Read Konyak Naga WOITEI 15 Bible Online

WOITEI 15 - Konyak Naga bible

WOITEI 15

¹Hüwante Mosa hei Israel hayimlan-e Youngwanpa te tüopa hem lok-e tam: “Taowe Youngwanpa te hem loklak, hangjingne lye müktishiwa phei okpu ngeteki; Koiponglan hüyange tüome shotpulan lye yengching te toonne shüpteki.

²Youngwanpa-a ü-wong hüyange ü-hem ngohnang, hüyange I ü-yinyepa ne mengteki. I-a ü-Kahwang, hüyange taowe I min yonglak, Üpalan jing Kahwang, hüyange taowe I kheyongpu jeng loklak.

³Youngwanpa-a naomei; I minna Youngwanpa.

⁴“Ahngpajing (Pharaoh) pongtongtoi hüyange I jing nyahponglan Iye yengchingte toon shüpteki; Ahngpa shaoshanpa shemeipalan Ütak Yengching te hüngteki.

⁵Yengching üluwe imante lümteki; longja leye iman yengching ümongte ongteki.”

⁶“Nang yakjah ye, O Youngwanpa, müktishiwa üngan phei, Nang yakjah-e, O Youngwanpa, wepalan khoih nyai-e tam.

⁷Nang ütahpa me okkeshangpuwe, nang wepalan nange poih winteki; Nang mongshih ngaipu nange shon, iman tahjan kih-e jakke tam.

⁸Nang nateange yowante yengchinga ü-oun ne menge bunge ngai, yengchinga tingkhakke jantkih-e yong; yengching shelupu ken-a ü-oun ne menge mah.

⁹Wepawe i, ‘Taowe jange tailak, hüyange iman pholak; taowe iman moth tamlak, hüyange iman tangme ümong hupu ngohlak; Taowe ü-yanglow teak-e yahlak, ü-yak-e iman mahtamlak.’

¹⁰Hüpoi nange nang lüo yo, hüyange yengchinge iman büange mah; wongnangpu yengme iman-a leak jupu kih-e ong.

¹¹“O Youngwanpa, kahwanglan yo me nang lepu me ao ngohlak? Nang lepu me üjaopa me yashan yalipu ao ngohlak? Aowe nange lingpu kih-e yashan yalipu hei wongnangpu ling oklak?

¹²Nange nang yakjahye lan, kahtok-e iman lünge mah.

¹³Nange ütingpa kenpu me nange yintamyangpu kahtalan woi, Nang wong me nange iman nang üjaopate lam woi.

¹⁴Jatlan-e tüopa jai, hüyange iman nyampuwe nin; Nyam nyam shepuwe Philistialan pho ne tam.

¹⁵Edom woipalan-a nyamme kok; Moab wongnangpu kahtalan ninnang, Kanan kahtalan iman wongnange teihpu khai-e mah.

¹⁶Nyamlak hei moklak iman tangte pei ngoi; Wongnangpu nang yanglow-e, iman-a long kih-e lingtam, Nang kahtalan lin mantai mantai O Youngwanpa, nang kahtalan aoyin nange woingai lin manküm she!

¹⁷Nange iman woijem, hüyange nange yoi kahtang me iman nyim tam, O Youngwanpa, nang ngohlak jingne nange linge ngaipu nyoi, O Youngwanpa, khümjing nyoi, hanghepa nang yakke nange ling.

¹⁸Youngwanpawe, jin tokte jin wanglam lamlak.”

¹⁹Aope Ahngpa jing koiponglan, I jing pongtongtoi hei tongtoi woipalan phei yengching te yuyapeih, Youngwanpawe yeng-a leih ye ne tam hüyange tüopawe imante yüoh tam. Hüpoi Israellan-a yengching kaiye, kahtok üwan me kem tai.

²⁰Hüwante Aaron Inya hinyu Miriam-e yoi yak me phemkao jon, hüyange shekolan khongkümpuwe yha tokphei te phemkao konge hüyange polok-e woi.

²¹Hüyange Miriam-e imante hem loketam. “Youngwanpa te hem loktüoh, hangjingne Iye müktishiwa-e okyangki; koipong hüyange tüolan me shotpalan Iye yengching ümongte inne tamteki.”

²²Tüophei me Ütak Yengching mepu Mosawe Israellan woiyange Shur wanwüng jengte ong. Hüyange iman nyih lüm mongme wanwüng jeng kaiye kem, hüyangpoi yeng yetüo.

²³Tüophei me iman Marah she nyikpu nyoi jing ja te pei ngoi, hüpoi tüo me ngohpu yeng yeonge khah-e ngoh, tüone menge iman-e tüopa mepu yeying ok. Tüojingne tüopa min Marah she nyik.

²⁴Tüokhei kahtalan-e Mosa kaiye ngu ngawe i, “Teman-e hanghe yinglak?”

²⁵Hüwante Mosawe Youngwanpa te üngwün, hüyange Youngwanpawe Ite pee ja hüotam, hüyange lye hatüo yahpuwe yengte shüp; hüwante yeng-a yinglak ne meiye ngai. Tüoken me Youngwanpawe imante tüopa me ngohlak jingne ngaokhüm pha, hüyange tüome lye imante tok.

²⁶Iye i, “Numan-e numan Kahwang Youngwanpa ngaowüng na epyange jailakei she ima-a, hüyange I sheshao me hanghe üting hatüo lingma-a, hüyange lye phapu ngaokeng me na shonglakei she ima-a, hüyange I ngaokhümlan khongkümpu jonlakei she ima-a, Egyptlante Taowe peine tampu daktin ja nehoi Taowe numante ngoine yetamlak. Hangjingne nang meiye tampupa Youngwanpa-a Tao ngohnang.”

²⁷Tüophei me iman Elimte pei, ümeken me yengyin pen me ni hüyange logpee denyit ngoiye ngoh, hüyange iman tüoken me yengnah me nyoijing ling.