Read Konyak Naga WOITEI 13 Bible Online

WOITEI 13 - Konyak Naga bible

WOITEI 13

¹Youngwanpawe Mosa te i,

²“Üwangne puhpu netanlan khongkümpu üte jaowe tamtüoh, hangjingne üwangne puhpu Israel netan lili, hüyange üwangne puhpu yinmok üponglan lili üjing ngoh nang.”

³Mosawe kahtalan te i, “Egypt kahtok me numan rha ne menge ngohpu mepu hanghe nyih me numan tüoh-tüopa nyih teih tüoyah. Tüopa nyih-a Youngwanpawe yoi üngan wong üyongpuwe woi ngaipu nyih ngoh nang. Do nyütpu an hango yehahlak yang.

⁴Tenyih Ahib leat me, numan yayonge tainang.

⁵Hüyange aope düamyeng hüyange zahtai jelo yünne ngohpu Kananlan, Hitlan, Amorlan, Hivlan, hüyange Jebuslan kahtok hanghepa Iye numan jing pajeiyong lante lahnyik mongko puphei numante phalak jingne jan, tüokente Youngwanpawe numan woi peiwante, numan-e toishao hatüowa tüopa leat me jontüoh.

⁶Nyih nyit numan-e do yenyütpu an hahlak hüyange nyih nyit shepupa me Youngwanpa te yihnoonpu mo ja ngohlak.

⁷Nyih nyit lanshe do yenyütpu an hahlak, hüyange do nyütpu an hanghe-o numan-e ngene yetamlak yang, hüyange numan yikeng mong khongküm pume numan phei do nge ne yetamlak yang.

⁸Tüonyih, numan-e numan hayimlante ilak yang, ‘Hangne ima-a, tao aope Egypt mepu ngai, Youngwanpawe üjingne hanghe lingtam tüojingne lingnang she ilak yang.’

⁹Youngwanpa ngaokeng numan ju me ngohlak jingne hatüowa numan yak me füo ja shapu ne ngohlak hüyange numan mük nipa me teihtüopu ja ne ngohlak jingne tüopa jonlak yang; hangjingne I ünganwong üyongpuwe Youngwanpawe numan Egypt mepu woitei.

¹⁰Tüokhei tüopa nyüonyapu-a numan-e hipak khakshuwe wangpeng lep i-e jontüoh.”

¹¹“Aope Youngwanpawe hanghepa numan hüyange numanjing pajeiyong lante lahnyik mongko puphei jan, tüopa Kananlan kahtokte numan woipeilak, hüyange Iye numante tüopa phalakei,

¹²numan-e üwangne puhpu netan naha lili Youngwanpa jingne khatte anglak yang, numan jing yinmoklan-e üwangne puhpu üpongha lili-a Youngwanpa jing.

¹³Hüpoi, üwangne puhpu gado üpongha lili-a tüopa nanlei-e nyeeha ja phayange I mepu shak-e yelak yang. Numan-e gado-a shak-e yeyehuma-a, I üng phakke tamtüoh. Numan jing üwangne puhpu netan naha lili numan-e shak-e yelak yang.

¹⁴Ngoikülak hipak me, aope numan hayimlan-e hükih-e lingpuwa hanghe te leppu she tongwante, nange Ite janlak, hüke Egypt kahtok ümeken nyoi me teman rha ne ngoh, I üngan wong üyong jonyange Youngwanpawe teman woi ngai.

¹⁵Aope Egypt ahngpa üngei ne meng hüyange teman taine mintam she i, Youngwanpawe Egypt kahtok me ngohpu kahta hei yinmok moini tepu üwangne puhpu üpong lili toitam. Tüojingne teman-e üwangne puhpu yinmok üpongha lili Youngwanpa te do nang, hüpoi üwangne puhpu teman jing halompalan pa-a shak-e yenang.

¹⁶Hükih-e jon-e paipu-a teih tüone tampu ja ne, hüke teman yak hei shekeng me ülam ja shayange angpu ja ne mengnang; hükih-e lingpu kaiye I üngan wong üyong phei Youngwanpawe Egypt mepu teman yah ngaipu teih tüone tamnang.”

¹⁷Aope ahngpawe kahtalan taine tam, Philistialan kahtok yekaote taipu she-o she ngohyapoi, Kahwange tüopa lam yete iman yewoi; hangjingne Kahwange teih i, “Kahtalan-e wehok pongyahma-a, iman-e iman kenmong jeileine ok, hüyange Egypt te leih yekülak.”

¹⁸Tüokhei Kahwange kahtalan-a wanwüng jeng lam me neikon-e Ütak Yengching yekaote woi. Egypt kahtok mepu Israellan-a shapju jingne tümyange yonglah phei yayong.

¹⁹Mosawe I phei jamme Joseph mang waan yahtai, hüke linglak jingne Joseph-e Israel lante lahnyik mongko puphei jan-e tüoh, hüyange hüke ngaowe i: “Kahwange ütingme numan yinne tamlak, numan-e numan phei jam-e tüopa nyoijing mepu ü-mang waan kiye teilak yang.”

²⁰Iman Succoth mepu yayonge taiye Etham wanwüng jeng ünah pongme nyoijing ling.

²¹Wangngai wante iman tailam hüolak jingne wangphom shongnyu me iman sheshao me Youngwanpa kem; hüyange wangnyak wante imante wangngai phalak jingne vün shongnyu me iman sheshao me I kem. Tüokaiye iman-a wangnyak wangngai kempu ok.

²²Wangngai wante wangphom shongnyu, hüyange wangnyak wante vün shongnyu kahtalan sheshao me hipak phe me ngoh yangki.