Read Konyak Naga WOITEI 11 Bible Online

WOITEI 11 - Konyak Naga bible

WOITEI 11

¹Hüwante Youngwanpawe Mosa te i, “Taowe shaaji Egypt ahngpa hüyange I kahtalan tangme shangne tampu ja me hei shonlak. Tüophei me lye numan taine tamlak. Nyongküleih pahi, lye numan khongkümpu tüopa mepu jange tei phalak.

²Sha-a Israel kahtalan khongkümpu te ngaotüoh, hüyange netan hei sheko moilanne yoi yupilante iman me ngohpu hon hei khüm juyük yutüoh she itüoh.”

³Egyptlan-e Israel lante wangshüm hüolak ne Youngwanpawe linge tam. Ütingpa me, Egypt kahtok-e hüyange ahngpa shaoshanpalan hei kahtalan khongkümpuwe Mosa-a kahta üyong ja ne yihnoonpu ngoh yangki.

⁴Tüokhei Mosawe i, “Youngwanpawe hüke inang; phawo nanjing me Tao Egypt linne tailak;

⁵hüyange Egypt kahtok me üwangne puhpu halompa khongkümpu, ahngpa shotjing me shotpu ahngnok üwangpa ha mepu, rhanyu mepu üwangpa ha ngoiye; hüyange üne-o tampu yinmok üwangne puhpu khongkümpu lilak.

⁶Hüyange Egypt kahtok üshei ye me yeonge üngwünne shappu ngohlak, hüyange hükihpu leye aope-o manjai hüyange phei me-o yejailak.

⁷Hüpoi Israel lante yejema-a iman jing yinmoklan te kuiha jawe nehoi yehüolak. Hüwante Tao, Youngwanpawe Egyptlan hei Israellan ni pa me yoi yoi ne linge tamnang she, numan-e shinglak.

⁸Tüophei me hükih-e ngao küm iye Mosawe ngaowe tüoh ‘Nang shaoshanpalan khongkümpu ü-tangte peikülak, hüyange ü-sheshao me ümme khümlak, hüyange ü-kahtalan khongkümpu woiyange taitepha she iman-e üte yoppe tonglak.’ Tüophei me, tao yayonglak.” Tüophei me yeonge mongshih ngaiyange ahngpa mepu Mosa yayonge tai.

⁹Hüwante Youngwanpawe Mosa te i, “Egypt kahtok me ü-kahnyingwüngha ünyei ngaitamlak jingne, ahngpawe nangte yelakpe muh yejai phalak.”

¹⁰Mosa hei Aaron niye tüolan shao-nahpu khongkümpu ahngpa sheshao me ling; hüpoi Youngwanpawe ahngpa mongjang wanne tam, hüyange Iye Israel hayim yoi kahtok mepu taine yetam.