Read Konyak Naga WOITEI 16 Bible Online

WOITEI 16 - Konyak Naga bible

WOITEI 16

¹Israel bangnyuha khongküm Elim mepu yayong; hüyange Elim hei Sin nipa me ngohpu Sin wanwüng jeng, Egypt kahtok mepu iman yayong phei me ni shepupa leat nyih pen me nga shepupa nyih me ngoi.

²Israel hayim banghalan khongkümpuwe wanwüng jeng me Mosa hei Aaron ni phei tüi-e ngu nga.

³Israellan-e imni te i, “Aope toman-e meitük ü-o me shotyange hüyange ülao hahying okpu shin-e hah ngoh, hüwante Egypt kahtok me Youngwanpa yak-e toman li ne tamteki she ngoh shih ma-a meihah shepu: hüpoi tüopa bangnyuha nopu sea nyaopuwe phao me litamlak numan-e toman woipei.”

⁴Hüwante Youngwanpawe Mosa te i, “Leihuyah, Taowe numan jingne wang mepu hahying yeine tamlak, hüyange kahtalan nokshao te yulak hüyange nyihjeih she nyih ja hahlak hahying wangpu shinne shaijemlak. Tüokih-e linge Taowe nyüoweleipu me iman woilak heiya yewoilakei Taowe tokke leilak.

⁵Nyih wok shepupa nyih me-a iman-e hangke shaijem-e ngoh hüke muh tüophei üphong ni nyeiye yolak hüyange tümtalak yang.”

⁶Tüokhei Mosa hei Aaron ni-e Israellan khongküm pute i, “Egypt kahtok mepu numan woiteipu-a Youngwanpa muh yang she teya numan-e shinglak.

⁷Hüyange napning numan-e Youngwanpa omme ngohpu müktishiwa phihlangpu ngelak. Hangjingne Youngwanpa phei tüi-e numan-e ngu ngapu lye jaiteki, ütingme, I phei tüi-e ngaopu. Hangjingne, hüke numan-e toman phei tüi-e ngaolak ne toman-a hanghe?”

⁸Hüyange Mosawe i, “Aope Youngwanpawe yaning me numante hahlak jingne mei hüyange napning hahlak jingne numan-e okpu shinne hahlak hahying phalakei, hüwante numan-e hangshin me I phei tüi-e yemeipe ngu ngayangki, lye jaiyangpu yang she numan-e, shinglak. Aope numan-e toman phei tüi-e ngu nga yapeih, numan-e ütingpa me Youngwanpa phei tüi-e ngu nganang.”

⁹Hüyange Mosa-e Aaron te i, “Israel bangnyuha khongkümpute Youngwanpa sheshao me pei-e yonglak jingne hangjingne iman-e ngu ngapu lye jaiteki she itüoh.”

¹⁰Hüyange hüke Aaron-e Israel bangnyuha khongkümpu phei ngaowante, iman-e wanwüng jeng yekaote lei ye; hüwante mokhshe Youngwanpa phihlangpu wangngai wangphom me ngai.

¹¹Youngwanpawe Mosa phei ngaowe i,

¹²“Taowe Israel lanne ngu ngapu jaiteki. Imante hüke itüoh, ‘Wangngaiko me numan-e hahlak jingne mei tüolak, hüyange shomme numan-e okpu shinne hahlak hahying tüolak. Hüwante numan-e Taowa numanjing Kahwang, Youngwanpa she shinglak.’”

¹³Ün yekao me awshi üngang puwe peiye iman lakjing maa; hüyange napning lakjing neikon-e nyai yei.

¹⁴Aope yeiye ngohpu nyaite üshem ngaiye eaye mah yapeih, leihuyah, ü-oun ne mengpu nyai ü-oun kih-e ü-oun üjing jingha kahtok tangme yeiye ngoh.

¹⁵Aope Israel lanne tüopa nge, hatüowa hanghe ne ngoh iman-e yeshing; tüokhei iman-e jawe jate teitonge i, “Hatüo hangshi?” Mosawe imante i, “Hatüowa Young-wanpawe numante hahlak jingne phapu hahying ngoh nang.

¹⁶Youngwanpawe ngaophapu hatüo ngohnang, ‘Numan kahta lili-e yoi hahjange toontüoh; numan kahta lili-e yoi nyenok me ngohpu shangtoi phei shuwe kahta lili-e omer japong toontüoh.’ ”

¹⁷Israellan-e hüke ling; ütam-e sheyong she, ütam-e sheshoi she toon.

¹⁸Hüpoi aope iman-e omer me takke leiyapeih, aoyinne sheyong she toon, jamloi yonge-o yenang, hüyange aoyinne sheshoi she toon jamloi shoi-o yenang; kahta lili yoi hahjange toonpu ne ngoh.

¹⁹Hüyange Mosawe imante i, “Kahta aowe-o ngainyih pu jingne towe tah ang.”

²⁰Hüpoi iman ütam-e Mosa ngao yejai, hüyange tüopa mepu towe ang. Ünenap tüopa me yong üngang pah teiye hüyange sea nam teiye ngoh. Tüokhei Mosa imante mongshih ngai.

²¹Napja phei me napja she iman kahta lili yoi-e hahjange toon; hüpoi aope wanghe lange ngailakei towe ngoh pulan-a üsheamne ngaiye taimah yangki.

²²Wokshepupa nyih me iman-e üphong ni hahying yowe ang, hatüowa kahta liliye omer nipong toon. Ükhong woipalan khongküm pei hüyange Mosate tüopa jeng i,

²³Iye imante i, “Youngwanpawe ngaopuwa hatüo ngohnang; ‘ngainyih-a lahnyik mongkopu phei toloimeipu nyih, Youngwanpa jingne üjao Sabbath nyih ngohnang; numan-e hanghe hahying linglakne ngoh, tüopa lingtüoh, hüyange hanghe honglak ne ngoh, hatüo hongtüoh; hüyange topu khongkümpu-a napning ngoiye numan jingne angtüoh.’”

²⁴Tüokhei Mosa ipu kih-e hangheyin to iman-e tüopa-a napning ngoiye ang; hüyange hatüowa yesea yenampe ngoh yejema-a yongo yepah pe ngoh.

²⁵Mosawe i, “Hatüowa tenyih hahtüoh; hangjingne tenyih Youngwanpa jingne Sabbath nyih ngohnang, tenyih pa-a hatüowa üko me numan-e yetüo külak.

²⁶Nyih wok hatüowa numan-e yolak; hüpoi nyit shepupa-a nyüonyih ngohnang, tüoma-a hango yenanglak.”

²⁷Nyit shepupa nyih me kahta ütam-e hahlak toonlak jingne tai, hüpoi iman-e hango yetüo.

²⁸Hüwante Youngwanpawe Mosate i, “Nang kahta lan-e hangshin me laowe ü-ngaokenglan üjon hupe ngohlak?

²⁹Teihtüoyah! Youngwanpawe numante Sabbath pha, tüojingne wokshepupa nyih me Iye numante nyih ni jingne hahying pha; numan kahta lili numan ümeken me ngoh shu nyoitüoh, nyit shepu nyih numan ngohpu nyoi tahtüoh.”

³⁰Tüokhei kahtalan-e nyit shepupa nyih me toloimei nyoi.

³¹Sha-a Israel kahtalan-e tüopa hahying te manna she nyik. Hatüowa hoinge üli kih-e he-enge, hüyange hatüo hahlak jingne zahtai jelo phei lingpu an ülam ja kih-e ngoh yangki.

³²Mosawe i, “Youngwanpawe hanghe ngaokeng pha hatüo ngohnang: ‘Manna omer taksheng ja yah-e ngoikülak numan jin khongkümpu jingne angtüoh; hümme nakshih aope taowe Egypt kahtok mepu numan woingaiyapeih, phaonyu wanwüng jeng me taowe numan-e hahlak jingne phapu hahying she iman-e ngelak.’ ”

³³Mosawe Aaronte i, “Yengtük ja yayah, hüyange tüome omer ja manna hintüoh, hüyange temanjing huhayimlan ngoiye anglak jingne, hatüo Youngwanpa sheshao me angtüoh.”

³⁴Youngwanpawe Mosate ngaokeng phapu kih-e, yemahpe anglak jingne tüopa-a Aaron-e jiengjeppu sheshao me ang.

³⁵Israellan-e wangpeng deli ngoiye, ümeken me iman chingnyoi-e lak, tüopa Kanan kahtok manngoi manngoi iman-e manna hah.

³⁶(Wangpangpu te jonpu omer ja-a ephah pen meitam.)