Read Konyak Naga WOITEI 14 Bible Online

WOITEI 14 - Konyak Naga bible

WOITEI 14

¹Hüwante Youngwanpawe Mosa te i,

²“Israel lante, leih yetüoh, hüyange Baal Zephon shongme, Migdol hei Ütak Yengching nipa me ngohpu Pi Hahiroth sheshao me lakjing lingtüoh, yengching phei janhüowe numan-e lakjing lingtüoh she itüoh.

³Hangjingne ahngpawe, hüke Israel lan-a kahko yekao me nüngneiye kemme ngoh külak, hüyange wanwüng jeng shongte owe peiteiye ngohkülak she teihkülak.

⁴Taowe I üngei ne linge tamlak, hüyange lye numante janglak, hüyange ahngpa hei I jing nyahponglan tangme Taowe okpu ngeye tampu kaiye üte yihnoonpu peine tamlak. Hüwante nakshih Taowa Youngwanpa yang she Egypt lan-e shinglak.” Imante ngaowe tampu kih-e Israel lan-e lingyangki.

⁵Aope Egypt ahngpa te kahtalan-a shaaji taikümteki she i, ahngpa hüyange Ite tongtahpalan monglüppe jeileipu ngai hüyange i, “Teman-e hanghe lingyangpu shi? Teman-e Israellan yinne teiteki, hüyange teman rha ne iman angpuwa mahne tampu yang!”

⁶Tüokhei ahngpawe yoijing wehok tongtoi hüyange yoijing nyahponglan tüm.

⁷Hüyange imanjing tongtoi shemeipulan gho wok ngoiye woiyange yoi tongtoi me shotyange I tai.

⁸Youngwanpawe ahngpa üngei ne linge tampu jingne, mongyongpu phei yongetaipu Israel lante lye jange woi.

⁹Egypt nyahponglan, koiponglan hei tongtoilan hüyange tüolan woipalan khongküm puphei imante jange woi hüyange Ütak Yengching nah mepu Pi Hahiroth hei Baal Zephon nipa me iman lakjing lingyange ngohpu nyoi me kemyüo.

¹⁰Aope Israel lanne ahngpa hüyange I jing nyahponglan iman pheite jange woipu ngeyapeih, iman yeonge nyam hüyange iman yinne tamlak jingne Youngwanpa te üngwün.

¹¹Iman-e Mosa te i, “Egypt me mangjong hango yenangpu ne, hatüo wanwüng jeng me toman li ne tamlak jingne nange toman woi peipu a? Leihuyah, Egypt mepu nange toman woiye teiyange nange hanghe lingpu shi?

¹²Hükih-e ngaikülak üja she teman ya manyong wante shaotan ngao toman-e nangte ye-i a? Teman shaha hüke tüoh pha, Egyptlan rha ne muh ngohlakei she toman-e nangte i. Hatüo wanwüng jengme lipu phei-a tüohyangpu nyoi me rha ne ngohpupa meihah shepu.”

¹³Hüpoi Mosawe kahtalan te i, “Numan tahnyam, yepope yongyange ngohtüoh, hüyange Youngwanpawe yinne tampu hanghepa numan jingne lye tenyih linglak, tüopa te leitüoh; hangjingne tenyih numan-e ngepu Egyptlan-a numan-e nishe aope-o ye-ngelak.

¹⁴Youngwanpawe numan jingne hoklak, hüyange numan-e hango linglak wongpong ne yeje.”

¹⁵Tüophei me Youngwanpawe Mosa te i, “Hangne nange ütepahi üngwünpu? Israel lante sheshao yete taitüoh she itüoh.

¹⁶Nang wongjoi notüoh hüyange yengching tangme nowe hongtüoh. Yengchinga ni ne tangkülak, hüyange Israel lan-a yengching nyoi me kahwan tok me linne kemme taipu oklak.

¹⁷Taowe Egyptlan-a jamloi she üngei ne linge tamlak tüokaiye iman Israellan tokphei te woilak, hüyange ahngpa tangme, I jing nyahpong hei tongtoilan hüyange woipalan tangme okpu kaiye Taowe yihnoonpu tüolak.

¹⁸Aope Taowe iman tang me okpu ngelakei, hüwante Egyptlan-e Taowa Youngwanpa she shinglak.”

¹⁹Tüophei me Kahwang shongmokpa aohipa Israel lakjing sheshao te tai, yanne taiye imanpa tokphei me yong; hüyange wangphom shongnyu iman sheshao mepu yanne tai hüyange Israellan hei Egyptlan nipa me yong;

²⁰hüyange wangphom-a Egyptlan hei Israellan lakjing nipa me pei. Hüyange wangphom-e Egyptlan jingne wangnyakke tam, hüpoi Israellan te wangngai pha. Hükih-e nyakpu jingne nyahponglan eiha shongte owe yepei ok.

²¹Hüyange Mosawe yoi yak yengching tangme nowe hong; hüyange Youngwanpawe heongye wangyang wongnangpu leine tam, phapan yengchinga shunge ye ne tam, hüyange yengchinga kahtok üwanne linge tam, tüokaiye yengchinga phünne tam.

²²Hüyange Israellan kahtok üwan tangme yengching ümongte yu; hüyange iman yakjah yeme hüyange yaknya ye me yengchinga jant kih-e ngoh yangki.

²³Hüyange Egyptlan imante jange imanjing koiponglan, tongtoilan, hüyange woipalan khongkümpu yengching hotan te iman phei te woiye yu.

²⁴Hüyange wangngai pongme Youngwanpawe vün hüyange wangphom shongnyu kaiye Egyptlan ükhong tangme leiye tai, hüyange Egypt ngangpalan khongküm mahtampupa me inne tam.

²⁵Hüyange lye iman tongtoi yate tüktüoh pute iman-e yeonge shaoshi-e woi. Tüokhei Egyptlan-e i, “Israellan jingne Youngwanpawe teman phei hok nangki. Teman tüopa mepu lüowe taihah!”

²⁶Hüwante Youngwanpawe Mosa te i, “Yengching tangme nang yak hongtüoh, hüwante Egyptlan hüyange imanjing tongtoilan hei woipalan tangme yeng leih yelak.”

²⁷Tüokhei Mosawe yengching tangme yoi yak nowe hong, wangngai pu phei jam she yengchinga yoi ngohyangpu nyoi te ümok hümme ye. Egyptlan yeng mepu lüowe tailak jingne ngang, hüpoi Youngwanpawe iman-a yengching me hüngne tam.

²⁸Yeng yoi nyoite leihye hüyange tongtoilan tang me, woipalan tangme, hüyange Israellan tokphei te yengching te woipu Egyptlan üshei tangme linne tam; iman yo me sheja nehoi yeto.

²⁹Hüpoi Israellan pa-a yengching kaiye kahtok üwan me kem, hüyange iman yaknya yakjah moini ye me yengchinga iman jingne jant ja leye ngoh yangki.

³⁰Hüke tüopa nyih me Youngwanpawe Israellan Egyptlan yak mepu yin; hüyange Israel lan-e Egyptlan yengching nah me lipu mang nge.

³¹Hüyange Youngwanpawe Egyptlan kaiye toi üyong lingpu Israel lan-e nge, hüyange kahtalan-e Youngwanpa te nyam; hüyange iman-e Youngwanpa hüyange I shaoshanpa Mosa te ütinglak-e meng.