Read Konyak Naga WOITEI 10 Bible Online

WOITEI 10 - Konyak Naga bible

WOITEI 10

¹Hüwante Youngwanpawe Mosa te i, “Taitüoh hüyange ahngpa phei hüotüoh. Hangjingne iman yo me tüolan shaonahpu hüolak jingne Taowe I mongjang, hüyange I shaoshanpalan mongjang wanne tamyangki;

²hüyange Taowe Egypt tangme hanghe toi ling, hüyange hanghepa kahnyingwüngha iman yo me Taowe ling, tüopa nange nangha hüyange nanghulan nasa me ngaolak jingne, hüyange numan khongkümpuwe taowa Youngwanpa she shinglak jingne Taowe Egyptlan üngapa ne linge tamnang.”

³Tüokhei Mosa hei Aaron ni ahngpa tangte ngoiye Ite i, “Hebrew Kahwang, Youngwanpawe hüke inang, Ü-sheshao me nange hangshin me nang nying nyingke wanne ngohlak shi? Üte yoppe khümlak jingne ü-kahtalan taine tamtüoh.

⁴Hangjingne nange ü-kahtalan taine yetam ma-a, leihuyah, ngainyih Taowe nang kahmük te nyaodukh peine tamlak.

⁵Hüyange aowe-o kahtok üshe yeshinglakne, iman-e kahtok phünge mahlak; hüyange yilong mepu yinne numan jingne towe ngohpuwa iman-e hahkümlak, hüyange phao me numan jingne towe ngohpu pee khongkümpu hahlak.

⁶Hüyange iman-e ahngnok, hüyange nang shaoshanpalan nok khongkümpu hüyange Egyptlan nok khongkümpu maalak; hüyange nangpa yejema-a nangpuyiman kahtok me ngoh phei me tenyih ngoipu mongme hüke jeman ngepu ngelak.” Tüophei me I lüp hüyange ahngpa mepu yanne tai.

⁷Ahngpa shaoshanpalan-e Ite i, “Tüopa kahtawe temante hangshin me shaoshi ne tamlak? Iman Kahwang, Youngwanpa te yoppe khümlak jingne Israel kahtalan min taiyah. Egypt khaiye menge mahteki she nange teih yetüo a?”

⁸Tüokhei nishe Mosa hei Aaron ni ahngpa tangte yah ye, hüyange lye imante i, “Numan taine ok hüyange numan Kahwang Youngwanpa te yoppe khümtüoh. Hüpoi ütingpa me aoyin tailak?”

⁹Mosawe janne i, “Toman khongküm hüke hayimlan hei lwngmeilan hüyange toman hala yhalalan phei, toman nyee ükhong hei younlan hüyange mahu ükhong phei toman tailak; hangjingne Youngwanpa te yihnoonpu mo ja toman-e ngohlak.”

¹⁰Ahngpawe imante i, “Youngwanpa min me taowe jienge inang hüke, numan-e numan jing shekolan hei nahalan yahyange taine taowe yetamlak! Numan-e ümeng ngaitamlak jingne ütingpa me kon kon nang.

¹¹Hüke yeje! Sha-a numan netanlan shaha taitüoh hüyange Youngwanpa te yoppe khümtüoh, hangjingne hatüo hei numan-e yah hupu ngoh nang.” Tüolan ngao phei ahngpa sheshao mepu Mosa hei Aaron ni jange tei.

¹²Hüwante Youngwanpawe Mosa te i, “Egypt kahtok te nyaodukh peiye, kahmük me ngohpu phümha weangyong khongkümpu hüyange yilonge towe tüohpulan hahtamlak jingne Egypt tang me nang yak notüoh.”

¹³Tüokhei Mosawe yoi wongjoi Egypt kahtok tangme nowante, tüonyih hüyange tüoya phapan heong yekao mepu wangyang kahmük tangme peine tam; hüyange shom ngoiwante heong wangyange nyaodukh puwe peine tamyange ngoh.

¹⁴Hüyange nyaodukh-a Egypt kahtok üshei yete onge Egypt kahtok neikonpu üshei me pah; iman yeongpu ükhong üyongne ngoh, tüolan nyaodukh kih-e üshong wante aope-o jeman pei hüyange phei me-o yepeilak.

¹⁵Hangjingne iman-e kahtok nopute pahpuwe kahmük-a wangnyak ne menge tam; hüyange kahmük me phümha weangyong hüyange yilonge towe tüohpu pee mepu pelicklan khongkümpu iman-e hah; hüyange Egypt kahtok üshei yeme, phaome phümha weangyong, pee jeyah, deiha liha jeyah, ümük üha ja nehoi towe yetüoh.

¹⁶Hüwante ahngpawe yeonge heh-e Mosa hei Aaron ni nyik-e i, “Youngwanpa numan Kahwang hüyange numan kaiye taowe ünu omyangki.

¹⁷Tüokhei sha-a, ü-ünu tenyih hei winpha she taowe nang nite yoppe tongnang, hüyange Youngwanpa numan Kahwang te ü-mepu tüopa lipupa hei yah teilak yoppe tongpha.”

¹⁸Tüokhei Mosawe ahngpa tüohyange ngaiye tai hüyange Youngwanpate yoppe tong.

¹⁹Hüyange Youngwanpawe heong wangyanga yeonge wongnangpu henyip wangyang ne lüppe tam, hanghe kaiye nyaodukh lanna moijem me iman Ütak Yengching te jange tei; hüyange Egypt kahtok üshei ye me nyaodukh ja nehoi yetüoh.

²⁰Hüpoi Youngwanpawe ahngpa mongjang wanne tam, hüyange lye Israel hayim yetaitam.

²¹Hüwante Youngwanpawe Mosa te i, “Egypt kahtok tangme wangnyak peiye wangnyak me pomme ngohne tamlak jingne nange nang yak wangyete hong tüoh.”

²²Tüokhei Mosawe yoi yak wangyete hong; hüwante nyih lüm Egypt kahtok khongkümpu me wangnyak üyong ngoh.

²³Hüyange Egyptlanne jawe ja tei ye-ngepe mah; hüyange nyih lüm mongme aowe-o yoi ngohpu nyoi mepu yeyan ok. Hüpoi Israel hayimlan iman ngohjing nyoi üshei me wangngai me ngoh.

²⁴Hüwante ahngpawe Mosa te nyik hüyange i, “Numan tai ne ok hüyange Youngwanpa te yoppe khümne ok; numan phei jamme numan jing shekolan hei nahalan-o taine ok. Hüpoi numan jing nyee, youn, hüyange mahulanpa-a tüome ange tüo tüoh.”

²⁵Hüpoi Mosawe janne i, “Hüma-a Youngwanpa toman Kahwang te toidolak hüyange jakke dolak jingne tomante yinmoklan-a nange phalak wongpong.

²⁶Hüke yejelak, toman-e yinmoklan-a toman phei yah tailak; yashok ja nehoi yetüohlak, toman Kahwang Youngwanpa te hangkihpu hüyange hanghepa yinmok-e yoppe khümlak hatüowa toman-e lelak. Hüyange tüoken nyoi te toman manngoi manngoi hangkihpu yinmok-e Ite toidolak toman-e yeshinglak.”

²⁷Hüpoi Youngwanpawe ahngpa mongjang wanne tam, hüyange lye iman yetei tam.

²⁸Hüwante lye Mosa te i, “Ü sheshao mepu taitepha! Nang shaaji üte nishe ngene tah tam pha! Taowe nang sheta ngene tampu nyih me nang lilak!”

²⁹Mosawe janne i, “Nange ipu shunang. Nange shaaji ni she tao ye-ngelak.”