁹Iye I kahtalante i, “Leihuyah, Israel kahtalan-a ünyei jalun-e hüyange teman phei wongshe nang she.

¹⁰Kei, teman-e imante kentinge jonhah, hüke ye-ima-a iman jalunkülak hüyange wehok hipak me iman-a wepalan phei pahi jemyange temanphei hokkülak hüyange teman kahtok mepu taimahkülak.”

¹¹Tüokhei Egyptlan-e iman dangme shom-aipalan ang, hüyange kange toilingne tam-e shaoshine tam-e ükongwang. Hüyange Pharaoh jingne tah anglak chingnyulan, Pithom hei Rameses she lingne tam.

¹²Hüpoi iman-e hangshin shaoshi ne tam teshinne iman jalun hüyange üjai te yan. Hüyange Egyptlan Israel lante pahi nyampu ngai.

¹³Egyptlan-e Israel lante shaoshi ne tam-e toishao hangkiyih pha-e ükongwang,

¹⁴hüyange kahtok shaowe nyütlak hei jaklong lingpu toi hei kahshaolak toi ülam maapuwe iman üyin ükhah ne mengtam, hüyange toishao khongkümpume imante kange lingne tam.

¹⁵Egypt ahngpawe Hebrew yin naopainyulan Shiphrah hei Puah, nite i,

¹⁶“Hebrew yin shekolante iman naopai wante nangni-e namnowante, netan ne mengma-a toiwintüoh; hüpoi sheko ne mengma-a yha üyin me angtüoh.”

¹⁷Hüpoi naopainyu ni-e Kahwang te nyam; imni-e Egypt ahngpawe ngao tampu kih-e yeling, hüpoi netan halan-o üyin me ange tüoh.

¹⁸Tüokhei Egypt ahngpawe naopainyu ni nyik-e hüke i, “Nangni-e hüke hangne lingpu, hüyange netanhalan hangne üyin me angtampu?”

¹⁹Naopainyu ni-e Pharaoh te i, “Hangne she ima-a Hebrew shekolan-a Egypt shekolan kihpu yeje; hangjingne iman-a naopainyulan-e jamne peishao me nao puh ok tei-e shaha ngohnang.”

²⁰Tüokhei Kahwange naopainyu nite monghah-e jon, hüyange kahtalan jalun hüyange yeonge wongnange ngai.

²¹Hüyange naopainyu ni-e Kahwangte nyampu jingne lye imante noksa kahtalan ngaiye tam.

²²Üküm ne ahngpawe kahta khongkümpu te ngaokeng pha, “Hebrewlan-e puhpu netan nahalan lili numan-e Nile te hüngtam tüoh, hüpoi numan-e sheko lan-a üyin me angtüoh.”